الخميس، يوليو 03، 2008

السجن الوهمي

السلام عليكم و رحمة الله
تأملت طويلا
وجدت ان اغلب الناس يعيشون في سجن وهمي من صنعهم و هو سجن " نظرة الناس اليهم " و ينفقون جزئا كبيرا من حياتهم و مجهودهم في تتبع ما يقال عنهم و ما يريدون ان يقال عنهم و ما الي ذلك ... و يتخيلون انهم بذلك يحصلون علي التميز المنشود
...

دكتورة زميلتي تحكي لي عن قريباتها في انهن يتبطرن علي النعمة و انها رفضت عرسان لقط ... منهم من سوف يحضرون لها شبكة ب100 الف جنية و مسكن الزوجية عبارة عن فيلا و ما الي ذلك من الارقام الغريبة , و قالت ان اخره البطر وحشة لان هذه الفتاه تزوجت بشاب اقل بكثير ممن كان يتقدم اليها - مع شاب في بدايه حياته و لكنه يعمل في الخارج و امامه مستقبل جميل - و لكنها اصرت ان تشارك بنصف مبلغ الفرح لكي لا يقل مستوي الفرح عن تكاليف معينه ... حتي انها كلفت ديكور الكنيسة فقط 125 الف جنية و لكنه كان ديكور يليق بزميلات الجامعة الامريكية الذين يقيمون الحفلات الباهظة و يعزمون المغنيين في حفلات اعياد الميلاد

بغض النظر عن "قرفي " من المعيار الوحيد لتقييم الاشخاص و هو الماده و لكني لم اكن اتخيل ان هناك من يعيشون في هذا السجن بهذا الشكل ... والاهتمام الي درجة الهوس بما يقوله الناس عنهم ... , واسترجعت شريط نظره الناس عن هذاالامر ... فها هو قريب لنا يقول ان السيارة هي المعيار الاول في الحكم علي الناس فنوع السيارة و سنة الاصدار مهميين جدا , فدائما تجد ان الجميع يسعي لامتلاك الافضل لانه يجعلهم في مستوي اعلي ... فصمت و لم اعقب... و هذا لاني لست بصدد تغيير فكره و لكني استمع منه فقط لاري كيفية حكم بعض الناس علي الامر

ووجدت ان هذا الامر ايضا ينطبق علي فلسفة المحمول ... فالجميع يستدين و الجميع يقسط مبلغ المحمول علي اقساط تصل الي 24 شهر فقط كي يحصل علي عده جديدة اغلب المزايا التي بها لن يستخدمها فقط كي يشعر انه انتقل من طبقة الي طبقة اعلي لان المعيار السائد بين البشر الان هو التقييم المادي فحسب

زميل اخر ينصحني بان اكمل دراستي الاكاديمية بالماستر او الدكتوراه , و انا لست ضد الفكرة علي اي حال و لكن ببساطة سوف افعلها ان كان عملي يحتاج لهذه الدراسة , فالدراسة لابد لها من تطبيق ....فهي وسيلة و ليست غاية ... فقال لي انه حتي و ان لم تعملي بها فيكفي ان يقال عنك انه معك ماجيستير و دكتوراه في مجالك ... فهذا سوف يعطيكي ثقل في اي مكان تذهبين اليه و يجعل الناس يشيرون اليك بالبنان و يستمعون الي رأيك بتقدير و احترام .. فهالني المنطق اصلا ان ينفق انسان مال و وقت علي شئ لن يستفيد منه سوي فقط ان يقال عنه انه كذا و كذا و كذا و حتي يكتسب كثير من الاحترام و الاهمية

مساعد عندي في الصيدلية اصولة من الصعيد و خاطب قريبته فسئلته عن العادات في الخطبة و التيسسر في الزواج حتي يستطيع الخبطبة في سن صغيرة فقال ان ابوه هو من دفع له ثمن الشبكلة لانها مبلغ محدد لا تنازل عنه فلابد ان تكون الشبكة ب 5 الاف جنية ... قلت له و ان لم يكن معك ... قال بلهجة صعيدية رائعة و باستنكار بالغ " اللي معهش ما يلزمههش " !!!! و تأملت تشدقه بالعادات و التقاليد التي تكون اقوي من تأثير الدين في كثير من هذه المجتمعات المغلقة ... فاهل العروسة و اهل العريس يعتبروا ان قيمة الشبكة اقدس من القران و كل الكتب السماوية الاخري ( لان العادات هنا لا تفرق بين ديانة و اخري فالكل سواء فيها ) و طبعا غير وارد اساسا علي عقله ان تتم الخطبة بدون شبكة

