الثلاثاء، فبراير 12، 2008

مصر ... كم التناقضات البشع

السلام عليكم و رحمة الله و بركاتة


الفترة الماضية مرت مصر بكثير من المواقف و الاحداث ...



معرض الكتاب




هذا العام ذهبت اليه عدة مرات لان العام الماضي كنت قد اتفقت مع عدة شلل اصدقاء و فوجئت انهم جميعا ذهبوا دون اخباري ولم اذهب اليه ... فكان هذا العام انتقام . اشتريت عدة كتب قرأت من ضمنها كتب ابراهيم الفقي للتنمية البشرية و رغم ان ابي كان يحدثني بهذه الطريقة منذ مرتة الا ان تجميعها في كتاب و عرض الافكار بشكل مختلف و تقديم نماذج حية لهذه التجارب الناجحة افادني كثيرا حقاً ... اشتريت حوالي 13 كتاب كان من اهمها في رأيي كتاب الاسلام بين الشرق و الغرب من سور الازبكية للزعيم البوسني " علي عزت بجوفيتش " رحمة الله عليه ... ربنا ييسر و اقرأ كل الكتب اللي اشتاريتها ... و بجد اتبسطت اوي لما شوفت المدونات غادة و رحاب و غادة اللي نزلوا كتبهم في المعرض لما شوفتهم و استضافتهم مني الشاذلي في العاشرة مساء يوم الاثنين 11- 2



رغم انهم مش يعرفوني معرفة شخصية الا اني فعلا مبسوطة و فرحانه بيهم اوي اوي اوي و يا رب النجاح يتكرر ... احلي شئ في تجربتهم بجد انهم مش مزقزقين من حد و قمة في الطبيعية و عدم التكلف و التصنع



اه لو كل الشباب في كل المجالات ياخد فرصتة مصر دي هتبقي احسن بلد بجد بس منهم لله اللي كانوا السبب






************************************************************************************





اما بقي الخبر او الحدث الذي استحوذ علي اغلب اهتمام الناس هو فوز مصر ببطولة كأس الامم الافريقية


طبعا انا كمواطنة مصرية فرحت بالبطولة لما كسبناها ... لكن الفرح المعقول اللي مش يدي الامر اكبر من حجمة





لكن ما حدث بجد استرعي انتباهي للتأمل بشدة و جعلني افكر بعمق فيما حدث




الفرحة الغير طبيعية للناس بالفوز لدرجة ان جميع الشوارع الرئيسية في مصر اغلقت تماما من انطلاق الناس و فرحتهم الحقيقية بالفوز ... دا بيدل ان الناس فعلا عندهم انتماء و لكن يصبون انتمائهم في مكان غير صحيح و لابد ان يتم توظيفة جيداً ليضع الناس شحنتهم الانتمائية في المكان الصحيح و ليس مجرد مبارة للكرة . و يتركون الاهم شأنا في رايي



موقف مصر الاناني جدا ... فحقا نحن ضربنا مثل سخيف للانانية المطلقة ... يعني عندما تأملت الفضائيات وجدت ان هناك تشجيع حقيقي لنا و اهتمام حقيقي بالبطولة من الاخوة و الاشقاء العرب ... و حماسهم و فرحتهم بنا ... حتي في شوارع غزة - و التي صرح وزير خارجيتنا قبل ذلك انه سوف يكسر رجل اي شخص فلسطيني يعبر الحدود - وجدتهم ينزلون في شوارعهم يلعبوا عن فرحتهم الحقيقية بنا .



و تأملت موقف مصر بالتباعية من الشقيقة الاسيرة العراق - عندما حصدت بطولة كأس الامم الاسياوية و هو انجاز حقيقي بكل المقاييس - لم نجد ادني اهتمام يذكر و ادني دعم معنوي من الاشارة لهذا الانجاز الحقيقي اعلامياً و كان اي دولة عربية يتم احتلالها , ننبذها اجتماعيا و تصبح مساندتنا اليها عار يجب ان نتبرأ منه او نفعلة علي استحياء !!!!


