الأحد، يونيو 03، 2007

العلاقة بين سواقين الميكروباس ,و المماليك , و الوسية


سلام عليكم


......مجرد فلسفة و سفسطة زيادة


......و لكن هي محاولة عبثية لايجاد قاسم مشترك بين هذه الاشياء



1- سواقين الميكروباس
فئة انعم الله عليم ان وهب لهم ميكروباس ... و يتحكمون في خلق الله من اللي بيركبوا معاهم (كأن كان عندهم عقدة نقص ) ... بداية من رفع الاجرة كل ما البنزين يغلي , الي انه يلطع الناس نصف ساعة لحد ماالعربية تحمل و طظ في مصالح الناس ... و لو قدرك ساقك انك تركب ميكروباس واخد دور زميلة مثلا ... او لو صاحب الموقف مش راضي عن السواق اللي انت ركبت عربيتة ... يبقي انت تخضع لارادة صاحب الموقف و تنزل انت و اللي ماعك و تركبوا العربية اللي المعلم الكبير يقول عليها دون ادني اعتراض من صاحب العربية اللي اخدت دور مش دروها ... ولا انت شخصياً تقدر تعترض و ترفض تنزل لانه ببساطة هيركب دماغة هو كمان و مش هيطلع العربية و انت الخاسر حتما!



ملحوظة ... تملي تلاقي المستوي الثقافي لركاب الميكروباس اعلي من السائق و التباع و لكن لا احد يقدر ان يقول اي شئ في حظرة صاحب الجلالة السواق ...لانه يمتلك القوة الحقيقية

2- المماليك
شوية عسكر مستوردين من جميع انحاءالعالم) لان العثمانيين كانوا فاكرين ان المصري ينفع فلاح و بس )
و الوالي كان بيجمع منهم ضرايب ... و هما كانوا علشان يكسبوا ...بيجمعوا اضعاف مضاعفة من الضرائب من الناس اللي لا حول لها ولا قوة بتدفع .. علشان ميعرفوش فن الدفاع عن النفس ...و بيستغلوا انهم عندهم قوة و جبروت و كارت اخضر من الوالي يعملوا اللي هما عايزينة



3- الوسية
شئ تكون في عهد ما قبل الثورة و قضي عليه عبد الناصر و هو عبارة عن ان الباشا الكبير صاحب الاراضي كان بيمتلك ثورة طائلة ... و يستطيع شراء الفدادين القليلة من الفلاحين البسطاء او ان يضيق عليهم و يضرب بيع محصولهم ... و بشتريه الباشا منهم برخص التراب و يضطر الفلاح ان يستدين بالربا ليسد عوز عيالة ... ثم تتراكم الفوائد و يأخذ الباشا الكبير الاراضي من الفلاحين - بجحة تسديد الدين - و يتحول الفلاح الي عبد يزرع ارض الباشا و يحصد المحصول و يكون حارس عليه و هو يتضور جوعا و لكنه لا يستطيع ان يمد يده عليه .



هل عرفتم العلاقة ؟؟؟؟؟
هذا هو حال
مصر من حوالي ثلث قرن الا اربع سنوات





المرحلة الاولي التي عشناها هي مرحلة سائقي الميكروباسات
تدرج الامر ان امسك زمام الامور ما ليس له اي باع سياسي ... و لكن لانه تقريبا صاحب اول ميكروباس في الموقف ... و تطور و اصبح صاحب الموقف و له السبق في احضارا لميكروباسات للمنطقة ....
اصبح هناك منتفعين من الامر ...و اللعبة احلوت

و نحن الان نعيش في مرحلة المماليك
و سمات هذه المرحلة ان المتحكمين في البلد لا يريدون ان يكونوا مسؤولين عن اي نوع من انواع التنمية او اي شئ البتة ... فيريدون نفض ايديهم من كافة انشطة الدولة التي هي اساسا مسؤولية الدولة و اوهمت الشعب انها ليست مسؤوليتها ... تركتها لهم هاكذا ... نحن الان علي اعتاب خصخصة التأمين الصحي ... و خصخصة التعليم و الغاء تكليف الاطباء ...(يعني الدكاترة هيتعلموا نظري مش عملي ) ...ووقف التعيينات في كل الكليات ... و تدهور مستوي المعاهد البحثية ...و تدهور الصناعات الاساسية و عدم بناء مصانع حقيقية ( مجرد مصانع لبان و شاي و سمن ) .... واخيرا بيع النساء في سوق النخاسة الخليجية


و من معة مال هو فقط من يستطيع ان يشتري اي شئ ( صحة و تعليم و شهادة من اي جامعة اجنبية في مصر ) و كلة دلوقتي متجة للعقود المؤقتة....
و قصرت الحكومة مسؤوليتها الان علي حفظ النظام الخارجي والداخلي لمواكب المماليك المتحكمين في رؤوس الخلائق ( ايا كانت درجة هذا المملوك ) و جبايه الضرائب فقط .


اما المرحلة القادمة التي هي التظور الطبيعي لما سلف هي " مرحلة الوسية "

و هذة المرحلة تتميز ب ... اختفاء الطبقة الوسطي تماما و اندثارها( اما من وفاة ابنائها و بنتاتها المثقفين الذين لم يتزوجوا لضيق ذات يد من هو في نفس مستواهم الثقافي- و ذلك لان محتكر صناعة حديد التسليح في مصر رفع سعرة لارقام فلكية ادك الي ارتباع اسعار الشقق اكثر فأكثر - و عدم انجابهم لاطفال و بذلك تفني حوالي 75% من هذه الطبقة المزعجة و الباقي اما مهاجرون في شتي مناحي الارض او ندرة مازالت تصارع طواحين الهواء في الوسية من اجل البقاء ) ... و يبقي فقط مجموعة جهلاء يعيشون تحت حط التعليم (لانهم لا يمتلكون مصاريف المدارس الاجنبية لان التعليم تمت خصخصتة ) و يعيشون علي اردأ انواع البضاعة الصيني ... لانه لا يوجد تصنيع مصري ...و يتداوون عند الصيدلي (فلا احد يمتلك المال اللازم للذهاب للطبيب ) ولا يشترون الدواء منه (لان المصانع المصرية كلها تم بيعها لصالح شركات اجنبية و الدواء تضاعف خمس مرات في عامان ) بل من عند العطار .... و يمتهن ابناء هذه الطبقة كل الاعمال التي يأنب ابناء صاحب الوسية ان يمتهنونها ... اما بالنسبة للمهن المتوسطة ...فانهم سوف يستوردون العمالة مثل الاطباء (لانه لا يوجد تدريب كافي للطبيب المصري ) و دكاترة الجامعة ( لانه لا يوجد تعيين اساسا للمعيدين و اغلب الكفائات المصرية لا تتحمل ما يحدث و تهج علي برا ) و يقتصر دور دكاترة الجامعة علي الاشراف علي لجان الشفوي في الجامعات الخاصة ( لان الكليات سوف تخصخص ) و سوف يكف الناس عن بناء البيوت الا في التجمعات الجديدة مثل مدينتي و ما الي ذلك ...
بل ستتحول الناس الي الخيام ( ما خف حملة و قل ثمنة ) .... و سوف تصبح تجارة كاسدة و سوف يقل الطلب عليه جدا ....
و طبيعي ان لا يمثل الزواج مشكلة عند هؤلاء ... و سوف تتحول الشبكة العروس الي نحاس مطي بالذهب لان الصاغة قفلت لان جرام الذهب اصبح ب 1500 جنية مصري ( في الفترة الاخيرة اغلقت الصاغة ابواب 450 ورشة و تم تسريح العمالة لفقدان الناس القدرة الشرائية للذهب ) ... و سوف يلغون في هذه الاوقات القروش و سوف تصبح اقل عمله هي الجنية ...

اما ابناء طبقة الوسية فسوف يعيشون في مدن مغلقة خاصة بهم علي نسق مدينة الرحاب القديمة (ان ذاك ) و لن يسمح بدخولها لابناء الفلاحيين الجدد ... و سوف يعيشون في اجواء نظيفة و راقية و غير ملوثة بالعوادم و يتعطرون فافخر العطور الفرنسية و يلبسون الاحذية الايطالية و يلبسون الساعات السويسرية و الملابس الهندية و زهور الهولاندية ( كل هذا لانه لا يوجد صناعة مصرية محترمة ) و لاحظوا انه يتم نقل الان جميع الجامعات الاجنبية خارج حدود العاصمة و ايضا نقل تمثال رمسيس حتي يقيمون عليه متحفاً لهم حتي يذكرهم بالقاهرة خارج حدودها ... و لن ينزلوا للمدينة الا للعمل هناك و في بعض ساعات من النهار فقط و ان ساروا فيها فسوف يسيرون في حراسة مشددة حتي لا يتعرضون لرعاع الطريق ( لان اطفال الشوارع سوفيتطورون بفعل الزمن و يصبحون عائلات الشوارع و سوف يستعمرون بعض الشوارع المعينة و يستكونون اماكن خاصة بهم و يكون السير فيها عليه اتاوة )
هذا بالنسبة لمرحلة الوسية ...