اتذكر ايضا المباره التي تتم في الاحتفالات بالعرس , و ان تتباهي كل امراة في عرض ما لديها من ذهب علي بقية النساء و ما الي ذلك ... و تجد المشاحنات و التلميحات المتورية و التي يفسرها كل حسب نفسيته ... و تجد جو مقبض من البغضاء تسيطر علي الحضور بلا هواده ... هل الذهب بين النساء معيار من معايير التقييم ؟؟؟ رغم انني من النساء الا انني - حتي الان - لم افهم ما هو السر وراء هذا الامر , فقط اتأمل ما يحدث واتعجب .

--------------------------------------------------------------------------------------------

اعتقد ان من اصعب الامراض المنتشرة علي الاطلاق الان هي الاهتمام المبالغ فيه بنظرة الناس لنا و الحرص الشديد الذي يسجن البعض داخله علي هذه النظرة .. و استخدام معايير غريبة للتميز, فالتميز في وجه نظري ليس بامتلاك احدث محمول و ان اقسط و استدين و ان اجعله عبئ مادي علي , فالتميز هو ادارة توظيف شراء الاشياء بما يتناسب مع دخلي و احتياجاتي ...فهناك اولويات اكثر من المحمول و ان احضرته لابد ان لا يكون عبئ علي ,
و ايضا الا يكون الزواج كصفقة بيع و شراء تتم بماديه بحتة و اغفال الجانب الانساني و الذي تقوم عليه الحياة من الاساس - و لهذا السبب نجد معدلات فشل بشعة في الزيجات الحديثة - و ان يتعلم الانسان العلم الذي سوف يفيده او ينفعة فقط و ليس لمجرد ان يقال عنه انه كذا و كذا و كذا ... واتذكر الحديث الذي يقول فيما معناه " من تعلم العلم ليماري به السفهاء او يكاثر به العلماء ا و يصرف به وجوه الناس اليه فليتبوأ مقعده من النار " لان اخلاص النيه مهم جدا
و حقا ان فعلت الشئ - اي شئ ايا كان - لم تلقي لنظرة الناس بالاً لسوف تجد نفسك تعلوا بين الناس بشكل لا تتوقعة انت, ربما اكثر ان خططت للامر ... و هذا عن تجربه حقيقية و تكررت كثيراً دون قصد

الشبكة و الذهب و السيارة و المحمول و الشهادات العليا ... و غيرها كثيرا من الامثلة التي تنبع من " سجن نظرة الناس لنا " فقط اردت ان القي الضوء علي امثلة مختلفة الموضوعات من حياتنا و لكنها تصب في نفس الموضوع و تنبع من هذا المنطق حتي و ان تعددت الصور .




هناك 25 تعليقًا:

فاتيما يقول...

شموسة
نسيتى حاجة أكتر من نظرة الناس لينا
نظرتنا إحنا كمان ليهم
يعنى المقاييس دى طبعت فينا إحنا كمان
بقينا لما نشوف حد بسيط فى لبسه نحكم عليه بإنه من مستوى مادى أقل
طريقته فى الكلام
مهنته و مكان شغله
شهادته
مكان سكنه
مركز أبوه و امه الأجتماعى
كل دا حلو من بعيد
لكن وقت ما يتقدملك عريس هتسألى عن كل دا و تطالبى بتقارب المستوى
بينك و بينه
طب احكيلك انا على حاجة لطيفة
لما حبيت بنى آدم و قررت أتجوزه
كانت نظرتى ليه عكس كل الناس
كان أقل فى المادة و الشهادة و المستوى الأجتماعى
و مع ذلك تمسكت بيه عشان محسيتش بفرق بينى و بينه كأنسان و توهمت أنه شخص متدين و إبن ناس
إبن ناس بالمعنى الحقيقى مش إبن ناس الأيام دى يعنى غنى
النتيجة النهائية كانت إيه بعد ما إتجوزته ؟؟
هوه اللى حس بالدونية و إبتدى يحطمنى عشان ميحس إنى أحسن منه
و اللى حواليه و حواليا سألونى نفس السؤال
ليه تاخدى حد مش من مستواكى
طب نعمل إيه ؟؟
خلينا فى السجن ؟؟
و لا نهرب منه ؟؟
أنا صدعتك
بس متهيألى مفيش إجابة

شــــمـس الديـن يقول...

