الخميس، ديسمبر 20، 2007

كل عام و انتم بخير


السلام عليكم و رحمة الله و بركاتة






العيد الكبير جاء بعد العيد الصغير ... هو المفروض ان الواحد يكون مبسوط علشان الاوقات المباركة اللي احنا فيها دي.... بس مش عارفة , محسيتش بالعيد السنة دي مش عارفة ليه ... و بعدين كل اللي السئلهم علي المسنجر يجاوبوا نفس الاجابة ... هل انتوا حاسين بالعيد ؟؟؟ بيني و بينك و بصراحة ( مش حاسين بيه خالص ) طيب ليه ؟؟؟


انا مثلا علي الصعيد العائلي لم نزر العائلة الكبيرة , لان الابناء يا اما بيمتحنوا يا اما امتحاناتهم بعد العيد مباشرة فكلة بيذاكر ... هل المصلحة الخاصة اضاعت الرحمة و الود فيما بيننا ؟؟؟ يعني كل الناس تغلبت مصالحهم الخاصة علي قيم التراحم و قدسية العيد انه يبقي وقت التزاور و استعادة الاواصر المفقودة ... خلاص , انتهت هذه الخاصية و الميزة ؟؟؟ حتي الاصدقاء اصبحن يعملن في العيد و اصبح ايجاد وقت مشترك يناسب الجميع لهو امر عسير للغاية ....


فيه ناس مش حاسة بجو العيد علشان عليهم امتحانات ... طيب يعني هو العيد لو كنا في اجازة كان هيبقي له معني ؟؟؟ طيب ما انا اعتبر في اجازة ابدية ... مالي بقي ؟؟؟ ناس تانيين مش حاسين علشان نفسياتهم تعبانة و مش مستقرين عاطفياً و بثقولوا لما يتخطبوا هيستقروا .... و ناس تانية مخطوبة مخنوقة علشان اهلهم بينكدوا عليهم .... رغم انهم مستقرين عاطفياً و بيقولوا احتمال لما يتجوزوا يحسوا بالعيد ..... فيه ناس متجوزين و مسافرين و مش حاسين بالعيد ... بيقولوا يمكن علشان هما بعيد عن الاهل مش حاسين بالعيد ... طيب ما انا في مصر و مش حاسة بالعيد !!!! بس انا عندي عامل كمان اني مش احس بالعيد الا و هو ان المحمول وقع و باظ ... و مش عايز يستجيب لاي محاولة فاضطر اني اعيد علي الناس اللي معرفش نمرة اي حد منهم بعد العيد لما المحمول يتصلح ان شاء الله... لدرجة ان فيه واحدة صاحبتي نمرتها علي المحمول بس عازماني علي خطوبة اختها و مش روحت علشان معرفش المكان و الميعاد بالظبط علشان المحمول ضاع ... و




فيه ناس مش حاسة بالعيد علشان بتنام كتير ... و فيه ناس نانية بتقول ان كل وا الواحد شال الهم او فقد البراءة قدرتة علي الاحساس و الفرحة عامة بتقل ... طيب ما انا ليا قريبة عانت معاناه طويلة و هي حاليا ارملة و لكن في تصالح غريب مع نفسها ... و اعتقد انها حاسة بالعيد ... و فيه ناس بتقول ان العيد دا للعيال الصغيرة حيث البلالين و البمب يعني لو انت طفل او ام و عندك عيال اه لكن السن بتاعنا دا سن ضياع و مفيهوش ادني استمتاع باي شئ... و لكن بالرغم من ذلك فيه بنت في سننا دا و مستمتعة بكل لحظة بتعيشها ... شئ غريب حقاً


حتي الخراف , لا ادري و لكني الاحظ ان الفراء ليس ناصع البياض ... علي عكس الخراف التي نراها في البلاد الاخري العربية ( نفس السلالة مش مارينو و الله ) اجد ان فروتها ناصعة البياض كدا و مهتمين بيها بشكل جميل ... مش عارفة هل شكل الخراف بيعكس الاحساس بالذوق و ابسط بديهيات الجمال ام ان كلة بيفكر بمنطق ( اطبق ملاية السرير ليه ما احنا هنام تاني عليه )



عامة اتمني ان اللي يدخل يقول بحق ربنا هو حاسس فعلا بالعيد ولا لأ ... و كنوع منالترويش جيبت لكم عدية عمري شخصيا ما شوفتها علي الحقيقة .... بس يعني مش يضر بردوا ...