و لكن للاسف خيالي ليس خصب بالدرجة الكافية حتي استطيع ان اتخيل ما يمكن ان تفرزة هذه المرحلة اكثر من ذلك ...
انا كنت عايزة الموضوع دا علشان اهرج فيه بس مش عارفة ليه قلب بغم بالشكل دا ... بس الغريب اني مش متشائمة خالص علي فكرة



دمتم :)




ملحوظة : ليس كل سائقي الميكروباس و كل المماليك و كل الباشاوات كانوا كدا ... لا يوجد قاعدة للتعميم و هناك افراد محترمين جدا من كل الفئات ... وجب التنويه
ملحوظة اخري :.... كانت نهاية المماليك في مذبحة القلعة ... و كانت نهاية الوسية علي يد التأميم ...

هناك 41 تعليقًا:

عصفور المدينة يقول...

وكانت نهاية الميكروباص بركابه وسائقه في حادث أليم تحت عجلات قطار طائش

يعقــــوب .... يقول...

الموضوع الي بتكلمي عنه ده حطير جدا وفعلا ميسمحش للتهريج زاى ماقولتي...ولعلمك نظريتك صحيحة .. وابتدت تطبق فعلا...بس انا شايف ان مافيهاش حاجة دلوقتي لما كل واحد يعيش في الوسية بتاعته على الاقل يحمي نفسه وعيلته من الفساد والهمجية والتفتت الحاصل خارجها

سجدة يقول...

بصى بقه موضوع الميكروباصات دا بالذات جاى على الجرح اوى انتى عارفة مغامراتى
اما موضوع الوسية دا بقه
فدا المتوقع فعلا ولها كم سنة ويكون التطبيق عام
وعلى بركة الله

سجدة يقول...

نسيت اقول حاجة ان مبقاش فى تراحم بين الناس وبعضها كل واحد يقدر يضغط على اللى اضعف منه بيضغط عليه بمنتهى القسوة

النهر يقول...

اسقاط تاريخى على المرحلة بكل سوءاتها وبكل سوءات التاريخ ، وبخصوص الميكروباص فهو أيضا من سوءات المرحلة الحالية ، لأنه ليس عندنا قانون أساسا ينظم أى شىء بما فيها وسائل المواصلات ، و من يشعر بذلك ويعيه من سافر للخارج و الذى يشعر بالفرووووووووووق الكبيرة فى تنظيم كل مناحى الحياة ما كبر منها وما صغر ، لدرجة الشعور بأننا نعيش فى مصر فى مرحلة ما قبل القانون ، و من هنا ليتهم يخصخصون كل شىء وينهونا ... فلن يكون هناك قطاع عام للنهب ... و العلاج .. أعتقد بأنه ليس هناك استشفاء فى مستشفيات عامة منذ زمن طويل ، كل شىء دخل القطاع العام فيه فسد ... و اسلامنا أخبرنا بذلك قبل 14 قرنا ... و هناك آيات قرآنية كثيرة توضح ذلك بجلاء ... و لكن مما يحزن له أن ما يحدث الآن فى مصر هو بأموال الشعب الذى سيحرم منها

يا مراكبي يقول...

عجبني جدا التحليل بتاع الميكروباص

فعلا .. أول حاجة لازم الواحد يعملها هو إنه يمسك الأمور الإقتصادية الأول .. وبعد كده كل حاجة هتيجي تباعا تحت وطأة الحاجة

هي دي كانت البداية اللي الناس ما أخدتش بالها منها من تلت قرن إلا حبه

غير معرف يقول...

احنا فعلا عايشيين في وسية --> وسيه بس موديل 2007 حيث كل شئ مقنن ومنظم ودستوري

تحية على الطرح والفكر العالي
ربنا يكرمك ويوفقك

اه حاجة كمان---> خللي بالك من نفسك علشان المماليك ميزعلوش منك

قاسم أفندي يقول...

بوست حلو اوي يا شمس
جميل جدا الربط بين الثلاث عصور
بس انا في رأيي ان اخر الوسية مش شرط التأميم .. ساعات بتقلب غم أكتر زي ما حصل في الثورة الفرنسية
موضوع رائع
تحياتي

ana يقول...

حلو قوي بس الخوف لتبقى بس ليه ما جبتيش سيرة نهاية كل واحد من التلاته فمثلا الميكروباص ممكن تبقى نهايته سقوط من فوق كوبري والمماليك ممكن تبقى نهايتهم راس معلقه على باب زويله والوسية ممكن تبقى نهاية صاحبها تجريده من كل ما يملك

Alaa يقول...

اسقاط تاريخي ممتاز على الواقع
موضوع الميكروباس بنعيشه كلنا يوميا او اسبوعيا
منا الايجابي و منا السلبي
من الهادي و منا ابو دم حامي اللي ميقبلش انه يتنقل زي العيل الصغير بين عربيات السواقين و لو شدوا فيه يكون عارف رقم حد في المرور يتصل بيه و يطربقها على دماغهم :)
الوضع ده و التحكم ده ناشىء عن انهيار الرقابة في البلد
زمان كان في مراقبين على المواقف و الزبون يتعامل احسن معاملة ( وده في زمن جدي و جدك ) انما دلوقتي كلهم حبايب و ضد الزبون و اللي مش عايز في داهية و في غير 100 زبون

ربنا يستر ع البلد دي
طرح قيم بارك الله فيكي

غير معرف يقول...

ماذا أقول لك
تفلسفي كثيرا وغوصي عميقا فيما يحدث للناس دون أنتباه منهم
رائع ما كتبت
ليس لدي أكثر من ذلك لاقوله الآن
يبدو أن ثوراتنا فشلت في تحقيق أهدافها وربما نحن بحاجه الى ثورات جديده
دمت سالمه

غير معرف يقول...

يعني .

ممكن.



يمكن يكون سبب بلطجة و تسلط و إجرام كثير من سواقي الميكروباص . أن بداية الفكرة و المهنة نفسها كانت من أرباب السوابق و الخارجين من السجون .. و بعد كده اجتذبت بأرباحها طوائف تانيه . و اختلط الحابل بالنابل.

Monzer يقول...

نهاية المماليك مذبحة القلعة
نهاية الوسية التأميم
طب نهاية الشعب ايه
هل يا ترى فى نهاية او فى احداث هاتكون أسوأ من كده
دول لو مركزين انهم يبهدلونا
مش هايعملوا أكتر من كده
صح
الشاهد ان لازم أشوف حد أبقى التباع بتاعه
فعلا المقال اتجه اتجاه مأسوى للغاية

شــــمـس الديـن يقول...
أزال المؤلف هذا التعليق.
شــــمـس الديـن يقول...

السلام عليكم و رحمة الله و بركاتة

الفاضل الكريم عصفور المدينة ...
ممكن
بس المشكلة ان احنا ركاب الميكروباس !!! انا عايزة موتة ليهم هما بس ... هو عامة سواقين الميكروباس مش وحشين ...
افتكر مرة انهم كلهم في يوم سهروا يعلموا واجب مع واحد زميلهم كان بيتجوز ... و محدش صحي منهم الصبح و الناس كلها محدش عرف يروح شعلة !!!!

كانت ازمة بجد

**********************************
الفاضل يعقوب
علي
قبل ما ارد علي حضرتك ياريت حضرتك تسمح للناس انهم يعلقوا في مدونتك ...انا حاولت كذامرة علشان افتقدت تعليق حضرتك علي المدونة السابقة و لاقيت ان حضرتك مش نزلت ندوينات جديدة بقالك فترة فحبيت اسئل عليك و لكن الامر كان مستحيل ...

ياريت حضرتك تسمح لنا باضافة التعليقات في مدونتك ... ممكن :)

اما بقي تعليقك علي التدوينة

انا مكنتش عايزة اهرج بالمعني المفوم و لكن اخفف من حدة الامر ... و لكن قلب مني بغم
اللي حضرتك بنتقولة اشبه اننا نمشي ماسكين و قابضين علي الجمر حتي لا تصيبنا الفتن ...

بارك الله لك و كويس ان حضرتك بخير

**********************************

العزيزة الغالية سجدة
انا رأيي انك تنزلي يوميات اسمها " يوميارت راكبة ميكروباس " و بجد هتكسر الدنيا ...
لان انت ليكي مغامرات فعلا عظيمة معاهم

معادش فيه اخلاق مش تراحم بس
دمتي بكل الخير

***********************************
الفاضل النهر
مش عارفة
بس حاسة ان حضرتك ضد القطاع العام مطلقا !!!!

ازاي بس
التعليم اللي انا و اغلب الناس اتعلموا فيه ما هو حكومي ...
لو مكنش فيه حكومة فعلا انا مكنتش اتعلمت خالص !!!!!

القطاع العام مش وحش علي فكرة ... هو بس ناقصة شوية تنظيم و تطوير... مينفعش بلد ميبقاش فيها قطاع عام ... فيه حاجات اساسا لن تقام بجهود القطاع الخاص ...

القطاع العام الذي فعله عبد الناصر لم يكن صحيح تماما فلا يعقل ان تتدخل الدولة حتي في محلاتالفول و الطعمية !!! و لكن ما حدث كان تصحيح لاوضاع كان لابد لها انت تصخحح
و للاسف اليوم عندما ارادوا تصحيح الخطأ ارتكبوا خطأ ابشع منه !!!