التجاهل الاعلامي المتعمد للانسان الخلوق " محمد ابو تريكة " غير يؤكد نظريتي في التبرؤء من كل من يساند اشقائنا المنكوبين .... و اعتقد انه فعلا انسان علي خلق و مثال جميل للشباب يحتذي .. و حقا هذه هي المرة الاولي اتي اعجب اعجابا صادقا بانسان من الوسط الرياضي ( لتواضعة و ادبه الجم وحياؤة و اخلاصة و اتقانه في مجال عمله و لانه لا يحب الاضواء و الاستعراض و الشهره رغم ان موقعة يؤهله لذلك و لان انشغالة بالتمرين لا يجعلة معزولاً عن الاحداث العالمية ) لاني كنت اعتقد ان الفنانين و الرياضيين ليسوا امثلة جيدة من الناحية الخلقية نستطيع ان نتخذها قدوة او مثل يحتذي به ... فجاء ابو تريكة ليكسر هذه القاعدة - و اكتر شئ عجبني بصراحة ان يوم ميلادة نفس يوم ميلادي و لكن مع اختلاف سنة الميلاد طبعا :)) ز





***********************************************************************************


لا استطيع ان اكتم حزني و انا انعي الفقيد " مجدي مهنا " رحمة الله عليه , و تغمدة الله في فسيح جناته و جعل صبرة علي المرض في ميزان حسناته ... فلقد كان رجلاً حقاً في زمن كثر فيه اشباه الرجال .


هناك 20 تعليقًا:

أبوشنب يقول...

هيا دي مصر

مصر عاملة زي طاجن اليخني

من كل حاجة شوية

وشكله من بعيد ملخبط

بس طعمة ملوش حل

شمر اديك ولا يهمك

غير معرف يقول...
أزال أحد مشرفي المدونة هذا التعليق.
Maha يقول...

:D

أنا اللى فوق دي على طول .. بس حبيت أنكشك :D

عاجباني القوانين بتاعه الرد :D .. فعلا اللى ميطبقهاش بيطلع الرد سخيف جدا

المهم ...

أتفق معاك في التدوينة .. بفرحتك بالمدونات الثلاثة وباحترامك لأبو تريكة .. أنا كمان أول مرة ألاقي مشهور يصلح كقدوة فعلا .. نحسبه على خير ولا نزكي على الله أحدا

***

والبقاء لله .. إنا لله وإنا إليه راجعون

الطائر الحزين يقول...

جزاك الله خيرا

الانسان نفسه ملىء بالمتناقضات

فما بالك اذا كبر حيز الدائرة

تحياتى

عبدالرحمن ياسين يقول...

السلام عليكم
عموما ربنا يوفقك لقراءة الكتب

وألف مبروك لمصر بالفوز ولأبو تريكة
فعلا ...وهذا الكلام قد قلته في مدونة أخرى :أبو تريكة لم يكن يلعب .ليس للفوز فقط ...لكن أيضا....لكي يحيي القضية الفلسطينية في نفوس الناس مستغلا حب الناس له

رجل خلوق كما قلتي





واللهم إرحم فقيدنا "مجدي مهنا "
واغفر له ذنوبه يا رب العالمين



تحياتي لكي

ma_3alina يقول...

في موضوع فوز مصر بكأس افريقيا .. دا رابط لمقال بيحاول كاتبه يضع تفسير للمبالغة في الاحتفال ..

http://www.islamonline.net/servlet/Satellite?c=ArticleA_C&cid=1201957750000&pagename=Zone-Arabic-AdamEve%2FAEALayout

وضـّاح يقول...

ربما جمع هذه التناقضات في مكان واحد .. يثير تساؤلات عدة ..

كتبت في هذا المعنى اليوم على مدونتي

Wild at Heart يقول...

يا بنتي طظ في الإعلام،لأنه غالبا مش بيعبر عن أفكار ومشاعر الناس اللهم إلا العاشرة مساء عيني عليه باردة، كفاية إنك تشوفي كمية الناس اللي بتحب أبو تريكة للأسباب اللى قولتيها بالظبط
تحياتي

ابن حـجـر الـعـسـقـلانـى يقول...

الناس فى مصر حياتها بقى فيها كم احباطات ضخم ... و الناس دى بتتلكك عشان تفرح .. و أهى الفرصة جات لهم لحد عندهم .. خصوصا هذا الخليط الجميل و الجذاب من "كرة القدم" و "تدين اللاعبين الواضح" و "قعدات القهاوى" اللى اتفرضت على الناس اللى ماعندهاش اشتراك الإيه آر تى

الناس انفجرت فى الفرحة

و أعتقد إن اهتمام أهل فلسطين و العراق و غيرهم من العرب بتشجيع منتخب مصر دة يدل على أهمية مصر فى وجدان الشعوب العربية .. و يدل على دور مصر اللى المفروض تهم و تقوم بيه كما يجب

و ألف مبروك لينا جميعا

طائر الحرية يقول...