العيدية :)


و كل خروف و انتوا بخير :))


هناك 15 تعليقًا:

عصفور المدينة يقول...

الله جميلة المقدمة اللي فوق دي والله

كل عام وانت بخير الألف يورو دول يجيبوا بعون الله عجل محترم

انا سعيد وباحب العيد وباملا اليوم حتى لو جزء منه نوم فده في حد ذاته سعادة عشان كثير بيبقى نفسي في شوية نوم

غير معرف يقول...

ياسلام على الف يورو انا حاخدها ومش حديها لحد :)
لا وماشاء الله مش دولار ده يورو كمان كريمة ياشمس
انا عن نفسى الايام كلها بقت شبه بعضها لافرق بين عيد ولا موسم كله زى بعضه معرفش الاحساس ده ليه لكن لاننا حاملين هم بلدنا والظروف اللى احنا عايشين فعمرنا ماحنشعر بطعم حاجة
تحياتى ليكى

ابن حـجـر الـعـسـقـلانـى يقول...

و الله فيه رباعية جميلة لصلاح جاهين فى سياق الموضوع بيقول فيها

لا تجبر الإنسان و لا تخيره
يكفيه مافيه من عقل بيحيره
اللى النهاردة بيطلبه يشتهيه
هو اللى بكره هايشتهى يغيره

عجبى

محمد يقول...

كل عام وأنت بخير
وتقبل الله منا ومنكم

موضوعك جميل .. أن قبل العيد بفترة وأنا أحضر نفسي نفسيا وعاطفيا ودينيا لا ستقبال العيد

فأنا لا أريد أن يمر علي مر الكرام .. أحاول أن أشغل وقتي فيه برفقة أو زيارة أو حتى نوم .. ولكن كله بنظام

تعرفي ؟؟

أحيانا عدم استخدام النعم يضر لا ينفع

أذكر من عدة سنوات أني لم أستطع النوم ليلة العيد .. وبعد الفجر توجهت مباشرة ككل عام إلى المصلى .. عند الظهر نمت ولم أستيقظ إلا قبالة المغرب .. في هذا العيد كان من أسوأ الأعياد .. الجميع فرح مسرور يشعر بالعيد وبهجته .. وأنا لا زلت أتثاءب من آثار النوم أحاول الأستيقاظ .. الكل قد أنفق طاقة حب .. طاقة ضحك . طاقة فرح .. وأنا لا زلت لدي المخزون لا أدري أين أنفقه

حتى إذا جاء الليل .. ونام الناس .. جلست وحيدا .. لأبكي فقد اجتمع أمامي كل مقومات الحزن والألم

خلاصة قولي أن العيد تهيئة نفسية .. واستعداد للقاء .. وانطباع مسبق

فإن أنت كانت لك فكرة معينة فهي ما سيكون منك

أي أن أفكار اليوم هي حقائق الغد

ومن فاته وقت العيد فهو ليس عن السعادة ببعيد .. ربما يجدها متى أراد ؟؟

abderrahman يقول...

حتى لو مش حاسين بالعيد.. مش مهم
كفاية انه لسه فيه عيد
كل سنة وانتي طيبة
:)

Maha يقول...

آه

قلبتي المواجع

الله يرحمنا بقى

والله بقرأ كل كلمة في تدوينتك وبقول ..سبحان الله ..بتتكلم بلساني

عاااااااااا

عايزة أعيط

عبدالرحمن الشافعي يقول...