كيف سيقوم القطاع الخاص بدورالمستشفيات التعليمية
كيف هذا ؟؟؟

عيب المستشفيات التعليمية ليس اطباء ولا اي شئ ...العيب عيب ممرضات فقط ... لكن حقا الدكاترة علي اعلي مستوي ممكن حقا و مش مجاملة

امال الشعب منهوبة

عامة هناك مقولة بتقول ان نصيب الفرد من قناة السويس 7 دولار يوميا... انا عايزاهم و يشيلوا الدعم علي رأي سجدة :)

دمت بكل الخير

***********************************

الاستاذ الكريم احمد يا مراكبي

اي امر لاصلاحة لابد ان تمسك الامر اقتصاديا ... ويل لامة لا تأكل مما تزرع ولا تلبس مما تصنع

فعلا
ربنا يستر علي اللي باقي
***********************************


الاستاذ الفاضل احمد
مرحبا بك في اول مرة زيارة ...لنك مدونتك مش شغال مش عارفة ليه

هي المشكلة انه كله بالدستور

ربنا يبعدنا عن بصاصين المماليك :)
دمت بكل الخير

***********************************

الفاضل قاسم افندي

ربنا يكرمك دا بس من ذوقك و الله

الثورة الفرنسية !!!! يعني نعمل لهم مقصلة !
ربنا يستر علي اللي جاي بجد

خالص التحية

***********************************

الفاضل محمد اسماعيل
مربحا بك لاول مرة و يا رب متكونش اخر مرة

بس انا بالفعل جيبت سيرة نهاية المماليك و الوسية في ملحوظة تانية !!!!
شكلك مش كملت البوست :))

***********************************

الفاضل علاء

هو فعلا زي ما حضرتك بتقول ...بس للاسف ابو دم حامي مش كتير و لازم الدم الحامي يزيد علشان نعرف ناخد حقنا لانه لو فضل بالقلة اللي هو فيها دي مش هينفع

فعلا
معادش فيه رقابة
لان العسكر بقي وظيفتهم بس تأمين المماليك مش الشعب ...لان الشرطة و الشعب بقوا في خدمة الوطن ( او لنقل اصحاب الوسية )

للاسف المنطق ددا بقي كتير اوي و معه انعدمت الاخلاقيات في تعاملاتنا

جزاكمن الله خيرا علي الاطراء
بارك الله لك انت ايضا ُ
:)

***********************************

الفاضلة الكريمة الهام
ربما يغمض عليك ما قصدتة بمدينة الرحاب و لكنه نوع من المدن الجديدةف ي مصر مغلقة تماما علي سكانها و بها كل احتياجاتهم ولا تفتح الا الهم و للزوار و من له حاجة بها

عامة اعتقد انالامر في اليمن لم يصل لهذا الحد المرعب

جزيتم خيرا علي مرورك العطر

**********************************

الفاضل بابا البحر
مرحبا بك لمرورك في المدونة ...

اكيد انا صراحة معرفش ايه تاريخ او قصة سواقين الميكروباسات

دمت بخير

************************************
الفاضل hapasa

مش عارفة ممكن تكون نهاية الشعب ايه ... خيالي مجابش لبعد كدا

و الله غصب عني بس عو تقريبا الواقع فرض نفسة و اختلط بالخيال

كش لازم نبقي تباعين ... ممكن نتعلم نبقي مماليك او نسافر برا و يكون عندنا الوسية الصغيرة بتاعتنا

ربنا يستر علينا بجد
------------------------------

خالص التحية للجميع

محمد يقول...

التاريخ يعيد نفسه .. هذا رأيي وهذا ما سأعرضه في موضوع مشابه بإذن الله

لك تحياتي أستاذة

نقطة مية يقول...

موضوع قوي جدا و تحليل عميق...بس اللي لفت نظري ان مفيش حاجة منهم انتهت نهاية مشجعة...سواق اليكروباص ممكن يعمل حادشة و ممكن الركاب يثوروا عليه و يتفقوا بس ده قليل..المماليك انتهوا في مذبحة القلعة يعني فيه ناس بتخطط لهم و بتحاول توقع بهم بطرق ممكن تصل للدم..اما الوسية فالتأميم ضيعهم و في بعض الاحيان الثورة..فالناس بتلتف حول قائد قوي يقدر ياخد القرار ده او ياخدوه هم بنفسهم..عشان كدة..كل فئة منهم بيزداد بطشها و قسوتها على البشر لانهم عارفين النهاية"الفناء التام"و لكنهم بيتبعوا نفس الاسلوب بس بشكل تاني و بينتهوا نفس النهاية و اللي واقع فيها الناس الغلابة اللي انهكهم الامل و الجشع والحرب النفسية..
بصراحة الموضوع متشعب و اسلوب طرح الفكرة رائع و من اجمل ما قرأت
بارك الله فيكي

محمد السيد..مش حاسكت يقول...

أهه أنا كنت داخل مخصوص

عصر ما بعد الميكروباص ....

صر الغابة ... لما حتلاقي كل واحد عمال ياكل في التاني ...

هنا مش حتلاقي ... سطوة صاحب الموقف .. ولا حتي مجموعة السواقين اللي متفقين علي حاجة واحدة .. ولا حتي الدور اللي بينهم حيبقي موجود ....

هنا مش حتلاقي في نوع واحد من المماليك ... لأن كل واحد حيتصور نفسه المملوك الوحيد ... ويبدأ يضرب في الباقيين ...

هنا مش حتلاقي الوسية .... لأن الباشا الكبير حيلاقي الفلاحين كلهم ثايرين عليه وراسهم براسه .... وحيلاقي كل واحد عشان ياكل عمال يسرقه ويخونه ويخدعه .....

ده لو كملنا زي مابتقولي .... لكن أنا مش بأقول كده ....

محمد السيد..مش حاسكت يقول...

لكن أناش ايف إنها حتتعدل ..

وقربت أوي كمان .....

تحياتي .. لغاية لما نتقابل في العصر الجاي .... الحلو

عصفور المدينة يقول...

أنا قاصد فعلا إن الميكروباص بالركاب بالسائق عرضة للخطر
مش السواق بس

دنـيـا محيراني(ايناس لطفي يقول...

هائله يا شمس محلله جيده جدا فعلا كلامك خطير جدا و كل واحد فينا بيعاني الف معاناه بس انت عارفه حل المواضيع ده كلها في كلمتين وضع قانون صارم وتنفيذه فعلا يعني مافيش ابن فلان و وولاد البطه السواداء يعني لما يكون فيه قانون فعلا يحترم و ينفذ الدنيا هاتتغير و طبعا ده مستحيل في بلادنا حاليا ده كل واحد ماشي و بيقول باعلي صوت انت مش عارف انت بتكلم مين
بكلم مين يعني ربنا يستر علي ولادنا من الاجي
شمس شكر جدا جدا علي مساعدتك الجليه ليه انا الحمد لله بدات في الكتابه علي مدونتي تشرفني دائما بزيارتي و لك الف شكر تاني

كلام لوجيك يقول...

أحييكى من كل قلبى على هذا البوست المتكامل
لقد ربطتى بين الأحداث والتاريخ واستخدمتى الفكر المنهجى للكتابه
واما مؤمن بكل كلمه كتبتيها وادرك اننا ننزلق فى نفق معتم طويل ونهايته ابسط ما يقال عليها انها ستكون مأساوية وعنيفة

انا عاوز اقول ان قوة ونجاح وحضارة وعلم اي مجتمع لا تبنى الا بسواعد الطبقة الوسطى
فإذا اضمحلت او اختفت هذه الطبقة اضمحل المجتمع بأسره وتوقفت عجلة تطوره
والمصيبة ان مصرنا اليوم تتحول تدريجيا لتكون دولة خانقة للطبقة الوسطى وقاتلة لها بسياساتها الداخليه العمياء وبسوء ادارة الحكومة ولإنتشار الفساد الذي يقتل اي متنفس لأي مواطن

اما بخصوص الميكروباصات فحدث ولا حرج
وللاسف لا يتسع المجال لذكر اي شيء بخصوص هذه النقطة السوداء فى البيئة المصرية

اشكرك الشكر الجزيل على موضوعك المميز والذي يدل على حرفيتك فى الكتابة سعة اطلاعك ودراستكى للتاريخ

دمتم جميعا بخير

شــــمـس الديـن يقول...

السلام عليكم و رحمة الله و بركاتة

الفاضل وضاح

هو المشكلة ان الناس بتنسي تعتبر من التاريخ ان نهاية دا سوداء علي الجميع

شكرا علي مرورك الطيب
***********************************

العزيزة الجميلة نقطة مية
ديا لمشكلة ان مفيش حاجة انتهت نهاية مشجعة ... ربنا يستر
مشكلة سواق الميكروباس انه لما هيعمل حادثة احنا هروح معاه مش هيكون هو لوحدة زي مذبحة القلعة او التأميم او حتي الثورة الفرنسية

ما هو يا سيتي الواحد بيحب انه لما يقول علي حاجة لاحظتها بقول علي خطوط عريضة و انا كمان استفيد من تأملات القراء لان فقعلا زي ما قولتي الموضوع جد متشعب و للاسف احنا في الاخر الضحايا !

منورة المدونة دائما

***********************************

الاخ الفاضل محمد السيد

متفقة معاك علي عصر ما بعد الوسية و عصر المماليك

لكن عصر الوسية هيتكرر و لكن بشكل اخر ...ان الباشا الكبير لو حد معجبهوش ببساطة هيطردة من الحتة اللي بيشتغل فيها لان العقود المؤقتة بتتيح ذلك و هيلاقي بدل الفلاح الف فلاح عايزين يشتغلوا ....

