الخميس، نوفمبر 22، 2007

تنبيه هام ... التدوينة دي خنيقة و منصحش حد يقراها

السلام عليكم و رحمة الله و بركاتة
التدوينة دي انا عارفة انها خام الكئابة ... و زمان كان اصدقائي بيقولوا لي اني بعرف احمس كويس اوي , فللاسف لما ببقي محبطة الكئابة بتبقي للركب
و انا عارفة ان الكئابة و الاحباط مرض معدي و تملي كنت ببعد عن مثيري الاحباط علشان حياتي متتلوثش , فعلشان كدا مشنصحش حد يقرا التدوينة دي لانها شخصية بصفة خاصة و انا بكتب علشان افرج عن نفسي ليس الا .....
ايه اللي حصل بقي لدا كله ؟؟؟
المشكلة اني ارتطمت و بقسوة شديدة بالواقع المصري البشع ... اه كنت عارفة و انا في الكلية ان الدنيا برا وحشة و صعبة و لكني لم اتخيلها بهذه القسوة ... ما يزيد المي و حزني انني - و للاسف الشديد امتلك عقل يفكر طوال الوقت و نفس تشعر دائماً - يعني زي ما اتقال ذو العقل يشقي في النعيم بعقلة و اخا الجهالة في الشقاوة ينعم ...
الحكاية و ما فيها اني بعاني مشكلة مصر كلها في الشغل دلوقي ... هل اللي بطلبة شئ من الترف ؟؟؟ ولا هو علشان عايزة اعيش بادميتي ابقي بتمني ترف و رفاهية ليست من حقي ؟؟؟
انا كل اللي طالباه - و هو من حقي يعني محدش هيتفضل بيه عليا - اني اشتغل في وظيفة اشتغل فيها بحق ربنا ( يعني مش اقعد علي مكتب لا افعل شئ لانه كلما اقول لحد هذا الكلام بضحك ) و اشتغل في مواعيد ادمية ( 8 ساعات من 8- 4 او من 9- 5 ) طبعا انا متنازلة عن الساعتين اللي هينضافوا للشغل في المواصلات بس مش مهم .... و اني اخد مرتب ادمي يأكلني عيش (مش اركب بية مواصلات بس و اقعد اخد فلوس من بابا) ... و انه يكون متأمن عليا ...( علشان بعد عمر طويل الاقي معاش اصرف منه علي نفسي مش اتهان علي كبر و ابيع مناديل في المترو ) و الشغل يبقي ثابت.... (مش انه لو غيبت يومين تبقي القيامة قامت و لو عيييت او بعد عمر طويل اتجوزت او حصل لي اي شئ يبقي ادور علي شغل تاني لان الشغل مش هيستاناني) ....
هل اني اعمل شئ بعد الشغل ترف من ترف الحياة ؟؟؟ مش ممكن لما كل صديقاتي يغلب عليهن الكئابة و الحزن دلوقتي بشكل ارعبني , في اول مرة نتقابل بعد الكلية كان هناك اثنتان بياخدوا ادوية جدول علشان جالهم امراض نفسية و مش قادرين يستحملوا !!! كمية الاحباط اللي عندي ملهاش حدود ... و مش عارفة اعمل ايه بجد ... اصل المشكلة ان كل شئ بيكون له جدول زمني ... يعني لو مش انجزت شئ محدد في زمن ما خلاص يبقي راح عليا ... و انا حاسة بكدا اوي دلوقتي
شعور الشباب اللي هرب علي ايطاليا و القارب غرق بيهم عرفت ليه هما عملوا كدا و حاسة بيهم اوي دلوقتي ... وملتمسة ليهم العذر اوي اوي اوي ... و مش عارفة مسؤولية مين ان كل الناس دي يكون عندها كمية اليأس كدا ... نفسي افهم انا طيب انا اتعلمت ليه اذا كان التعليم معمليش اهدافي الحياتية اللي انا عايزاها ....