ربنا يرحمه ويرحمنا من اللى احنا فيه

يا مراكبي يقول...

أعمل في إطار فريق من خيرة المهندسين المصريين ونحتك كثيرا بالعديد من الجنسيات المختلفة بحكم تواجدنا خارج مصر

دائما أستمع لهذه العبارة: حينما نرى الأداء الراقي الذي تقومون به في عملكم .. نتعجب من أن بلادكم ليست على هذا المستوى .. رغم أنه يوجد من أمثالكم الكثيرون

هذه هي مصر .. أكثر البلاد تناقضا على الإطلاق .. ولا توجد فيها قاعدة نستطيع أن نحكم بها على أمورنا أبدا

shabfa2re يقول...

(اه لو كل الشباب في كل المجالات ياخد فرصتة مصر دي هتبقي احسن بلد بجد بس منهم لله اللي كانوا السبب)
يااااااااااااااااااارب
نحقق احلامنا
انا بعشق الكتابة
ونفسى ما ابطلش اكتب ابداً

son's egypt يقول...

السلام عليكم
فعلا لو كل واحد اخد الفرصة ممكن نحقق حاجات حلوةكتير
وفعلا ابوتريكة كسر كل القواعد اللي كانت معروفه عن الوسط الرياضي مجرد شهرة وفلوس
لكن باخلاقو وحيائه وايمانه بقضايا وطنه جعله معشوق كل العرب

شــــمـس الديـن يقول...

السلام عليكم و رحمة الله و بركاتة

الفاضل الكريم ابو شنب

يخني !
هوايه اليخني دا بقي ؟؟؟

:))

طيب ربنا يهنيك مقدما
بس اععتقد ان مصر بتبئ بكارثة قريبا ربنا يستر

***********************************


الفاضلة الكريمة مها ....
بقي بتقوليها في وشي
قوانين الرد سخيفة !!!!!!!!!

طيب يا مها
ربنا يوفق ابو تريكة بجد و يكتر من امثالة

عقبال ما تطلعي كدا يا مها في العاشرة مساء تنوريها :))

خالص التحية

***********************************
الفاضل الكريم الطائر الحزين

فعلا
الانسان نفسة مليئ بالمتناقضات

خالص التحية لمرورك الكريم

***********************************
الفاضل الكريم عبد الرحمن ياسين

عليكم السلام و رحمة الله و بركاتة

اديني اهه شغالة
قرأت كتابي ابراهيم الفقي و رواية حتي لا تموت الروح و كتاب ارز بلبن لشخصين و ضاع كتاب هذه رقصتي انا للمدونة الزميلة و الله ماعارفة راح فين !!!!

عامة باقي دستة ان شاء الله و يخلصوا

ابو تريكة ملولد في يوم ميلادي :))

و ربنا يرحم الجميع

خالص التحية
************************************
الفاضل الكريم باشمهندش ما علينا ( و الله بطلخبط بينك و بين مرام )

كويس التحليل بس عامة دا يثبت ان فيه فشل و حالة خواء حاصلة منقطعة النظير

خالص التحية

***********************************

الفاضل الكريم وضاح

لم اعرف ما هي المقالة المقصودة

بس هي دي مصر ...لها عبقها المميز

خالص التحية

***********************************

الفاضلة الكريمة wild at the heart

اكيد
غير انه عمرة ما عبر دا معمول لافساد الذوق العام بشكل منقطع النظير !!!!
و دا بيثبت انه لا يصح الا الصحيح في النهاية

خالص التحية لمرورك الكريم

***********************************

الفاضل الكريم ابن حجر العسقلاني

انت هتقول لي
و الله انت عارف ان اغلب صديقاتي بقوا بيروحوا لدكاترة نفسيين و اتنين منهم دخوا في ادوية شديدة و مش مؤثرة معاهم و كل واحدة عندها مأساه بجد مش دلع ؟؟؟

حلو رصد التجميعة دي ... انا مش ضد الفرح بس كل شئ بالمعقول ... مش توصل للمسحرة بتاعة الستات اللي ملهومش رجالة و سيابينهم يرقصوا في الشوارع !!!!!!!!!!1 فين احنا هنا ؟؟؟