مش هيبقي مجرد كلام هتبقي المادة اللي بتذل رقاب العباد
انا اتمني اننا نكمل زي ما انت بتقول

لكن مش عارفة يمكن انا خيالي واسع و نظرية المؤامرة طغت علي الامر

امتني اننا نتقابل في عصر تكون تخلصنا فيه من كل دا :) قريب ان شاء الله

***********************************

الفاضل عصفور المدينة
ربنا يستر علي الركاب و يتحركوا قبل فوات الاوان

تحياتي
************************************
الفاضلة الكريمة دنيا
انت الحل بتاعك حلو جدا لكن مشكلة بلدنا ان حاميها حراميها و ان الناس بتتباهي انها لها سطوة تكسير القانون و اها فوق القانون و انا مش بيطولها
ا
انت فعلا خطيتي ايدك علي الحل في منتهي البساطة و لكن كيف السبيل للتطبيق ؟؟؟
ربنا يستر ان شاء الله

و علم و سينفذ في اقرب وقت :)

***********************************

الفاضل اسامة كلام لوجيك

فعلا زي ما حضرتك بتقول هدف اي حكومة بتفهم انها تزود مقدار الطبقة الوسطي مش تفنيها زي ما بيحصل دلوقتي ...

لما محتكر الحديد الاول في مصر يرفع ثمنة بهذاالشكل كي يؤثر علي البناء و الشقق في مصر و يصبح درب من دروبالاحلام ان تحصل علي شقة - ادمية - درب من دروب الخيال بمرتبات واحد بيشتغل في مصر دات يبقي اسمة ايه ؟؟؟مؤامرة علي الشباب و عليا لطبقة الوسطي بالتبعية

و انا ايضا اشكرك و بشدة من صدق كلماتك الذي وصلني و حقا يا اخي الكريم هذا مديح و اطراء لا استحقة و له مكانة عندي و اصة انه صادر عن شخص مثلك

دمت في حفظ و رعاية الله :)

كراكيب عادل يقول...

انا تبع المهاجرين

انا بس حبيت اسجل متابعة

منة الله يقول...

ربة السيف و القلم

ادعوك للمشاركة في استفتاء

اكثر 10 مدونات تاثيرا في قرائها

و احب ان اخبرك ان مدونتك تم ترشيحها فعلا

اليك الرابط

http://www.6ef.blogspot.com/

غير معرف يقول...

ههههههههههههههه

حلوة أوي حكاية عائلات الشوارع
و كمان موضوع الشبكة النحاس ده
يا تري في عندك عاروسة تقبلها
بس مظنش لأن حسب علمي قريب النحاس هيكون بسعر الدهب
بس لو ده الوسية اللي في الصورة ممكن تديني العنوان لأني مستعد أعيش فيها
حتي و لو كنت من العبيد أكيد مش هتبقي حر زي بلاد الخليج
و كمان مالها الخيام علي الأقل مش هنحتاج صرف صحي و كهربا و أهو نرعي الغنم و نريح دمغنا
تفتكري العيشة في مدينتي و لا الرحاب هتبقي بمتعة العيشة في الصحراء الغربية
أو حتي الصحراء الكبري
بس بجد رغم إنك قلتي إن مش كل المماليك كانو كده
بس أنا برده شايف إنك ظلمتي المماليك تاريخيا
علي فكرة المماليك هما اللي عملوا لمصر إسم في التاريخ الإسلامي عايشيين علي الإسم ده في الوسط المحيط بينا لحد دلوقتي
ده غير إنهم حموا مصر من المغول و الصليبيين طبعا كان عندهم عيوب بس مش زي عيوب مماليك العصر الحديث

خالص تحياتي

غير معرف يقول...

الأخت الفاضلة : شمس الدين
ربة السيف والقلم

قلمك رائع .. وسيفك قاطع

تقديرى واحترامى لموضوعاتك القيمة

أخوك
محمد

Esmeralda يقول...

الصورة كل مدى بتسود

لا تعليم و لاصحه و لا جواز و لا شغل و لا اى حاجه و بعدين؟؟؟؟؟

مالناش غير ربنا

شــــمـس الديـن يقول...

السلام عليكم و رحمة الله و بركاتة

الفاضل الكريم عادل

ربنا يكرمك علي المتابعة...و ترجع بالسلامة

***********************************

الفاضلة منه الله

هروح و هقول لك رايي هناك في مدونتك

***********************************


الفاضل محمد
ما هو دا زي ما بيقولوه التطور الطبيعي لما يحدث الان


و الله انا اعرف دلوقتي ناس عمليين - بس مش كتير - مش بيطلبوا شبكة اصلا !!!

اما الوسية اللي في الصورة دي لكسر الكئابة اللي بتطغي علي الموضوع

مقصودة يعني

اكيد المماليك في الاول كانوا كويسين ...لكن هو لاسف كل مادا الصورة بتزداد كئابة ...
دمت بكل الخير

***********************************

الاخ الفاضل محمد الجرايحي
و الله هذه شهادة اعتز بيها من مدون كبير زي حضرتك

دمت في حفظ الله

**********************************

العزيزة ازميريلدا

مش عارفة اقول لك ايه
احنا فعلا ملناش غير ربنا
هو فوق الكل و ان شاء الله مش هيسيبهم في الاخرة من اللي عملوه فينا دا

ربنا يجازي اللي كان السبب

***********************************

خالص تحياتي للجميع و عذرا علي التأخر في الرد

غير معرف يقول...

المصيبة ان المماليك كانوا اجانب ,لكن مماليك اليوم بيقولوا بكل وقاحة انهم مصريين ,زالوسية كانت انتاج العصر الاقطاعى,لكن وسيات اليوم فهى عودة لذلك العصر .
انا اؤمن ان الزمان سيدور وستعود ايام القطاع العام لكن بدون الحربجية اللى خربوة بافكار العسكرية العثمانلى
وعندما تعود تلك الايام سيكون للدولة وظيفة خدمة المواطن,اى سيكون هناك وسيلة ادمية لنقلة من مكان لاخر,لن يكون هناك لا ميكروياص فكل الباشوات المالكين لة سيكون مكانهم الطبيعى هو السجن مع سائقيهم

غير معرف يقول...

أذهلني الربط بين الأفكار حقيقة
ما شاء الله ...

لي تعليق بسيط بعد إذنك

1- المماليك تاريخيا سابقين على العثمانيين
فلم يأت العثمانيين بالمماليك

بالإضافة إلى أن منهم من فعل للإسلام ولمصر خدمات جليلة منهم " قطز - الظاهر بيبرس ,وغيرهم

أعود للنقاش حول الموضوع مسرعًا
أمس وأنا في طريقي لمنزلي ركبت الميكروميكروباص !!
وهو إصطلاح على نوعية سيارات أجرة أطلقته عليها لصغر حجمها الشديد
المهم , بقدرة قادر السائق طقت في دماغه يضاعف الأجرة نظرا لإن مفيش عربيات والناس كتيرة
" إستغلال "
المهم كل اللي في العربية نزلوا , وأنا منبهر بهذا الموقف بصراحة لأني متعود على سلبية الناس
وركبنا العربية اللي بعدها والسواق الأولاني بقى هيعيط من الموقف , وأخر لما زهق راح طالع بالعربية فاضية ومروح !!!

إختلافي في نقطة ربط سواق الميكروباص بمن ليس له باع سياسي , إن سواق الميكروباص بيعرف يسوق , لكن أخلاقه !!!!!!!!!
أينعم فيه كتير منهم بيلعبوا Need 4 Speed على الطريق , لكن لازم يكون بيعرف يسوق
ده إعتراضي على الربط

التأميم مش حل
وللأسف بشكل أو بآخر 3/4 مصايبنا الحالية بسبب إنقلاب 53 المسمى بالثورة

البلد بقت بوليسية , كل حاجة في إيد الدولة , كل حاجة تراقبها الدولة , الشعب بقى عامل زي الماشية ( وآسف في تعبيري ) ياكل ويشرب ويجيب لبن وبس
ملهوش دعوة بأي نشاط سياسي إلا الحزب الأوحد والوحيد وهو الحزب الإشتراكي زي حزب الفاشيست الإيطالي = النازي الألماني = الشيوعي الروسي = البعث السوري
= الشيوعي الصيني
كله زي بعضه
الناس من هذا الوقت بطلت تتكلم في السياسة وفي أي حاجة خوفا من البصاصين والمماليك على حسب تعبير حضرتك

فعشان كده بعترض جدا على ربط خراب مصر من ثلث قرن إلا أربع سنوات

البلد خربانة من زماااااااااااااااااان
كل اللي حصل إن أعراض المرض بدأت تظهر
فساد مصر عامل زي الضرس المسوس
الضرس بيسوس من مدة طويلة لكن مش بتحس بيه , إلا لما الألم يبتدي

نفس الحكاية
الفساد في مصر والإقطاعية لما تنتهي بالتأميم والإنقلاب العسكري
بالعكس إنتقلت الخيوط من الباشا صاحب الوسية إلى الباشا صاحب الجِهة كلها صاحب البلد

القطاع العام أضراره الإقتصادية معروفة , ومعروف إنه صنم إقتصادي
طبعا فيه حاجات الحكومة لازم تكون تملكها
ولا تخضغ للخصخصة