مممممممم

كلامك صعب يا فاتيما بجد
انا مقصدتش اني اتنازل عن الاساسيات الاساسية
و لكن ميبقاش الحكم المادي هو المعيار الاساسي ... عارفة

اعرف واحدةتانية اتقدم ليها واحد شالها من عل يالارض شيل ... اشي شبكة بكذا و معاه شهادة بكذا و شغال في حتة جامدة اويو بعدين ايه اللي حصل ؟؟؟
كان فاكر انه اشتراها بفلوسة و بيتعامل معاها معاملة زفت اوي

لا اقول اني اغفل عن الاساسيات ولا اني ابالغ في التقييم

عارفة
انا واصحابي بنلبس عادي , و انا خريجة مدارسة لغات لكن عمري ما اتمنظرت علي جد بلغتي و لما بتكلم اجنبي فعلا لغتي كويسة ... و كلنا قمة في التواضع اساسا رغم ان اهلنا اغلبهم مناصب كويسة و معاهم فلوس كتيرة ... لدرجة ان ليا صديقة عرفت بعد فترة انها بنت سفير من كثرة التواضع و ان المادية مش هي اللي طاغية علي حياته, وهي بنفسها اللي بتقوللي ان وسط المادي فعلا وسط اغلبة منحل الا ما رحم ربي

فاهمة اقصد ايه ؟؟؟
اهم شئ اصل الانسان
الاصل
مش المادة ... و فراغ العين من ملوها بيكون بردوة اصل ناقص سواء فقير او غني

و بجد عمر ما كان اللبس او ماركةالمحمول معيار التفاضل بين الناس ... اغلب اللي تعاملاتهم مادية بيبقي عندهم مشاكل نفسية كتيرة اوي اوي اوي

الموضوع مش معيار ثابت

و عيب عليكي بجد تقولي انك صدعتيني عيب اوي اوي اوي فعلا هزعل منك
ربنا يرزقنا الحكم الصائب علي الاشخاص

A.SAMIR يقول...

بداية:
سيادتك زميلة..انا كمان صيدلي...تشرفنا يا فندم
ثانيا:
اعتقد ان دة فرااااغ
اه والله فراغ...شعب ماعندوش حاجة تشغله فبالتالي بيتجه للمنظرة والفشخرة الكدابة
ماهو لو وراه شغل ماكانش عمل كدة
دة رأيي
تحياتي

عصفور المدينة يقول...

هل هذا هو الموضوع الذي توقعت أن أخالفك فيه؟؟
لا والله لا أخالفك في ولا جزئية

belal يقول...

الناس دي غالبا بيكونشي ليهم هدف كبير..فبيحاولوا يعوضوه بمجموعة كبيرة من الإنتماءات التافهة ..والشكليات السطحية .. يعني تلاقيه يقولك إلا الشنطة الزرقا ..إلا النادي الأهلي..إلا مايكل بالك
مفيش حاجة إسمها شبكة أقل من خمسين ألف
وكده ..عشان بيحسوا إن حاجة ناقصاهم ..بيحاولوا يعوضوها

علي عكس صاحب الغاية ..اللي بيمشيلها ولو الناس _مش هاقول حدفوه بالطماطم_لو شالوا الطريق من تحته

belal يقول...

دا لو أنا فهمت صح

ma_3alina يقول...

اسمحي لي يا دكتورة اني اقول اللي فهمته كده عشان اتأكد إني فهمت صح ..
:)

في التعامل مع نظرات الناس وأقاويلهم فيه حاجتين

الحاجة الأولى .. هو مراعاة كلام الناس بدفع الشبهات عني وعدم تعريض نفسي لمظنة السوء خصوصا إذا علمت منهم جهلاً .. ودا مفيهوش حاجة .. بل بالعكس دا شيء كويس ومطلوب

والحاجة التانية هو مراعاة كلام الناس بإياهمهم بما ليس في أو أو اعلامهم بما في عشان ارسم نفسي عليهم بصورة اشتهيها واللي هو يعني حب المنظرة والمظاهر الدنيوية ودا اللي حضرتك سمتيه السجن الوهمي ودا اللي يخنق وينرفز

صح كده ؟

الطائر الحزين يقول...