دلوقتي انا معروض عليا التكليف .. في اردئ حتة فيكي يا مصر و للاسف كل الحتت الكويسة التانية راحت عليا خالص .. و مش عارفة اعمل ايه بجد ... هل الغي التكليف علشان افضل طول حياتي اشتغل و اتنقل بين الاعمال واعمل بدون تأمين و لو مرضت ولا حصل لي اي شئ ابقي مشردة .. ولا ارضي اني اروح التكليف اللي بعتبرة تطوع و يا عالم بعد كدا ممكن الوحد يتعين فين ولا هيشتغل في حتة كويسة ولا ايه ... انا فعلا حاسة بالضياع التام ... و عندي اكتئاب رهيب لدرجة اني بقيت انام احلم بكاوبيس اعيط في الحلم و اصحي مصدعة من العياط ...
ياريت محدش يتطوع و يقول الراي الازلي اللي بيقول " انت مش مطلوب منك تشتغلي لانك بنت " احب ارد علي المتطوعين اللي ممكن بفكروا في الموضوع دا و اقول لهم ... الزمن اللي احنا فيه مش مضمون فيه اي شئ ... يعني لازم الواحدة تكفي نفسها علشان متذلش ... لان الزواج دلوقتي بقي مش سهل و انا عارفة بنات كتيرة مش متزوجات و انا صراحة مش بحب اربط حياتي بشئ يا يتحقق يا ميتحققش مش لعيب فيا او في الشباب لا سمح الله و لكن احنا جيل بندفع تمن الانفتاح الغير مدروس و تمن غلطات تانية احنا مرتكبنهاش ...
انا للاسف دخلت في دوامة اني اجري علي لقمة العيش بس و معدتش بفكر في اي شئ اخر ... و مش انا بس اغلب اللي اعرفهم بقوا كدا ... انا بكرة نفسي اوي لما اكون مربوطة في الساقية دي و اللي ابات فيه اصبح فيه .. زمن الوسية رجع تاني و انا مش عايزة طول عمري اشتغل عند البية صاحب الوسية ...
الدكتور اللي بشتغل معاه في الصيدلية كويس و كل حاجة و بيعامل المساعدين اللي عندنا كويس اوي و بيديهم كل يوم تمن العذاء و لو غير لبناتة المحمول بتاعهم بيدي القديم للمساعدين ... بس انا بتكلم علي موضوع اخر , انا حاسة ان المساعدين اللي شغالين في الصيدلية عبارة عن عبيد جدد , بيباتوا في الصيدلية و حد بيفتح منهم و بيعملوا مناوبات علي الشغل و لما بيقفوا بييلعبوا كورة في الجنينة اللي في الشارع اللي فيه الصيدلية و خلاص ... هي دي حياتهم و فلوسهم بتضيع علي اللبس و علي شحن كروت المحمول ... مش عارفة هو يه ناس لازم يبقوا كدا عهلي طول علشان حياة الاغنياء تمشي ولا ايه بالضبط ... حاسة ان كل القيم اللي الواحد اتعلمها عن الانسانية و الايثار بتنهار بجد ... و الامر الواقع بيفرض حاجات تانية خالص ...
لما بلدك تقول انها بتشجع الصناعة و بعدين تلاقي المندوبين بيشتكوا ان المواد الخام اللي بتدخل في اساسيات الصناعة زادت بمقدارات بشعة ( الاكسوجين مثلا اللي بيبيض المنسوجات و بيدخل في صناعات كثيرة منها اللوف المصنع و ما الي ذلك غلي بشكل بشع ... طبعا دا هيتحمل علي السلعة يقوم الناس مش تشتري تقوم المصانع تقفل و تنضرب و الناس تتشرد اكتر ما هي متشردة و تيجي البضاعة الصيني و من اي بلد تغزونا بمنتهي البساطة ... غليت بامر من غرفة الصناعة مش سوق عالمي يعني خطة مدبرة ) لتل نش فلهمة بجد الفساد واصل لحد فين مش ممكن ...
هي دي وطني ... هي دي بلدي ... عمار بجد يا مصر
دوامة الحية العملية تجرفني و اتمني ان يرشدني الله الي الطريق الصواب لاني اريد ان ابذل جهد و ان يقيم و اخد مقابل مش اقعد اتعب و ميكونش فيه اي مقابل من اي نوع لتعبي ...
دي مجرد فضفضة سريعة لكن اللي جوايا امر و اكتر كتير اوي من اني اطلعة