اخر نقطة
صدقيني يا فاضلة , الناس هي المسؤلة
الناس بتاكل بعضها
سواق الميكروباص ده , اللي حب يستغلنا , حد قاله يسرقنا ويستغلنا ؟؟؟
صاحب العزبة ولا المملوكي قاله إستغلهم وإطحنهم ؟؟؟
البنت اللي ماشية وعاكسها واحد ربنا يهديه يا ياخده , صاحب الوسية قاله قِل أدبك وعاكسها ؟؟؟
التنافر بين الناس كل يوم الصبح ع العيش والخناقات بسبب 5 أرغفة , سببها الرئيسي مين ؟؟؟

الدولة مطالبة إنها توفر للشعب الموارد , والشعب مطالب إنه يتحمل بعضه

الناس هيه اللي غاب عنها مفاهيم كتيرة جدا ومهمة جدا , أهمها الإيثار , وحب الغير , والمنفعة العامة والعقل

أعرف ناس إتجوزوا بكل سهولة وبإمكانيات بسيطة جدا والإتنين مؤهلات عليا
لإنهم عاقليين
الإتنين مش بصوا للتفاهات المسماة مظاهر إجتماعية
والناس هتقول علينا إيه لو إتجوزنا من غير شبكة ؟؟
طب جوزانا حلال لو دخلنا من غير ما نجيب النيش أو من غير ما نجيب تلاجة 23 قدم ؟؟؟

قصص كتيرة جدا بدأت من الصفر وتحدت أصعب الظروف , وإحنا لسه بندور في فلك هيحصل إيه بعد كده ؟؟؟
والدولة مش بتوفر الموارد ليه ؟؟؟

الأفضل نبتدي ونشتغل , لأن الله لا يضيع أجر من أحسن عملا
وإن كان ربنا ضمن هذا للعامل الكافر , فما بالكم بالعامل الموحد المسلم ؟؟!!

الناس لازم يكون عندها إيثار وقيم , ساعتها الشعب هيعمل اللي عاوزه , لان المملوك لو صاحب الوسية هيلاقي نفسه وسط غابة من الصالحين , مش هيقدر يعمل معاهم حاجة

أرجو أن تكون الفكرة قد وصلت ودمتم بخير

" الشامخ "

شــــمـس الديـن يقول...

انا فوجئت انه فيه تعليقين مش تعليق واحد انا مكنتش واخدة بالي منهم

اعتذر اولا عن التأخر

الفاضل Anonymous الاولي :) ...

و الله بصراحة , موضوع مصري و اجنبي دا شئ مستحدث ... الانتمائات كانت قبليه و لما جاء الاسلام وحد الانمائات و بقت الانتمائات لشئ اعمق


و الله ايام القطاع العام احسن من ما البلد تتباع في مزاد علني زي ما هو حاصل و الموضوع ماشي اهه في البنوك و التأمين الصحي

هو دلوقتي الدولة و الشعب في خدمة الاسرة المالكة ... حتي شوف الشعار الجديد للشرطة ( الشرطة و الشعب في خدمة القانون و مادام البلد دستورها اتعدل يعني مبقاش فيه قانون اذن القانون يساوي حكم عائلة مبارك )

خالص التحية علي المرور و التعقيب

***********************************

الفاضل الكريم Anonymous الثاني :))
ردك دسم و محتاج دماغ و انا فعلا استفزني للكتابة
بكرة هبقي ار عليك تفصيليا !!! اعذرني علشان تعبانة من الشغل

شــــمـس الديـن يقول...

اولا جزاكم الله خيرا علي الرد الدسم

اعتذر عن الغلطة التاريخية ... انهم العصر العباسي الثاني , كنت بذاكر تاريخ الدراسات حلو علي فكرة بجد بس الحدتة دي مرت عليا اعتذر عن الغلطة التاريخية


انا مش بذم فيهم علي فكرة و عارفة انهم في بدايتهم كانوا كويسين ...لكن انا بتكلم عن العصور المظلمة
و هي اكتر في فترة المماليك صراحة لان بعد ما بيبرس مات البلد اتقسمت بين فئات المماليك المختلفة

المهم

موضوع القوة التأثيرية للجماهير رائعة بس المشكلة ان الجماهير عندنا اساسا معندهاش الوعي الكافي بذلك ...بالاضافة الي ان جمع مختلف طوائف البشر حول هدف واحد باختلاف تفكيرهم

انا مقولتش ابدا ان التأمين هو الحل

لكن برفض الموضة الجديدة اللي طالعة من مش عارفة مين في ان اللي بيحكم دلوقتي عايز يعلق هبل و فشل الحكومة علي عهد عبد الناصر !!!!!!!!!!!!!!!

كيف هذا بالله عليكم

يعني عبد الناصر اللي من مبادئ الثورة الستة
3 قضاء و 3 اقامة

قضاء علي الاحتكار
القضاء علي سلطة راس المال
القضاء علي الاقطع
اقامة عدالة اجتماعية
اقامة حياة ديمقراطية سليمة
اقامة ( ناسياها بصراحة )

و عبد الناصر بنفسة هو اللي قال احنا معندناش ديمقراطية يعني الراجل مكدبش
و انت يا اخي الكريم لازم لما تقيم شئ مش تقييمة بمنطق دلوقتي و لكن بمنطق زمان
لسة ملك متشال ...و لسة فيه باشاوات مخنوقين من اللي صادر اموالهم و الاخوان عايزين ياخدوا الحكم و كانوا هيقتلوه ... يبقي ازاي اخلي فيه ديمقراطية ؟؟؟ ثم ما السادات عمل ديمقراطية ... ايه اللي حصل له ؟؟؟ اي نعم ديمقراكية السادات كانت انه يسيب الاسلاميين علشان يضربوا الشيوعيين و لكن لما لقي ان الديمقرطية نفسها هتهددة اوقفها و كان النتيجة انه دفعه حياته

عبد الناصر خلي فيه عدالة اجتماعية و الناس اتعلمت كون الن النظام فسد بعد ما هو مات دي مش مسؤوليته لانه فيه ناس جت و كانت ممكن بمنتهي البساطة تبتدي

النماس يا عزيزي مكنتش بتجيب لبن و بس ...الناس بنت السد العالي و اتحدينا اقوي قوة في العالم ... الناس بنت مدني التليفيزيون ... المركز القوميللبحوث و مركز البحوث الزراعية- و ياريت مش تقول لي هو السبب في قساجهم لان اخد دفعة اتعينت في مركز البحوث الزراعية كانت عام 84 - و البعثات العلمية لجميع انحاء العالم و المصانع الحربية اللي ابتدت نواه تصنيع حقيقي من الصواريخ و لو كنا كملنا كنا بقينا زي الهند بس كل دا توقف تماما ...
يبقي ازاي الناس كانت بتاكل و تشرب و تجيب لبن بس؟؟؟

القطاع العام مش مضر ...هما الليب صوروة في التليفزيون انه كدا لكن المشكلةف ي سوء الادارة الي جانب عدم التطور في الاساليب ... يعني لما واحد عايش في عام 2007 و بيستخدجم اسالبي عام 1952 متبقاش مشكلة اللي كان عايش عام 1952 و لكن مشكلة بتاع النهارة اللي مش عارف يتواكب مع العصر

نظام اي دولة لو ممسوكة صح ممكن يتغير في 10 سنوات ... لكن اللي حاصل دلوقتي لا يمت باي صلة ولا اي حال من الاحوال لما تم منذ عام 52

و انا اقول لولا اقرار مجانية التعليم و جعلها مخفضة لما تعلمت انا و اصبحت دكتورة ولما تعلم ابواي و اصبحوا في مراكز مرموقة

عامة الزمن الجاي راجع تاني و ادي البلد كلها بتتباع علشان و التعليم بقي بفلوس علشان الناس ترتاح ... و الليمعهوش ميلزموش :))

دلوقتي بقي قول لنا عملنا ايه ؟؟؟
علي الاقل عبد الناصر مش كدب و مزعمش اننا منارة الديمقراطية كان واضح و صريح و اللي وعد بين نفذة و كان مع الغلابة فعلا ... مش كداب



للامانة
عبد الناصر كان انسان سياسي ...و كمية الكتب اللب قرئها في السياسة ضخمة ... مثقف يعني
و السادات كان رجل سياسي ايضا و الحياة التي خاضها تشد له بذلك


يعني مع احترامي الشديد لرأيك و لكني ارفض هذا الكلام الغير دقيق و الذي يخدم مصلحة النظام الحالي و مازلت اصر علي ان الخلل حدث من ثلث قرن الا اربعة اعوام


وصلت الفكرة و تم ايضاح موقفي بشئنها و ثق تماما استاذي الكريم ان الاختلاف في وجهات النظر لا يفسد للود قضية و فعلا انت متتخيلش مدي سعادتي انك رديت علي موضوع قديم ليا

دمت بكل الخير والسعادة

غير معرف يقول...

جزانا الله واياكم أختي الطيبة
انا مش عاوز احول الموضوع كله على عبد الناصر , لكن ما أقوله من معلومات مش من التلفزيون لأني مش بحبه صراحة !!!
وكمان معنديش وقت ليه
بالعكس بقى أغلب الأفلام والمسلسلات بتمجد في الثورة وبتبرز محاسنها وبتوضح الضباط الأحرار على انهم صحابة !!!

أنا لم أقول أن الحكومة مش فاسدة أو لا ترتكب أخطاء , بالعكس أنا ضدها تماما
وأنا مقلتش إن سبب فشلها هو سياسة عبد الناصر !!!