عاوز ابصم بالعشرة على الكلام

ان مفهوم التوافق ليس بالمعيار المادى
ان التوافق الفكرى و الدينى و الخلقى والمرجعية للشرع هو الفيصل فى الحكم على المواضيع

فان ابينا وحكمنا العادات وأثرناها على الدين
(نشرب بقى)

إبراهيم أبوسيف يقول...

يقول مطر مخاطبا حكامنا

وجوهكم أقنعة بالغة المرونة
طلائها حصافة
وقعرها رعونة


أعتقد أن الحديث يتجاوز الحكام ليصل إلى معظم الأفراد في عالمنا العربي عموما

لكني أعتقد أننا إذا اجتهدنا في إزالة الأقنعة عن حياتنا فرديا فقد نصل بعد فترة إلى كسر ذلك الحاجز في مجتمعاتنا ولن لم يحدث فيكفي أنا حافظنا على وجوهنا الحقيقة وعلى جوهرنا كآدميين

رفقة عمر يقول...

شوفى شمس موضوعك دة كنت بافكر فيه قوووى
لان احيانا الانسان بيمر بظروف خارجه عن ارداته زى مثلا بنت لسه لم تتجوز او لم تنجب او اوتلاقى الناس كلها تنظر لها وتتسال الناس هى اللى بتجبرنا اننا نسجن نفسنا فيه ناس بتقدر تقاوم وناس لا
انا من الناس اللى مش باحب اهتم لكلام النااس ومش احب المظاهر الخداعه يمكن علشان كدة عمرى ما حاطيت ميكياج علشان انا باحب اهتم بالجوهر اكتر من المظهر وبخصوص تغير العربيه والموبيل لو الانسان عنده الامكانيه لدة ايه المانع
قل من حرم زينه الله التى اخرج لعبادة
لكن لو يقصد بالعربيه والموبيل انه يتعالى على الناس يبقى دة فعلا عنده مرض مش انسان سوى
وانا كمان باستغرب جدا من السيدات اللى ترتدى كل الذهب اللى عندها ليه يعنى اهو انا بقى من اعداء ارتداء الذهب ودة مسببلى دايما مشاكل مع ماما دايما تقولى علشان تظهرى الناس تقولى عليكى ايه
حتى نظره ماما ان الناس هاتقيمنى بالذهب الذى ارتديه
بجد لو كل واحد بقى فى حاله ومحدش يبص للتانى مش هاندخل السجن دة ابدا
موضوع جميل قوى شمس

شــــمـس الديـن يقول...

الفاضل الصيدلي احمد سمير

تشرفنا يا زمل :)

اسمح لي اختلف معاك ... الامر مش فراغ ابدا لان العالم الصعايدة اللي بيصروا علي ثمن الشبكة دول مش فارغين

دي سلوكيات متشبعين بيها
اعتقد ان الامر اعقد من كدا و لكن مكونتش لسة صورة كامله عنه

تحياتي
***********************************

الفاضل عصفور المدينة
لأ مش هو دا اكيد طبعا :)))

لما اكتب الموضوع هقول بالبنط العريض دا الموضوع اللي الناس هتفتح فيه النار عليا و خاصة الاستاذ عصفور :)

و يشرفني انفاق وجهات نظرنا

عميق التحية
***********************************

الفاضل الكريم بلال

ممممممم مبيكونش ليهم هدف ولا نشئتهم بقت كدا و حكمهم علي الامور بقي كدا و خلاص الدنيا مشيت ؟؟؟؟

طيب انت بص حوليك هتلاقي ان نموذج الناس دا كتير اوي اوي اوي اوي بشكل غريب

تأمل كدا و هتلاقيهم مش فاضيين ولا حاجة بس دا بقي اسلوب حياتهم
انت فهمت صح

************************************

الباشمهندش الفاضل ما علينا

اكيد اخي لا اقصد باي حال من الاحوال ان يعرض المرء نفسة للشبهات و يجعل الناس تتكلم عنه بما يسئ ,
و لكن ما اقصدة هو المبالغة في الاتمام بالمظاهر حتي يقال عنه انه معاه فلوس او مستواه خطير او دكتور او معاها ذهب او او او او
هو مش مظاهر دنيوية

