اســــــــــــــــبـــــــــــــــوع

السلام عليكم و رحمة الله و بركاتة

افتتحت هذا الاسبوع بعملية لوالدي ... مية بيضاء علي عينة ... و عملها في معهد حكومي متخصص ... و للامانة المشتسفي كانت نضيفة جدا جدا و الخدمة فعلا متميزة و دا بيثبت نظرية ان الحاجات الحكومية لازم تتصلح علشان تبقي فعاله و متنجة - مش تتخصخص و تتباع البلد زي اللي بيحصل دلوقي - . لان معهد مثل هذا يجتذب خبرات و ليس الموضوع تجاريا فقط و لكن علميا جيد ايضا ... و اعتقد انه مغطي تكاليفة ...

تحدث اعمامي معنا - اخي و انا - عن جانب من الفساد الذي يحدث ... و اكد لي عمي الذي يعمل في هيئة المصل و اللقاح ان مديرها السابق ليس بالسوء الذي اتهموه به و لكن الغلطة التي ارتكبها انه غلط في حد من المقربين من الحاشية الملكية , و تجاوز المسموح ... رغم انه نهض بالهيئة و قبل ما يتفرغ لها - لانه غير متزوج و ليس له ابناء يعني حياتة هي شغله - لم تكن شركة محترمة اساسا ... اشرف علي ابحاث علمية علي مسويات جيدة و ارسل بعثات للخارج .. و اصبحنا في اقل من 5 سنوات في بداية تصنيع الهرمونات من مصادر حيوية ... و كانت الشركة تحقق ارباحا ليست بالقليلة ... والغريب انه في القضية الملفقة له انه لم يتهم اي شخص اخر - رغم انه لا يعمل وحدة في الشركة - الا هو !!!!

عامة الشركة العام الماضي طالعة خسرانة و هما بينمروا انهم يخصخصوها و يخدوا هرمون الانسولين من الشركة اللي من البلد التي تسب الرسول عليه افضل الصلاوات و السلام بسعر معقول لمدة عشر سنوات و بعد كداالناس هتتشوي بجد!!!! اذا كنا احنا دلوقتي مش لاقيين الانسولين الاربعين ابو ستة جنية و نصف و الموجود بس ابو 31 جنية ... حسبنا الله و نعم الوكيل

فرأت علي النت عن ندوة عن التعديلات الدستورية قولت امااروحها لاني صراحة سامعة في موضوع التعديلات الدستورية دا و لكن حتي هذه اللحظة لا اعلم ما هو الذي سوف يتغير بالفعل و الي ماذا سوف يتغير ... و حضرت الندوة و لاول مرة اري جميع التيارات السياسية المختلفة ( القومي الممثل في الناصري - و الاسلامي الممثل في الاخوان - و الليبرالي ) يجمعون علي ان هذه التعديلات نكبة علي بلد ... و لكني حتي هذه اللحظة لا اعلم ما اللي سوف يتم تعديلة ... و في انتظار قراءة بحث يشرح لي تفصيليا المؤامرةالتي تحاك علينا نحن الشعب الغلبان اللي مش فاهم حاجة ... و يا رب بس التعديلات دي لا تتم الا بموافقة الشعب و ساعتها انا و لاول مرة في تاريخي هروح اقول رأيي اني ارفض ما يحدث

من ضمن اهخدافي التي عاهدت نفسي قبل ان ابدأ في العمل كصيدلانية ان اكون دكتورة - بتفهم - لانه فيه مقولة شائعة ان الستات مش بتفهم حاجة !!! فانا قررت اني اعمل علي قدر ا لمستطاع اني اكثب ثقة المريضات - لانهم اكثر من الرجال ما لا تثق في النساء و نفسي افهم ليه - و اقدم مثل لدكتورة مسلمة بتفهم ... و الحمد لله اخيرا اتنين علي يومين دخلوا و شكروني اني قولت لهم علاج و طلع صح ...و اني داكتورة بتفهم !!! دا بجد مخليني مبسوطة اوي اليومين اللي فاتوا ....

من اغرب الاشياء التي قابلتها ... طفل صغير " بتاع سنة و نصف " و بديلة حقن ... مشكلة الاطفال مع الصيدلية انهم مجرد ما يعدوا ادم الصيدلية يبتدوا يعيطوا علي اساس ان الصيدلية دي = حقنة = الم = الكثير من البكاء و العويل

اما هذا الطفل ...فبع ما بياخد الحقنة و نوبة البكاء تخلص - عكس كل الاطفال - يقعد يضحك لي و يرسل لي قبلات في الهواء و يعمل لي وداعا بيدة !!!! نفسي افهم اشمعني الولد دا !!!! حاجة غريبة

كمان من ضمن الحاجات اللي هتجنن و افهمها ... في زبالين بيعدوا علي الصيدلية 3 مرات في اليوم !!! واحد العادي و التاني اللي بتع الكهرباء و الثالت اللي تبع المحافظة ... و مع ذلك الشارع مليان ورق و كراتين و غير نظيف , نفسي افهم بجد ازاي دا

هناك ايضا رجل عجوز ... و الرجال العواجيز لما بتتكلم بتتكلم عن السياسة - عكس النساء اللي بتتكلم عن مشاكلها الاجتماعية - مصر ان الفقراء هما اللي هيدخلوا النار و انه الاغنياء كويسين و هيدخلوا الجنة ... و ان اللي بيتعاون مع اسرائيل صح و مالة لان حكومتنا بتهب اكتر ... و اكتر من دا و دا مصر اني مش مصرية و اني دخلية علي الجنس المصري الاصيل !!!! انا الناس اللي زي دول صراحة بحب اسمع لهم بس و مشاتناقش معاهم لانه شايفينا الجيل التلفان اللي بيجادل و خلاص و معندوش اي خبرة ولا فاهم اي حاجة ... بس رجل مجملا طيب و بيشتري دواء كثير :)

من ضمن العادات التي لم ارها من قبل ... اعلان عن الميت في ميكروفون الجامع ... و قدرا توفي عدة اشخاص لم يخلوا هذا اليوم من صلاه علي متوفي في كل فرض

اما من الحاجات الغريبة ايضاُ , مرور عربية كارو بميكروفون - مثل الروبابيكيا - و تنادي علي ملح !!!! لم اسم قط من قبل علي ملح يباع سايب هاكذا ...

امس حضرت خطوبة واحدة من انتيماتي الثلاثة ... ( واحدة اتخطبت امس و التانية مخطوبة و التالتة زيي تمام ) و كانت فرصة رائعة اني اشوف ناس كتيرة اوي مش بشوفهم غير في المناسبات الرسمية ( الافراح و المياتم ) ... كأن الدنيا بتاخدك في موال لوحدها و بتنعزل و بتتقوقع علي نفسك و مش تفوق عير علي دول ... ما علينا دا حال الدنيا و لكن قريبا هنغيرة !!!!!

والدي علي فكرة الحمد لله بقي كويس جدا و العملية نجحت و بيقول انه رجع احسن من زمان بكتير ... شكرا لكل من دعي لي :)