أنا قلت , غير مقبول إننا نقول إن سبب ما نحن فيه الان هو الحكومة فقط , وان البلد بايظة من 30 سنة بس

لان الكلام ده بكل المقاييس غير صحيح
ايام فاروق كان الجنيه المصري = 2 جنيه إسترليني وريال
وده برغم ما قيل في حق فاروق من فساد وانه كان خمورجي رغم ان حارسه الشخصي اقسم بالله انه كان عنده حساسية من الخمرة فإزاي كان

بيشربها !!!

لكن لأننا شعب بيستقي معلوماته من التلفزيون ومن الميديا بشكل عام أصبح فاروق عندنا هو سبب كل الكوارث

نقطة الدفاع عن عبد الناصر عشان كانت احوال البلد غير مستقرة , معلش مش حاسس انها صح

اولا مين اللي شال محمد نجيب ؟؟؟
ومعروف مين هوه محمد نجيب , ومين اللي حبسه في بيته ومنع عنه اي اتصال بالعالم الخارجي

ومين اللي جر البلد لحرب اليمن المزيفة اللي كانت بتكلفنا كل يوم مليون جنيه , دون سبب واحد عاقل وكانت الخدعة عشان اليهود , رغم ان

اليهود بيهاجروا لاسرائيل من روسيا ويهود الفلاشا من اثيوبيا
وضيع فيها خيرة شبابنا ومجهود وقوت الشعب
والكلام ده من لسان ضباط ولواءات ايام حرب اليمن
مين اللي ضيع 120 الف من شبابنا في 67 وألصق بنا هزيمة منكرة نستحقها بكل جدارة
ومين اللي كذب علينا وعمل مسرحية حادث اغتيال المنشية , ومسرحية التنحي عن الحكم وخروج عمال هيئة التحرير ( مطبلتية الوطني حاليا

) وقعدوا يصرخوا عاوزينك ترجع يا ريس
مين اللي ع ايامه عرفنا زوار الفجر
والنساء اغتصبتها النساء في السجن الحربي أمام ازواجها ( من خطب للشيخ عبد الحميد كشك رحمه الله )
ومين اللي حل الاحزاب ومنعها وعمل حزب واحد , ودي بداية الديكتاتورية والتسلط
ومين اللي منع اي حد يعارضه
والدليل ع كده , مفيش ولا جريدة قدرت تقول لعبد الناصر انت غلط او قراراتك ما تتطلعش عن واحد بصمجي
بالعكس ايام الهزيمة 67 كان الراديو بيقول قواتنا المسلحة ألحقت هزيمة بالغة بالعدو
في حين اننا كنا بنتطحن ليل ونهار
الخلاصة

مش النظام الحالي هو المسؤل فقط عن الفساد الحالي

دي سلسلة ممتددة منذ عقود طويلة
دورنا بقى اننا نحاول نوعي الناس ازاي يصلحوا
ازاي نمد ايدينا للمحتاج
ازاي احسن من نفسي
ازاي ابقى نافع لغيري

مواطن صالح يعمل ويساعد المحتاجين
افضل من واحد ثورجي بيشتم في الحكومة ليل ونهار حتى ولو كانت فعلا فاسدة

الناس مطحونة
الناس محتاجة الناس
مش محتاجة الحكومة
الناس هيه اللي تقدر تحقق اللي تبغيه

ربنا عالم ان كلامي مش دفاع عن النظام
عشان محدش يعتبرني طابور خامس أو يقول
الكلام بتاع لينين ايام الحكم الشيوعي على اي حد يعارضه يبقى ضد الشيوعية وعلى المقصلة عِدل !!!

انا عاوز الناس تشوف حالها
مش كل حاجة نعلقها على فساد الحكومة
واحد اتخرج ومتعينش يفضل قاعد جنب امه ويسب ويلعن في الحكومة
طب ما تطلع تشتغل يا حمادة
واشقى واتعب وكافح عشان تلاقي
يقولك طب فين الحكومة ؟؟!!

انا ضد استستهال القاء عيوبنا وتقصيرنا على شماعة الحكومة

الناس تترفق ببعضها
الناس تحاول تحترم بعضها
عشان اللي فوق يحترمهم

ارجو ان كلامي يكون وصل وميكونش ضايق حد

والسلام عليكم ورحمة الله وبركاته

شــــمـس الديـن يقول...

و عليكم السلام و رحمة الله و بركاتة

لن اقول لك انك عميل او طابور خامس او اي شئ لست ممن يدخلون في نوايا الناس
و لست انا ايضا ممن يستقون معلوماتهم من التلفاز فليس له وقت عندي ايضا :)

و انا عمري ما كرهت الملك لانه بيشرب خمر .. ياريت القضية كانت قضية خمر و بس كنا قولنا انه سلوك شخصي و حسابه علي الله ... الكارثة انه كان فعلا فيه ضنك رهيب ...و لما الجنية زي ما حضرتت كنت بقتلو انه قوي ... بس كان كان واحد في الدولة معاهم الجنية ؟؟؟ كانت فيه ظاهرة اسمها ظاهرةالحفاء... و بجد الناس اللي كانت عايشة هي الناس اللي هندها فلوس و اولاد الذوات لكن الشعب كان في حالة ضنك بشع

نقطة الدفاع عن عبد الناصر تملي بقول نقيس الامر بصورة زمان و ليس الان بعد مرور هذا الوقت ... و كل واحد حر في احساسة عامة :)

لا ادافع عنه دفاع مطلق ... لكن طبيعي انه لكل انسان اخطاؤة و سوف يحاسبة الله عنها


لكن معتقدش ان كل الشعب كانوا مطبلاتية لما خرجوا في جنازة مهيبة يشهد عليها التاريخ ... لان الشعب كان حاسس بصدق هذا الانسان ايا كانت اخطاؤة ..و رغم ما حدث

عامة زي ما بقول لحضرتك ...البلد بتتباع دلوقتي و هترجع زي ايام ما قبل الثورة ( اللي معاه يلزمة و اللي معهوش ميلزموش ) ... لا تقلق و الاخطاء اللي حضرتك بتقول عليها هتتصلح عما قريب

السياسة ليست لعبة عاطفية و طبيعي ان يكون هناك الاعيب و مؤامرات تحاك سياسيا من ايام الفتنة الكبري ... ليس هذا بجديد عنها ... انهلمن السخف ان نتصور ان من يدخل في هذا المعترك تظل يدية خاليا تماما من الدماء هذا محال في بلادنا .... و لكل عهد ضحايا مثل نجيب و غيرة ... عادي يعني مش جديدة

و حضرتك المثال واضح ادامك .. لو بتتكلم عن الاغتصاب و التعذيب اعتقد ان العهد اللي احنا فيه فاق كل حدود عبد الناصر و السادات و الصور المنتشرة علي النت ابلغ دليل و الغاء دخول الاقسام بالمحمول ابو كاميرا ابلغ دليل

و الله الشباب مظلوم ... لو واحد او واحدة خريجي كلية من الكيات العملية ... ولا يجد عمل في مجال تخصصة و البلد تصرخ من قلة الاطباء في المستشفيات ... عايزة يروح يشتغل ايه يعني ؟؟؟

الوضائف اللي موجودة دلوقتي هي تليفونست في شركة محمول , او بائع في محل او اسيتانت في صيدلية ... هي دي الوظايف اللي من المفروض انها تفتح بيوت ؟؟؟

لما 42 مليار يتهرب و بعدهم 4 مليار يتهرب ... يبقي دي غلطة الناس بردوا ؟؟؟

ثم حضرتك بتقول نوعي الناس ؟؟؟ ناس مين اللي ممكن نوعيهم و اصلا مفيش تعليم محترم و طلبة الاعدادية مش بيعرفوا يقرؤا و اغلب الناس ثقافتهم جاية من التليفزيون اللي هو مفسد كل شئ ...

عامة هو كل انسان له وجة نظر و طريقة في الاصلاح مختلفة عن الاخرين .. المهم ان نصل في النهاية الي النتيجة و هي اصلاح ما استطعت " و ربنا يوفق الجميع في الاسلوب الذي يرونة مناسب "
و سنة الله هي الاختلاف لان مش كل الناس هتمشي بنفس الطريقة و نفس الاسلوب

كلام حضرتك وصلت ووجة نظرك واضحة و مرحبا بك دائما للنقاش
دمت في حفظ الله

سلام عليكم و رحمة الله

غير معرف يقول...

الفاضلة ربة السيف
اعتذر عن تأخري في الرد لظروف عملي الصعبة شويتين !!!

المهم

سبب ذكري لواقعة شرب الخمر لفاروق , إني أبين إننا مضحوك علينا تاريخيا
إن الثورة صورت لنا إن فاروق هو سبب كل بلائنا , عشان نبوس إيدينا وش وظهر إن ربنا منحنا الضباط الاحرار

اتفق مع حضرتك تماما في كون الجنيه لم يكن يتواجد مع أي حد
والنقطة دي موجودة في أي زمن على فكرة
حتى ايام عبد الناصر كان فيه ناس معاها وناس مش معاها

وفعلا الشعب كان فيه نسبة كبيرة جدا فقيرة ومازلت !!!

نقطة عبد الناصر والجنازة
ده وضع طبيعي لموت أي ديكتاتور ثوري خدع الناس

شوفي جنازة ستالين وجنازة ماو تسي يونج
الالاف مؤلفة وملايييييين في الجنازة
رغم انهم كانوا !!!!!!!

المثقفين في السجون , مطبلاتية الحزب الاشتراكي ليل نهار بيمدحوا في الحاكم ( نفس الوضع الحالي )

اسرائيل عمالة تدك فينا والراديو بيقول اننا علمناهم الادب !!!