هناك 14 تعليقًا:

عصفور المدينة يقول...

معاك والله بس أكيد الحياة تتغير ولي نظرية بتقول

إن ممكن الظرف السيء العام ربنا يفكه على بعض الناس

محمد عبد الغفار يقول...

بعدين الأول لازم تعى واقعك وتتقبلى متتطلباته مع التنازل عن بعض الصور الورديه

الثانى اقبلى التكليف

Unknown يقول...

بجد مش عارف أقول ايه

كل يوم بزداد احباط عن اليوم اللي قبله

عرف اقتصادي غبي - وظروف اجتماعية اغبى

تخلينا عايشين طول حياتنا زي المربوطين في الساقية

زي مانت عارفة أنا لسه عايش في العالم الوردي في الكلية ماقبل التخرج بس من ساعة مشفت أخويا اتخرج !!

ساقية بتدور !

أنا مش فاهم الشباب المفروض يعمل ايه بجد !

أبسط الحقوق الحياتية انه يعيش عيشة كريمة - مستوى مقبول - يتزوج

بس الأخيرة دي بقت في المشمش ..

الطائر الحزين يقول...

ولقد خلقنا الانسان فى كبد

تحسى ان هذا مخطط مدبر حتى نصل لمرحلة لما واحد يسأل التانى انت بتشتغل ولا لا يقول له بشتغل يقوم يرد عليه طيب احمد ربنا انك لقيت شغل اصلا

اقبلى التكليف

اثبتى نفسك وجدارتك

ضعى ثقتك فى الله دوما

سددوا وقاربوا

لن تفعلى الا ما هو استطاعتك ولن تتحملى الا قدر طاقتك

علمتنا الحياه ليس شرط ان تأتى المكافأه على العمل فى حينها يمكن ان تأتى على شىء لا يستحق المكافأة اصلا لكنه نتاج لمجهودات الماضى

ارجو اناكون اوصلت الفكرة

هونى على نفسك

محمد يقول...

هو الموضوع عام ؟؟

كنت فاكر نفسي لوحدي


مش عايز أقولك إني بمنع نفسي من كتابة بوست تقريبا مشابه لما كتبتيه


شكرا لأنك عبرتي عنّا

.............

بعيدا عن تشابه أحوالنا

أكيد لازم تقبلي التكليف حتى لو بعيد .. وحاولي تقدمي نقل أو أي حاجة تجيبك قريب

ولكن يجب أن تقبلي التكليف واسألي الله أن يكون فيه الخير لك

أصلح الله لك حالك وهداك لما فيه الخير لك في دينك ودنياك وعاقبة أمرك

عبدالرحمن الشافعي يقول...

أنا فعلا مش عارف أكلم
إلي أقدر أقوله
البلد باظت
.............

Unknown يقول...

السلام عليكم ورحمة الله وبركاته

حقيقة لا أعلم ماذا أقول

لأن ما تقوليه حضرتك هو مشكلة يعاني منها الأغلب ومطلب يتمناه كل فرد

لكن لعلها رحمة

احيانا كثيرة تكون لحظة الإنطلاق هي قمة اليأس والفشل

العديد من المخترعين والمشاهير وغيرهم , دمرت حياتهم في البداية , ثم تنقلب الموازين

الصمود والصمود وقبل كل ذلك الصبر والإيمان

كما قال تعالى

###
إنه من يتق ويصبر فإن الله لا يضيع اجر المحسنين
###

والله حسبنا ونعم الوكيل

إحترامي

walaaz يقول...

الصيدلية؟ هى الصيدليات اسمها شغل ؟ اسمها مسخرة , سخرية ..أى حاجة كدا
أنا عن نفسى طفشت خلاص ..
حاليا بستعرض أراء اصحابى
اللى عايزة تفتح كوافير واللى عايزة تفتح محل لعب أطفال .. أى حاجة تكون بكرامة شوية كدا بدل (قلة القيمة ) اللى اترمينا فيها مرة واحدة

التكليف؟ عايزة تاخدى التكليف وفى نفس الوقت متاخديش المصروف؟
ازاى برضه .. هو يادوب التكليف يكفى المواصلات

الحاجات اللى انت عيزاها - وانا كمان - متجتمعش ... لسة كنت بقول لصاحبتى ان احنا عشان يبقى معانا فلوس من شغلنا أقل حاجة نشتغل 12 ساعة فى اليوم ونقرا الفاتحة على حياتنا بقى .. لقيتها واخدة شفت 13 ساعة :s

أنا عن نفسى بقالى شهر سايبة الشغل وبشوفلى مجال تانى :d

رفقة عمر يقول...