هما بيشيلوا رضا الله من دماغهم خالص و بيكون رضا الناس همهم و غايتهم و صورتهم عندهم فقط لا غير

متقلقش انت فهمت صح
خالص التحية

************************************
الاخ الفاضل الكريم الطائر الحزين
:)

التوافق و تقييم الانسان ككل
معايير بقت غريبة
لا انكر انها بها جانب من الصحة و لكن ليكون هناك بعض المرونة ايضا
عارف مثلا
كان عندنا شلة في الكلية مش بيصاحوا غير ناس عندهم عربيات بس !! متخيل السطحية ؟؟؟
و سبحان الله اي نعم ماديا مستريحين اوي اوي اوي الا ان اسلوبهم في التعامل مع المعيدين اللي بياخدوا عندهم الدروس زبالة بمعني الكلمة و بيتباهوا انهم يهذئوا المعيدين !!!

و فعلا العادات بتحكم علي الناس اقوي من الدين في كثير من المناطق و اللي عايز يكسر دا بيكون هيفتح علي نفسة ابواب جهنم

خالص التحية

***********************************

الاخ الفاضل ابراهيم ابو سيف
نورت المدون و الله

و الله لو تشوف بذخ الخلايجة و مغالاتهم في المهور و من ناحية اخري الرجل يشعر انه اشتري المراة هتعرف العقد الحقيقية علي اصلها

و الله هو كل واحد عليه يبدأ بنفسة و انه يتجاهل تماما اصحاب النفوس النعبانة اللي بتتفاخر باللي بتعملة و لما تلاقي انها لم تأخذ الاهتمام الكافي اعتقد انها احتمال تعيد نظر في الامر
و قليل ما هم اصحاب الجواهر و الاصول الحقيقية
مرور عطر
***********************************

اظيك يا رفقة العزيزة عاملة ايه ؟؟؟
بصي الامر دا علي فكرة الناس بتبقي بتفكر فيه لا شعوريا يعني بيبقي داخل في جينات التنشئة

و الله في حياتي بالنسبة لموضوع الزواج و الانجاب و حياتي الخاصة عموما انا حاطة حدود بيني و بين الناس كلهم فمحدش بيجرؤ انه يتكلم معايا في دا و لو من ورا ظهري طالماالكلام مش بيوصلني و انا مسمعتوش يبقي لا يعنينين في شئ
دي نقطة, و بجد اهم شئ القناعة الداخلية للفرد

المشكلة الاهم بقي ان لو الكلام دا بيجيلك من اقرب الناس ليكي و هم اهل بيتك
هنا تكمن المشكلة الحقيقية
لان دول مش هينفع تخليهم علي مسافه منك

و ا لله بصي الماكياج في رأيي فلسفته انه يظبت الدنيا مش لفت النظر او ما الي ذلك و الجمال مش وحش يا رفقة انا مش بتكلم علي كدا بتكلم علي المبالغةف ي لفت النظر و الاهتمام المرضي بصورتي عند الناس

علي فكرة بجد الموضوع مش مرض بس فعلا دي طريقة اصيلة للحكم علي الناس و الناس دي سوية جدا جدا و كويسة كمان بس دا مقياس من مقاييس حكمهم علي الناس اقصد بالمحمول و العربية

عارفة ا نا لله الحمد لا اعاني من هذاالامر علي المستوش الشخصي و لا حتي اصحابي كدا لاننا كلنا زي بعض و لكن انا لفت نظري الامر دا عند ناس ولاقيت كم المبالغة في الامر مش ممكن

عامة بجد
كبري دماغك و خلي همك رضا الله فقط و هتلاقي ان الناس رضيت عنك كمان بشكل لم تكوني لتتخيلينه
*************************************
خالص التحية لكل من شارك بالتعقيب

:)

أحمد كمال يقول...

أختي في الله شمس الدين ، أحييك على هذا الموضوع ، و أتفق معك 100% ، و كنت أحب ان أغطي نفس المشكلة الاجتماعية في رحايا العمر ، و لكنك أجدتي العرض حقيقي ، فتقبلي تحياتي

العميد ميت يقول...