السلام عليكم

أنا عيز أقول حاجة ....
وعاوز أطرح سؤال....
ليه في عيد؟؟؟؟؟؟
سؤال يطرح نفسه
لماذا هناك عيد؟؟؟؟؟؟؟؟؟
علشان الأيام التي تسبق العيد..كانت أيام طاعة...أيام عبادة..أيام الواحد تعب فيها..علشان كدة في عيد
في عيد علشان يخلينا نفرح بالأيام التي عشناها في طاعة ربنا
وتعبنا فيها
وصمنا..وصلينا..ودعينا..
العيد جه علشان يكون فترة راحة لينا..
يكون فترة فرح بالأيام إلي فاتت

ف حضرتك بتقولي."الواحد مش حاسس بالعيد
مع إحترمي الشديد للكل
الواحد إلي مش حاسس بالعيد...عمره ما هيحس بيه ...لو ما تعبشي في الأيام إلي فاتت

مش هيحس بيه علشان هو عمل معاصي في الأيام إلي فاتت....ما طاعشي ربنا
فلازم نوضح النقطة دي للناس...
عاوز تفرح بالعيد.....
إتعب في الأيام إلي قبلها
..........
أتأسف بشدة للإطالة....
وجزاك الله خيرا...على هذا الموضوع
وأتأسف على أي لفظ خرج مني مش كويس

وجزاك الله خيرا
"وكل خروف وإنتي طيبة"

محمد عبد الغفار يقول...

العيد بيختلف معناه وبهجته ودلالاتها من مرحله سنيه لمرحله سنيه عاده يظل الأنسان مصمم على رموز ومعانى الشئ الذى اعتاد عليه دون ان يفطن لتغيرها بسبب تغير مرحلته السنية

وده غير صدأ القلوب عافنا الله واياكم

كل عام وانت له اقرب

عبدالرحمن الشافعي يقول...

اخخخخ
نسيت أقول أنا حاسس بالعيد ولا ،لا

أنا مش حاسس بالعيد علشان أنا قعدت أيام العيد كلها في بيت العيلة...وأصلا العيلة كلها بنات
البنات الأغلبية...فاهم مخلناش نلعب ..ولا نتحرك برحتنا...
بس يلا ربنا يخرب بيت اليهود
العيد جميل...وبإذن الله العيد إلي بعده ها يبقى أجمل....


"العيد فرحة..ماااااء مااااء"

شــــمـس الديـن يقول...

كل عامو انتم بخير

لالسلام عليكم و رحمة الله

الفاضل الكريم عصفور المدينة ...
انا كنت عايزة اعمل المقدمة دي من زمان و لكن مكنتش عارفة ازاي ... جزي الله خيرا بقي اللي ارشدني :)

انا اساسا مش عارفة حاسة ان الالف يورو دول عبارة عن ورقة فلسكاب من حجم A2
فعلا معك حق والدي يقول نفس الكلام ... عن حكمة العيد والنوم

***********************************

الفاضل الكريم الحرية

ممكن نقول حطيت يورو علشان بفضل اوروبا عن امريكا - هو ما اسخم من سيدي الا سيتي - بس معلش بقي

هو اكيد هم البلد بيلمسنا بشكل او بأخر ...يالا كل عم و انت بخير

***********************************
الفاضل الكريم ابن حجر العسقلاني ...

معك حق ... ربنا يتولانا و يثبتنا تملي

**********************************

الفاضل الكريم ...وضاح

حلو اوي موضوع انك بتحضر نفسك بكل حواسك و جوارحك لاستقبال العيد ... كأن فيه حدث مهم هيحصل و الواحد بيأهب نفسة ليه ... فكرة جميلة بجد

و بجد كلامك بالذات اثر فيا اوي و حسسني انه ممكن الواحد يصنع البهجة ايا كانت الظروف

تحياتك لردك المتميز حقا ً

خالص التحية

يتبع ----------->

شــــمـس الديـن يقول...