مش عارفه ااقولك ايه
لما اتكلمت معاكى حسيت انك اقوى من كدة وكمان كلامك قد ايه ريحنى
وانا راى من راى استاذ محمد عبد الغفار طالما انك لازم تؤدى التكليف ااقبليه ومعلش استحملى شويه كمان واكيد ربنا بيدى على قدر الصبر والمجهود
مش يمكن الشئ اللى بتكريهه دة ومضايقه منه يكون فيه خير ليكى كتير انتى مش عارفاه
وعسى ان تكرهوا وهو خير لكم وعسى ان تحبوا وهو شرا لكم
توكلى على الله وان شاء الله يجعل لك الله من امرك مخرجا
فرج الله كربك وابدل حزنك فرحا وسرورا ورزقكى من حيث لا تحتسبى اللهم امين يارب العالمين

Dr.khaled يقول...

بشرك الله بالخير....
احنا باقين لنا ايام معدودات...ونغوص في بحار الدنيا -باذن الله-
وربنا يستر علينا

أخي الاكبر صيدلي....
ويعاني من نفس المشكلة.....

من 10 صباحا لحد 2 مساءاً...متواصلين....
والحمد لله على كل حال

شــــمـس الديـن يقول...

السلام عليكم و رحمة الله و بركاتة

احب ان اقول انني و الحمد لله كنت في فترة عارضة و عدت الي قواعدي الاساسية سالمة بحمد الله و فضلة

جزي الله خيرا كل من عقب ففعلا استفد من تعليقاتكم كثيراً :)

الفاضل الكريم عصفور المدينة

كلامك رائع فعلا ... اكيد ربنا هيفك الظرف السئ العام علي بعض الناس و نظرتي التشاؤمية عارفة انها بتكون مركزة في حالات احباطي

كلمة معبرة رغم انها قصيرة

تحياتي

***********************************

الفاضل الكريم محمدج عبد الغفار

فعلا
لابد ان اوازن بين المطلوب و المتاح و تحقيق اقصي استفادة من الامكانات الموجودة ...
موضوع القبول ان شاء الله جاري الاستخارة

***********************************

الفاضل الكريم عمر
انت فينك ؟؟؟ مش هقول اكتر من كدا

انصحك تستمتع باقصي درجة بالعالم الوردي اللي انت عايش فيه ... بجد عيش لحظتك و لا تقلقل علي المستقبل لانك ستضيع الحاضر و لن تغير منه شئ

ابقي طمنا عليك

***********************************
الفاضل الكريم الطائر الحزين

و نعم بالله دي سنة الله في الارض
فعلا دا مخطط بشع

نصيحتك علي عيني بجد و ربنا يجازيك عني خيرا

***********************************

الفاضل ياسر ابو العلا
كنت اتمني ان تقول رأيك بشأن ما هو مكتوب
ان شاء الله عما قريب

***********************************

الفاضل الكريم وضاح
:)
هو انت كمان معانا
اهلا

مش عارفة بس انا مش بحب اكتب التدوينات الكئيبة دي ... مش بحب ان التدوين يكون فيه روح كئابة عامة بس للاسف دا واقعنا

الحمد لله علي كل شئ

علي فكرة انا مش بتفرق معايا موضوع البعد و القرب ... بفضل الله اختك من النوعية اللي بتحب الشغل اساسا ... عارف المشكلة اصلا هتكون ان الشغل قليل و انا هزهق من الملل !!!!!

شوفت بقي ناس خنيقة و معقدة ازاي اللي بتروح للتعب برجليها ؟؟؟

نصيحتك غالية و هاخدها في الحسبان اكيد

شكرا لك علي نصيحتك التي وصلتني من صدقها
دمت انت ايضا بكل الخير

خالص التحية
************************************
الفاضل الكريم عبد الرحمن ياسين

اخي هون عليك
البلد اصلا بايظة بس ربنا يقدرنا و نخرج منها باقل خسائر ممكنة و كل دا بردوا مش يدعيك انك تيأس

خالص التحية

------------> يتبع

شــــمـس الديـن يقول...