محدش يقدر يقول لعبد الناصر غلط يا ريس
محدش بيعارضه

اتحداكي وااتحدى اي حد يجيب ورقة لأي جريدة قالت لعبد الناصر كلمة معارضة

الوضع الطبيعي ان الناس هتقوم وتنام على صورة الزعيم الملهم

الشعب المصري شعب اجتماعي بياكل ويشرب وشكرا
اللي يأكله يبقى حبيبه واللي يجي جنب قوته يلعن فيه

لو الريس بكرة قال 5 ك دقيق لكل مواطن هدية , شوفي الناس اللي بتعارضه هتقول عنه ايه
رغم الفساد البشع اللي احنا فيه

انا مش بيهمني لا عبد الناصر ولا مبارك , اللي يهمني الشعب

الشعب عنده أمية دينية وسياسية وأخلاقية !!!

الأمية دي ممتدة من قروون طويلة
عشان كده مضحوك عليه دايما
اللي يأكله يبقى حبيبه بصرف النظر عن أي أخطاء أخرى

الحل عند الناس مش عند الحكومة
اليابان التجار مرة رفعوا سعر السمك , وطبعا السمك في اليابان زي الفول عندنا !!!

الناس راحت اضربت عن السمك
تجار السمك اتخرب بيتهم , وغصب عنهم نزلوا الاسعار

بدون تدخل الحكومة وبدون دعم

اللي عاوز اقوله
بلاش نعتمد ع الحكومة لانها يا اما عقيمة يا أما فاسدة
والاتنين مش هيأكلونا عيش

نقطة ان البلد بتتباع
ومين قال لحضرتك ان البلد مش متباعة من زمااااااان

الفرق بس اختلاف المشتريين
زمان كان صعب تعرفي مين المشتري , لانك لو سألتي بالليل ع الساعة 3 الفجر هتلاقي زوار الفجر مشرفين , وعلى حمزة البسيوني عِدل

دلوقتي بقيتي عارفة ان المشتري هو أحمد عز أو الشاذلي أو جيمي

صدقيني اختلاف مشتريين فقط , لكن فكرة بيع البلد دي موجودة من زمااان ومن قبل الإنقلاب العسكري كمان

نقطة لعبة السياسة
اتفق مع حضرتك تماما فيها
لكن كده يبقى مجبناش جديد
طلعنا من حرامي وقعنا في نصاب!!!

طلعنا من الملكية , دخلنا في الاستبدادية الجمهورية !!!

ازاي اتعاقب بدون ذنب , لمجرد اني بقول رايك يخالفك

ازاي صوتي يتكمم لمجرد انك لغيت الوسية , وحولت البلد كلها لكيان شيوعي يخدم أهدافك

وتديني وجبة غذائية مجانية !!!

نقطة التعيب وخلافه , فالحمد لله انا مدخلتش السجون زمان والسجون حاليا عشان احكم أيهم فاق كل التصورات

الفكرة كلها يا فاضلة اختلاف مساحة الحرية

لازم نعترف ان فيه حاليا مساحة حرية ولو كانت بسيطة عن العهود السابقة

مساحة حرية , خليتك تكتبي وتعارضي وانتي مش خايفة ان حد يسجنك في المعتقل

بعبارة اخرى

لو حضرتك عارفة انك بعد ما هتكتبي البوست ده , هيتقبض عليكي وهتاخدي بتاع 15 سنة في المعتقل
ومحدش هيسأل عنك , كنتي هتكتبي البوست ده ؟؟؟؟

السؤال ده بطرحه لكل واحد بيشكك في الحرية البسيطة الموجودة حاليا

الحرية دي حقنا غصب عنهم طبعا . لكن بضايق جدا من اللي يشتم في الريس علنا ويقولك مفيش حرية !!!
اومال شتيمتك دي ايه ؟؟

بالنسبة للموبايل ابو كاميرا , فبصراحة ناس كتيرة بتدخل بيه الاقسام ومفيش اي مشكلة

نقطة الشباب والعمل
والله يا اختي انا نفسي اتعين واشتغل بشهادتي واحس بقيمة علمي
لكن لو ملقتش شغل بشهادتي اعمل ايه ؟؟؟؟

افضل اقشر بصل جنب الحاجة في البيت ؟؟؟
ولا افضل ادعي على الحكومة وألعن فيها
ولا أنزل أشتغل شغل شريف , وأكون نفسي بنفسي

انا مش بقول اننا نشتغل في مجال غير دراستنا
لكن لو الحال كده , هعمل ايه

لازم انزل اشتغل , واعرف قيمة القرش

امريكا مثلا , التعليم مش مجاني , عشان كده تلاقي العيل من صغره شغال عشان يدرس
والمجتمع بيحترم العامل بصفة عامة
هنا احنا بنحترم العمل وليس العامل
الوزير يبقى حبيبنا , فراش او ساعي يبقى منبوذ ومطرود من حسابتنا ونقوله جتكم القرف مليتم البلد !!!

برا يا اختي الميكانيكي يقدر يتجوز دكتورة او مدرسة طالما انه شغال
حاليا السباك والميكانيكي يقدر يتجوز الدكتورة عشان اشتراها بفلوسه , مش عشان هي بتحترم قيمة العامل !!!

النظرة الاجتماعية عندنا فيها قصور جداااااااااا
عشان كده الشاب ينكسف يشتغل مهن بنقول عليها مش من مقامه

لان صحابه هيتكلموا عليه , او جارهم هيشوفه كده هيسخر منه

الحكومة متقدرش تعين كل الخريجين , وده حال اي حكومة في العالم

يبقى الحل ايه ؟؟؟؟

اللي عاوز اوصله يا دكتورة
اننا نشوف حالنا
نصنع نفسنا

الحاج محمود العربي بدأ عامل في محل بقالة وتعليمه لم يتخطى الكتاب وشوفي بقى ايه حاليا

ونماذج كتيررررررررررررررررررة جدا بالشكل ده

ليه ؟؟؟
لأنه شاف حاله

انا عاوز أوصل , يبقى لازم اتعب
حتى ولو مش هشتغل بتخصصي
مش مهم
المهم اني أوصل بطرق مشروعة
وأجتهد , وكل يوم يكون أفضل من اللي قبله

الشاب عندنا هنا أغلبه بيبتدي يشتغل اول ما يتخرج

على العكس من برا
الشاب بيشتغل وهو في مراحل تعليمه الأساسية

نقطة الشعب
مين قال لحضرتك ان الشعب ميقدرش يؤثر في البلد

ممكن حضرتك تتطالعي الأخبار الغربية
تلاقي المطرب المشهور لم ملايييييين كتبرعات لمرضى الايدز

ومايكل جورودن لم كام مليون عشان السرطان

ومش عارف مين عشان الاطفال

المنظمات الاهلية والاجتماعية عندهم شغالة صح

وكله بيسند كله
بصرف النظر عن الحكومة فاسدة ولا لأ
اللي يهمني اني اساعد المواطن اللي زيي
وبعدين ابقى احاسب الحكومة

نقطة توعية الناس
صدقيني اللي مرتبه مش بيكفيه لحد يوم 5 في الشهر مش محتاج دبلومة ولا دكتوراة عشان يعرف ان الحالة الاقتصادية زي الزفت

ما قصتده بالتوعية
ان الناس تفهم ان الثيران كلها هتتاكل لو كل واحد قال نفسي ثم نفسي ثم نفسي ثم اي حد تاني !!!

انهم يأثروا على أنفسهم ولو كان بهم خصاصة

انهم لو ركبوا مواصلة والسواق اتعوج عليهم ونزلوا كلهم مرة واحدة من العربية , الميكروباصنجي ( سواق عربية السلمون !!! )
هيحترم نفسه غصب عنه لانه هيفضل عاطل طول اليوم

انهم لو وقفوا بنظام في أي مصلحة من غير ما حد يتفزلك ولا يعمل فيها مفتح ويخش على الشباك عِدل ويتجاهل الطابور , مصالحهم هتنقضي

لو ياميش رمضان ولع
وبقوا يفطروا على الميه بس , أباطرة الياميش هيتخرب بيت أبوهم دون تدخل الاجهزة الرقابية والامن الغذائي وخلافه من الحاجات دي

ولو ولو ولو ........

ده اللي قصدته من التوعية

كلام حضرتك صح جدا واتفق معكِ في حجم الفساد الضخم الموجود

بكرر شكري واتمناني على تلك الوجبة الساسية والنزالية الدسمة

وبرفع القبعة تقديرا للربط الرائع , وللحوار الطيب

" الشامخ "

شــــمـس الديـن يقول...