عزاء دكتور عبد الوهاب المسيري سيكون يوم السبت 5-7-2008 بعد صلاه العشاء بمسجد عمر مكرم إن شاء الله

مسلم من مصر يقول...

السلام عليكم
أختى شمس
السجن الذى تكلمتى عنه له آثاره السلبية المدمرة على مجتمعنا, و على مستقبل بلدنا و أمتنا
و لو تكلمنا عن اثره فى جزئية معينة تناولتيها, و هى الزواج, سنجد أن الشروط التعسفية التى يضعها الكثير من الأهل, تسد الأبواب فى وجوه الكثير من الشباب
و مع سوء الحالة الاقتصادية, فإن بعض الناس بدأوا يظهرون (بعض) المرونة فى هذه الشروط, لكن أجزم أننا لو شققنا عن قلوبهم, سنجدهم يفعلون هذا بدون اقتناع, و يفكرون فى منظر البنت و هى تتزوج فى مستوى أقل من بنت خالتها, أو تأخذ شبكة أقل فى المستوى من بنت عمتها.
كل هذا يندرج تحت مسمى النظرة المادية الاختزالية للإنسان, حيث يتم تقييم الإنسان على أساس المظهر و المادة, و يختزل فى صورة حساب فى البنك,و سيارة, و شقة , و شاليه, أو حتى كيس من الدنانير
أعتقد أن ثقافة الاختزال هذه من الثقافات التى نحتاج لأن نخلص المجتمع منها, فهى تتنافى مع رؤية الإسلام المجملة فى قوله تعالى:إن أكرمكم عند الله أتقاكم
و نسأل الله أن نكون من المتقين
و جزاكى الله كل الخير

غير معرف يقول...

انا واصحابي بنلبس عادي , و انا خريجة مدارسة لغات لكن عمري ما اتمنظرت علي جد بلغتي و لما بتكلم اجنبي فعلا لغتي كويسة ... و كلنا قمة في التواضع اساسا رغم ان اهلنا اغلبهم مناصب كويسة و معاهم فلوس كتيرة


how clever are you, modest and brilliant ?
look at what you wrote
vanity is my favorite sin

No Fear يقول...

السلام عليكم
أولا جزاكي الله كل خير علي النصيحة
.
في حاجات كتير قوي المنظرة بتكون هي الهدف منها يعني تلاقي واحد مش لاقي ياكل و بيستلف علشان يشتري علبة سجاير
أنا معايا واحد في الشغل أشتغل شغل تاني بعد الضهر علي أمل يحسن دخله الغريب إن إحتياجاته كترت أكتر من الأولو لسه بيستلف
بجد مش فاهم إزاي

يا مراكبي يقول...

موضوع رائع .. أحييكي بشدة على الفكرة والسرد معا

من معايشتي لجنسيات مختلفة في دول مختلفة إكتشفت إن السجن الوهمي ده حقيقي وبيكون في الشرق أكتر منه في الغرب

الغربيين بياخدوا الحياة ببساطة أكتر مننا وبيطوعوا الأمور المادية لتحقيق المتعة في الحياة مش العكس .. لكن إحنا بنخنق نفسنا بالسجن الوهمي ده وبنخليه يحد كتير من إستمتاعنا بالحياة وبيخلينا نوجه مواردنا لإقتناء أصول مادية بدل ما نوجهها لحاجات تانية تبسطنا وتسعدنا زي الخروج والفسح والسفر إلخ

أنا جوة السجن ده على فكرة مش براه

محمد عبد الغفار يقول...

لكل شئ فى حياتنا ابتكرنا مظهر ما ليعبر عنه ، ثم صار حرصنا على هذا المظهر جنونياً

اكثر من حرصنا على الشئ نفسه

آفاق الحرية يقول...

بس هي ده طبيعة البشر في كل مكان
نفوس وطبائع مهما كانت درجتها

layal يقول...

اصبتي بتسميته سجن وهمي
حقا هذه الشكليات تجتاح مجتمعتنا بشكل كبير لدرجه اخذ القروض من البنوك والتقتير علي النفس في سبيل نظره رضا من اشخاص لا يهمك امرهم والعكس لا يهمه امرك كل ما في الامر مظهر اجتماعي
الاولي هو البحث عن الراحه النفسيه
وهذا ما اعمل به دائما بغض النظر عن رأي الاخرين

الجدة بــدر يقول...