السلام عليكم و رحمةالله و بركاتة

الفاضل الكريم ... عبده باشا

كويس انهم مش لاغوا العيد او خصخصوه معك حق حتي لو مش حاسين بعيد كويس انه لسة فيه عيد

و انت طيب و باحسن صحة و حال

***********************************

العزيزة الغالية مها

بجد نورتي المدونة بفرح اوي لما بشوفك
متعيطيش يا جميل ... كل خروف و انت طيبة

***********************************

الفاضل الكريم عبد الرحمن ياسين

مش عارفة ليه تعليقك حاسة انه زي تعليق الشيوخ اللي بيتكلموا في بعض الشرايط ... كلام اه كويس و لكن لا يعالج الواقع و غير عالم بيه

مش لازم يا سيدي اللي مش حاسس بالعيد يكون بيعمل معاصي ... مع احترامي الشديد بجددي نظرة قاصرة و قاسية في نفس الوقت .. و انت تفسك قولت انك مش حاسس بالعيد علشان بعض الاسباب .. مش كل شئ لازم انه يكون علشان الذنوب ... فيه اشياء بتبقي اقوي من البني ادم انه يتحملها او بيحتاج الي دعم نفسي علشان يعديها ...
حياتنا فعلا اصبحت معقدة بشكل كبير اوي و فيه عوامل كتيرة اوي اوي اوي ففعل الشرط اللي حضرتك افترضتة غير مناسب تماما لجواب الشرط اللي حضرتك وضعته ...محدش يقدر يحكم علي حد اذا كان بيطيع ولا بيعصي الله لانها علاقة معقدة اوي و خاصة اوي في الوقت ذاتة

عامة كل خروف و انت بخير :)

************************************
الفاضل الكريم محمد عبد الغفار

هو فعلا فيه ناس مش بتفتكر انها لو مش عملت شئ معين مش هيبقي عيد ... علي رأيك كل شئ بيتغير هو ربنا يعافينا من صدأ القلوب لانه اصعب شئ في الدنيا

------------------------------------

خالص التحية للجميع

Ma 3lina يقول...

عارفة انها جاية متاخرة بس كل عيد و انتى طيبة

رفقة عمر يقول...

طبعا انا كنت فى العيد على الماسنجر معاكى وانتى عارفه كويس انا قضيت العيد ازاى وانتى كنتى عماله طبطبى عليا
يعنى مش محتاجه ااقول

Unknown يقول...

السلام عليكم ورحمة الله وبركاته ...

كل عام وحضرتك وجميع المسلمين بخير دومًا وأبدًا

********

من وجهة نظري أن هناك شيئا إفتقدناه
ألا وهو برائتنا

نعم

براءة المشاعر , التي لم تلمسها الخبرات ولا المشاكل ولا الهموم

تعاظمت متاعبنا يومًا بعد يوم , وفي إزدياد مطرد

ففقدنا كثيرًا منها , وبالتالي لم نعد نفرح كما بالسابق

ونحن صغار , كنا نفرح برمضان فرحة عارمة , على الرغم من أننا لم ندرك حينها مدى أهمية هذا الشهر بالنسبة للحسنات وتكفير الذنوب , عندما كبرنا , بدأنا نفرح لقدومه لأنه شهر طاعات وسباق حسنات , فرحنا فرحة تختلف تمامًا عن فرحة الصغار

هذا من وجهة نظري أحد أهم أسباب عدم شعور البعض إن لم يكن السواد الأعظم بفرحة تجاه العيد

دمتِ بخير وبسعادة دوًما وأبدًا
وأخيرًا أنا أطلب 1000 دينار كويتي بدلًا من اليورو لأنه أغلى ^_^

إحترامي ,,,

عبدالرحمن الشافعي يقول...

السلام عليكم
أنا فعلا غلط في التعلي إلي فات ولسة والله واخد بالي وفاهم وجهة نظرك
تعملي إيه بقى عيل كبير وغلط
هههههه
أنا فعلا كنت بكلم كلام متعصب جدا
بس والله انا مش عارف إزاي كتبته
ما إنتي عارفة أنا واد صغير وعلى حالتي يعني

أتأسف بشدة علشان أنا فعلا غلط
ومش هاعملها تاني..هههههه

تحياتي لك

ربنا يجعل كل أيامنا سعادة يارب