السلام عليكم و رحمة الله و بركاتة

الفاضل "الشامخ"

حسناً
تدعيما لمبدئي الدائم في ان الاخلاف حق الجميع و انه في اي مناقشة بنائة من حق كل طرف ان يعرض وجة نظرة و ان لم يقتنع الطرف الاخر فهذا ليست مشكلة ...و اعتقد ان الكلام عن اشخاص مضو سواء عبد الناصر ام السادات ام حتي الملك ذات نفسة لن يقدم و لن يؤخر من الامر شئ ...لانهم الان اصبحوا بين ايد الله و سوف يحاسبون علي يد العادل

اما ما يعنينا حقا هي النتيجة التي ال اليها حالنا الان - ايا كانت الاسباب - هي نتيجة تحزن الجميع

في اي نقاش صحي حتي و ان لم اقتنع بوجة النظر المقابلة فمن الافضل ان نركز علي النقاط المشكرة و اعتقد لا يختلف عليها اثنين

حضرتك ركزت علي نقطة هامة جدا و هي توعية الشعب ... طيب انت بتقول ان مبدأ - الثورة الشعبية - هو الحل لما الناس تتعلم تكون ايجابية ... لكن و للاسف نوعية الناس نفسها اصبحت رديئة ...
تنقصها اخلاق او تدين او اي شئ و لكنهم سلبيين ... و اتذكر موقف حدث معي و صديقتي ان الصبي الجاهل غلي علينا الاجرة ربع جنية في مشوار يمكن ان يؤخذ مشي ما كان منا الا و صديقتي الا ان نزلنا و و ما فعلها ايا من الرجال الذين كانوا في السيارة !!!!


الناس بتستسهل و فاكرة ان الربع جنية مش مشكلة المهم انها توصل ...رغم ان انا ممكن اركب تاكسي و ادفع له 2 جنية بس بمذاجي ... مش يكون ملوي دراعي او مضحوك عليا ... اتدري اخي الكريم بعدما نزلت قولت لها ... لن ينصلح حالنا الا اذا كنا جميعا علي قلب رجل واحد و نزلنا جميعا من السيارة لكن طول ما احنا بالسلبية دي عمر ما حالنا هينصلح ...

و تذكرت الايه الكريمة التي قيلت " و ياله القدر " في شعب مصر حين قال الله عليهم " فاستخف قومة فاطاعوة انهم كانوا قوما فاسقين " اي ان العيب ليس علي الحاكم وحدة و لكن علي من يرضون بالظلم ...

انت تقول ان الجميع يعلم ان الامر اصبح لا يطاق ...و لكن هل فكر الموظف البسيط في اليه لتمرد علي الظلم ؟؟؟ للاسف نوعية الناس عندنا ليست لتقول للظم لأ ...و لكن يستسلمون و يعيشون تحت مبدأ من خاف سلم ...

انا عن موضوع الحرية .. فانا لا انكر ان هناك مساحة من الحرية ...و لكنهم يتعاملون معنا بمنطلق " القافلة تعوي و الكلاب تسير " يعني يا فرحتي بحرية لا تأثير لها ...

عامة شعاري دائما الاخلاف صحي جدا و من سنن الكون حتي تستقيم الحياة و كالما نتعايش برقي فلا مشكلة ابدا

ربنا يكون في عونك اخي الفاضل الكريم في الشغل كل الشباب الجاد طالع عينة :)... و نورت المدونة و مرحبا بك اخي الفاضل في اي وقت :)

دمت في حفظ الله دائما و رعايتة

غير معرف يقول...

وعليكم السلام ورحمة الله وبركاته

جزاكم الله خيرا على الرد الطيب

**************

الكلام عن أشخاص ماتوا نكاية فيهم ولمجرد السب والشتم فقط هو أمر معيب طبعا

لكن عشان نبحث أصل المشكلة عشان نقدر نحلها اعتقد انه أمر صحي

زي ما علمونا زمان ان أول خطوة في تحقيق النتيجة المرجوة هو " تحديد المشكلة "

نقطة الثورة الشعبية
أنا أقصد ثورة شعبية من الشعب على الشعب لصالح الشعب !!!

أقصد إننا عمرنا ما فكرنا نغير نفسنا , كل تفكيرنا كان تغيير الغير

يعني اي مصيبة بنرميها على حد تاني
ودي للأسف سمة موجودة فينا كما أعتقد ذلك

أنا مش عاوز ثورة من الشعب ضد حاكم أو مسؤل , لأنها حتى ولو غيرت شئ , التغيير هيكون نسبي وأثره محدود
تغيير الفرد محدود , وتغيير المجموع مهول

الناس لما هتتغير , التغيير هيكون واسع المدى وأثره هيمتد لأجيال كتيرة جدا

الاية الكريمة اللي حضرتك أورديها عن فرعون

" فإستخف قومه فأطاعوه "

للأسف كتير بياخدوا الاية دي من وجهة نظر واحدة , وهي إن الشعب كان ساكت على الظلم , فعشان كده فرعون عمل اللي هوه عاوزه فيهم

وان طالما الشعب ساكت على الظلم الصادر من الحاكم , فهو يستهال اللي يحصل له

ومش بيكلموا باقي الاية اللي بتقول
" إنهم كانوا قوما فاسقين

يعني الناس هي الاصل في اللي حصل
الاغلبية هي اللي كانت فاسدة وهي اللي كان عندها قابلية للشرك , فلما فرعون دعاها للشرك بالله لم تعارض

والقلة القليلة هي التي آمنت بموسى عليه السلام

الشعب اللي تحسي معاه بقلة تربية " زي ما حضرتك وضحتي في بوست سابق "
هو اللي محتاج هيكلة دينية وأخلاقية وثقافية

الشعب هو الجذر , والحاكم هو الفرع
هل ينفع نقوم الفرع دون أن نقوم الجذر ؟؟؟

التغيير لازم يبدأ من تحت , اللي بيبني بيت بيصب الأول أساس " الشعب " وبعدين بيرتفع بالأدوار " الحاكم "

موقف حضرتك مع السواق , موقف صحي , وإن كنت للأسف مش بنفذه لما بكون متأخر على شغلي مثلا !!
أو عندي موعد هام

لكن لو بصينا بشكل عام هنلاقي الناس بتستسهل الانقياد للواقع
الناس مش عاوزة تغير حاجة
عاوزيين اللي يغير ليهم
ده اللي إكتشفته متأخر أوي

نقطة الحرية
فطبعا هم ماشيين معانا بمبدأ قول اللي نفسك , وأنا هعمل اللي في نفسي , وأعلى ما في خيلكم أركبوه ( أيقونة واحدة بيبتسم إبتسامة صفرا

)

لكن يا أستاذة تغيير تفكير الناس مش بين يوم وليلة
النهاردة هنتكلم بس
بكرة المجموع يفهم
على الاقل نبقى فاهمين الدنيا ماشية ازاي , ونوصل فكرنا للأجيال الجاية وبالتدريج هيحدث التغيير إن شاء الله

المهم نركز في تغيير الناس نحو الأفضل
نغير نفسنا
ونحاول نربي الشعب من جديد

صدقيني ساعتها التغيير هيحدث دون أي صعوبة , لأن المجتمع هيضم الصفوة , وللصفوة فقط

يمكن أنا حالم شوية أو شويتين
لكن التغيير البطئ على أسس
أفضل من الإصلاح الوقتي اللي سرعان ما يزول , ونرتد لأسؤا ما كان عليه

أنا اتكلمت كتير اوي وصدعت دماغ حضرتك ( إبتسامة واحد خجلان وخدوده لونها برتقالي )

لكن النقاش فتح نفسي
جزاكم الله خيرا على سعة الأفق
وإن شاء الله نشوف حضرتك من أفضل المصلحين

وبعتذر عن أي ضيق سببه لحضرتك كلامي أو نقاشي

خالص الود والتقدير

" الشامخ "

شــــمـس الديـن يقول...

الفاضل الكريم الشامخ

عذرا علي تأخري علي الرد علي حضرتك

لكني اعتقد ان لكل وجة نظرة المختلفة عن الاخر ...

لست انا خطأ و لست انت صواب و لكن لكل قناعاتة التي لن تتغير ... و مع ذلك يمكننا التعايش سويا اهم شئ هو احترام الاخر و تقبلة و تقبل امكانيةالتعايش معة دون ان نغضب من عدم امكانياتنا تغييرة

ردودك و مناقشاتك ممتعة حقا و لها مذاق لن يتكرر ... :)

اتمني لك التوفيق في كل ما تفعلة في حياتك

خالص الود و التحية و الاحترام

غير معرف يقول...

بتقولي خيالك ليس خصب

هو فعلا في التدونة دي مش خصب لأنك قولتي اللي حصل وبيحصل وحيحصل فعلا

بجد ومن خبرتي بسوق العقارات كلامك دا هو اللي بيحصل

للأسف...

أعتقد دي من أحسن تدويناتك

أحمد أبو خليل يقول...

قليلة هي عدد المرات التي استطعت أن أواجه سائق الميكروباص وأن أنزله على رأيي - وإن كان رأيي هذا إني أنزل ! - والأقل أيضا أن أستطيع إحداث حالة عامة في الميكروباص ضده ، ولكن بما أن هذا حدث مرة أو مرتين فهو ممكن

أما الوسية فلا أعتقد أن هذه الفترة من الممكن أن تتجلى ثانية ، لسبب واحد وهو الوعي الإعلامي ، الذي نلنا منه نصيبا في الفترة الأخيرة

والدليل على هذا موضوع الاعتصامات المتتالية والمتتابعة في كل هيئات الدولة هذه الأيام
لأن الحكاية بكل بساطة أن أناسا جربوه وأخذو حقوقهم ، وتم توصيل هذا للحدث للناس خارج الأبواق الحكومية بشكل جيد ، مما دفع كل عمال وموظفي البلد إلى غقتناعهم بهذا السلاح الخطير ، الذي لم تستطع أي حركة أو تيار سياسي أن يقنعهم بها في كل الفترات السابقة

أطلت عليك .. هي فعلا تدوينة مهمة وتحتاج إلى أكث من ذلك

بورك سيفك .. جَمُل قلمك