السلام عليكم ..

في هذا الموضوع بالذات كنت أتحدث مع صديقتي .. فالسجن الوهمي لا تقتصر نظرته فقط على المظاهرالمادية .. وكلام الناس عن المظاهر المادية .. لكن هناك سجن وهمي آخر ربما يكون أقوى .. وربما يكون نوع آخر من نفس السجن ..

مثلا حينما أبدأ النقاش مع أي أحد سواء بداخل المنزل أو خارجه عن عدم رغبتي في الاستمرار عملي كمدرسة لأن هذا ليس تخصصي كما أني لست تربوية .. ولا يصح لي تحمل مثل هذه المسؤلية .. تكون دائما الكلمة المتصدرة إليّ هي .. " هوا حد لاقي شغل دلوقتي .. احمدي ربنا واقعدي ساكتة .. أو .. خليكي فيها لحد ما تلاقي شغل تاني " .. وهكذا إلى أن تمر السنوات فأجد نفسي بعدها لازلت في مكاني ولم أتحرك منه .. ولا يهم إن كنت أتقنت عملي أم لا .. , فهذا أيضا يعتبر سجن وهمي يحكم على اختيارنا لمسار الحياة كله ويؤثر في المستقبل أكثر مما قد نتوقع .. وليس فقط الموبايل والعربية .. , مثل أن ترفض تعلم ما تريده مثلا .. لأن الناس تنتظر مني شيء آخر .. , ومثل أن ترفض السفر لأن الناس ستقول ترك أهله ...... , والأمثلة لا تنتهي .. وقد يضيع بين أرجلها الكثير من الطموحات والأهداف التي ترغب في تحقيقها لكثرة القيود التي تمنعك من الخروج من كل الأبواب الموجودة بالغرفة الضيقة التي تقف فيها .. ولخوفك من فتح أبواب لهيب ألسنة الناس ..

فإذا كان الأمر هكذا .. فلما لا يأخذ كل جيل أوراق ملكية الجيل التالي ليقول له : إفعل ولا تفعل .. مش مهم تختبر حاجة .. ومش مهم يكون ليك اختيارات .. اعمل زي ما الناس بتقول وبتعمل وبس .. " كما كان آباؤنا الأولون " .. ويستمر الأمر على هذا الحال ..

أرى ذلك السجن الوهمي يتعدى حدود المادية إلى تشكيل شخية مماثلة منسوخة .. تكبر لتجعل من يليها مثلها بلا وعي أو إدراك ..

لهذا فـ فتح أبواب جهنم كما تقولي ربما يكون الحل الأفضل لتوفير فتح تلك الأبواب مرة أخرى على من سيتبعونا .. على الأقل .. ليشعروا فعلا أننا حققنا من أجلهم شيء وتركنا لهم شيء أكبر منه ليحققوه .. ليجدو معنى الانتماء والرغبة في بناء حياه لها معنى جديد وآفاق بلا حدود .. فهذا هو السجن الذي أرغب في أن يحاوطني دوما .. أينما كنت ...


أشكرك كثيرا ^^ ...

أميرة محمد محمد محمد يقول...

ده رأيييييييييييييييييييييييييييي دايما يا شموسه بس في حاجه تانيه مهمه ان احنا بنحب نظرة الناس عشان بتسبب لنا اشباع في حاجات احنا عايزينها
الغلط فينا احنا مقدرناش علي نفسنا وسمحنا للناس بهذا التدخل السافر
ربنا يعزك

شــــمـس الديـن يقول...

السلام عليكم و رحمة الله و بركاتة

الفاضل الكريم احمد كمال
بجد سعيدة انك عرضي عجبك للدرجة دي

بس بردوا اعرض الموضوع دا لان اكتر من وجة نظر بتثري القارئ

نورت

*************************************

العميد ميت
جزاكم الله خيرا و ذهبت بالفعل و لكنه كان بعد المغرب , البقاء لله

***********************************

الاخ الكريم الفاضل مسلم
حلو اوي تعبير النظرة المادية الاختزالية للانسان بجد فعلا تعبير بيرصد كثير من الظواهر في حياتنا

بس هي المشكلة ان الناس اغلبهم اختلط عليهم المعايير , و بيقعوا في غلطة انهم لما بييسروا مش بييسروا مع ناس تستاهل , فبيتقال ان البنت فيها عيب و عايزين يخلصوا منها !!!!!