السلام عليكم و رحمة الله و بركاتة

الفاضل الكريم ساكن الافق

اولا نورت المدونة لاول مرة في الزيارة و اتمني ان لا تكون الاخيرة

اكيد هذا ما نريدة دائما و لكن حقاُ لابج ان اعي ان الدنيا لن تكون دنيا اذا سار كل شئ علي ما يرام و حصلنا علي كل ما حلمنا به يوماً ( و لقد خلقنا الانسان في كبد )
انني لا ادعي ما ليس لي لست اريد ان اكون عظيمة او مشهورة فاولا لست اهلا لهذا ثانيا ان كنت اهلا لهذا فلن يكون ابدا في هذا البلد الذي طفت الفطرة الفاسدة عليه ....

جزاكم الله خيرا علي تذكيري بالاية الكريمة
مرور طيب عطر

***********************************


الفاضلة الكريمة walaaz
مع احترامي لرأي حضرتك و تقديري لمرورك عندي و لكن احب ان اختلف معك في الرأيو اقول " نعم الصيدلية شغل " بالفم المليان
و انا اساسا احب العمل في صيدليات لانه يتناسب معي و مع شخصيتي ... و ليس الامر به مساخر كما قولتي حضرتك ... و مع تقديري الشديد لصديقاتك ظو الكوافير و لعب الاطفال ليست بافضل حال من الصيدلية فكله ما ذكرتي يخضع للسوق الحر المفتوحة الذي له مخاطرة في المكسب و الخسارة ...

هو بالنسبة لموضوع ا لتكليف فشكلي هاخد التكليف و اشتغل بعج الظهر بردوا يعني هي هياها في التعب ... و فعلا الحاجات دي متتجمعش لكن اكيد ليها سكة اخري ... و اكيد مفيش اي شئ هيجي من غير تعب

عامة ربنا يوفقك في المهنة القادمة التي تريدينها

دمت بكل الخير و الود زميلة المهنة
***********************************

العزيزة الغالية رفقة عمر

مات انا قولت لك من الاول ا لواحد بيكون ينبوع حماس فلما يتخنق بيكون ينبوع يأس ايضاُ! :))

عامة لكل جواد كبوة و الحمد لله عدنا الي ادراجنا سالمين و ان شاء الله قريبا هكتب تدوينة دمها خفيف عبارة عن متابعة لسلسلة ليومياتي و مذكراتي و شكرا لك علي دعمك ...و علي فكرة التكليف مش فرض زي ما فهمتي لكن انا باختياري اني اخدة او ارفضة ... و هقول لك قريب اوي علي قراري

دمت بكل الخير وكفايا اني اجحست بانك عايزة تقفي معايا (F)

***********************************

الفاضل الكريم ض/ خالد

الضاض اللي حضرك كاتبها دي بتفكرني حرف ص/ اللي بمضي بيه قبل اسمي و ناس كتيرة مش يفهموه ( صيدلانية )

كما قال الفاضل الكبير عصفور المدينة رما يستثني الله من الظرف السئ الكبير بعض اناس ... انا مش عارفة هل انا مستثناهع ولا لأ لكن بأمل في الله خير

خالص التحية مش عارفة اقول لك ايه

ربنا معاه و معانا و مع كل الشباب و الفتيات اللي طالع عينهم بجد

خالص التحية

koukawy يقول...

معلش يا بنتي كلنا بندور في نفس السايقه
و المصيبه ان حتي المتجوزين شغل الراجل لوحده ما يفتحش بيت ده في حالة انه ماشي في السليم
و مقصدش برضو ان كل اللي معاهم فلوس ماشيين غلط لأ
بس لازم الست تشتغل مع الراجل عشان البيت يبقي موارب مش مفتوح

شــــمـس الديـن يقول...

الفاضل كوكاوي

الله يبشرك

انت فعلا معك حق مش كل الرجالة لوحدهم يقدروا يفتحوا البيت ... لان اللي حاصل في مصر بجد كارثة بشرية ربنا يستر علي الاجيال القادمة

بس انا حاسة اني نفسيا بتسرق من نفسي ... فاهمني ؟؟؟

ربنا معانا دميعا , و شكرا علي تعليقك و مرحبك بك في المدونة دائما