فعلا معك حق في اهمية مصر

بس ياريت مصر تلعب الدور المنوطة بيه و بلاش استهبال كفايا بقي

الله يبارك فيك
عقبال المجالات الاخري

************************************
الفاضل الكريم طائر الحرية

ربنا يرحم الجميع و يا رب منوصلش لمرحلة اننا نغبط الاموات علي موتهم

امين

***********************************

الفاضل الكريم باشمهندس احمد القاضي

ماشاء الله

و الله بتبسط اوي لما بسمع ان الخبرات المصرية مازالت تحتل مركز متقدم

و ناس كتيرة بتقول ان المشكلة عندنا ازمة ادارة لكن لا تنقصنا اي شئ البته

و فعلا مصر اكثر شئ متناقض علي الاطلاق
خالص التحية و نورت المدونة بجد
:)

***********************************


الفاضل الكريم شاف فقري

اول مرة تعلق عندي
سعدت بمرورك

انت نوعية كتاباتك متميزة بس ياريت تكتر الكوميديا الهادفة
و مش تسيب الكتابة حتي لو فضلت علي المدونة

خالص التحية

***********************************
الفاضل الكريم son's egypt

فعلا
اكتر شئ بتتميز بيه بلدنا المواهب و الموارد البشرية و اكتر شئ مش مستغليينه هي بردوا الموارد البشرية

ياريت كلنا نحاول نقلدة

خالص التحية

***********************************

اشكركم جميعا اخوتي الافاضل علي التعقيبات المثمرة ... خالص التحية

بني آدم يقول...

احنا في مصر حاسين اننا اهم تاس في الدنيا ولازم كله يتكلم عننا احنا وبس لا عراق ولا يحزنون


دا حتى لما بيبقى فيه خبر عن قمة بين رئيس أمريكا ورئيس فرنسا عن اسرائيل بيبقى أول خبر في الصحف المصرية
"و قد أشاد الجانبين بدور مصر التاريخي في المنطقة"

يعني احنا عندنا عقدة عظمة

Maha يقول...

يا بنتي أنا مأخدتش بالي إن الرد طلع ملخبط كده .. أنا بمدح قوانين الرد .. بقول إن الزائر لو مطبقهاش حيطلع الرد سخيف .. بعبارة أخرى اللى حيطبقها حيكون رده ممتاز إن شاء الله :D

بصي حاولي تنسخي جملتي وتحطيها في برنامج وورد أو نوت باد وحتتقري صح إن شاء الله :)

Maha يقول...

أطلع في العاشرة مساء :D

فكرة برضة :D

عشان أخلي المشاهدين يتسرعوا :D

هههههههههههه

ونخلص من الشعب المصري بضربة واحده :D

(معلش أصلي طالعة من مود اكتئاب على مود تهييس :D)

دنــــيــــــا مـحـيـرانـي يقول...

كل الاحاجات الاي قولتيها بتاكد شيء واحد انك اكيد في مصر
بلد التناقضات و الاغراب
نقاط محدده و مختصره بتقول مصر فيها ايه دلوقتي
تحياتي لك يا شموسه

من القلب يقول...

فعلا عندك حق فى كم التناقضات يمكن اكتر كمان مما قلتى
بس التناقضات دى بتحسسنى بشعاع امل
البلد دى نفسها تتصلح بس تلاقى الفرصه

اتفق معكى ايضا فى كلامك عن اللاعب المتميز ذو الخلق ابو تريكه
كنت اشعر وابو تريكه يلعب بانه يدعو الشباب لايلعب من اجل فوز وكاس فقط
شكر لك ابو تريكه



والبقاء لله فى الكاتب المحترم
مجدى مهنا

شــــمـس الديـن يقول...

الفاضل الكريم بني ادم

فعلا معك حق تماما
احنا عندنا الانا عالية اوي اوي اوي و دا من ضمن اسباب ضياعنا

جنون العظمة و انت الصادق

خالص التحية
***********************************

الفاضلة الكريمة مها

ولا يهمك يا سيتي ... و ربنا يكرمك و الله
و فاهمة ان الفورمات بتاع الفيس بوك بيقلب الكلام
و ربنا يفك عنك ضيقك دائما يا رب

خالص التحية للمرور العطر

***********************************

العزيزةو الغالية دنيا

فعلا مصر متناقضة اوي اوي اوي
لانها كتيرة وواسعة اوي فعلا خالص

منورة تملي المدونة و اعذريني علي غيبتي

***********************************

الفاضل الكريم من القلب

فعلا
بس الفرصة مش هتيجي لوحدها لازم ناس تدفع التمن بتاع التغيير و كل الناس عايزة تبقي سليمة و في بيوتها

بارك الله لابو تريكة و رزقة الرزق الحسن و بارك له في اعمالة و اولادة
خير قدوة و الله

***********************************

خالص التحية للجميع :)