كلها صراصير نفسية معششه جوا الاغلب الاعم من الناس
خالص التحية علي المرور الجميل

***********************************
Anonymous
كنت اتمني انك تدخل تكتب باسمك يا دوك

عامة انت اسلوبك معروف

و الله مش اقدر اقوللك غير ن فيه ناس بتحاول تترصد و تفصص الكلام و تطلع منه الاستدلالات اتعودت تاخد كل شئ و تفسرة بمحمل سوء النية ... دا مش غريب علي الدماغ المصرية عامة

و شكرا بجد انك لفت نظري لشئ في اسلوبي و ان شاء الله ذله اللسان دي مش هتتكرر تاني

***********************************
الفاضل نو فير

ما هي المنظرة سببها ايه ؟
ان الناس عايزة تبان جوا عيون الناس انها الافضل دوما

ببساطة صاحبك دا مش عارف يوظف فلوسة صح او ممكن بالبلدي كدا ربنا مش مبارك في رزقه

***********************************

لفاضل الكريم باشمهندس القاضي

اولا شجاعة منك اوي انك تقول انك من ضمن الناس اللي جوا السجن
انا مش هقدر اقوللك شئ بس حاول انه مش يخنقك او يعميك عن ناس كويسة ممكن تكون حوليك

اقتناء اصول مادية

يعني الدهب مثلا و المحمول
صح ؟

خالص التحية للمرور و متبقاش تغيب عننا

***********************************
الفاضل الكريم محمد عبد الغفار

بجد رغم انك بتعلق قليل و لكن كلمتك دي تتحط في لوحة

اصبت كبد الحقيقة

***********************************

الفاضل الكريم افاق الحرية

معك حق تماما هي محاولة لرصد بعض طبائع هذه النفوس , و علي فكرة اناعارفة ان الناس مش هتتغير بس يعني امل اننا نحاول نغير من وجهات نظرنا شوية

خالص التحية
***********************************
العزيزة الغالية ليال

كويس انك وصلتي للاتساق النفسي دا
مش سهل ان حد يتحرر من السجن بجد

خالص التحية

***********************************

الفاضلة الكريمة الجدة بدر

اولا بحب ارحب بيكي اوي علي المدونة و يا رب الزيارة دي تكون الاولي و مش الاخيرة

الموضوع اللي اتكلمتي فيه دا موضوع مهم فعلا , و دا مش سجن لانك في الحالة دي مش بتحرصي علي رضاء الناس و لكن الامر اللي بتحكي فيه دا عبارة عن ان الواحد بيخاف من المجهول , او نقص روح مغامرة
بجد انا اتعودت في حياتي اني استعين علي قضاء حوائجي بالكتمان
لسبب لان الناس بتثبط عزيمة اي حد عايز يعمل اي شئ جديد ايا كان حتي لو كان مجرد خروجة

خلي ليكي ناس معدودة كدا ذوي الحكمة و خدي رأيهم في الحاجات المصيرية دي و توكلي علي الله

عارفة انا اخدت راي الناس في التكليف و فعلا بندم اني سمعت الكلام لاني اتدبست بس ان شاء الله خير

شكرا علي تعليقك اوي و انك شاركتينا بقصتك

***********************************
الفاضلة الكريمة اميرة

صحيح
انت معاكي حق فعلا و مش عيب علي فكرة
بس المشكلة لما الامر دي يزيد اوي عن الحد و الواحد يبقي عايش حياته كلها علشان خايف من نظرة الناس تقول عليه ايه

دا بيتحول مع بعض الناس لمرض فعلا

نورتي المدونة يا قمر

غير معرف يقول...

I am not a doc
please don't take it personally, i didn't mean to offend you , okay?
. what i wanted to say that we all play the same game ..but may be on different levels...
I personally think it is an instinct.everyone would like to feel recognized and special among others. different people do different things to reach this target...some buy new mobiles, some try with clothes, some with deep thoughts..

شــــمـس الديـن يقول...

حسنا لن اخذ الامر بشكل شخصي ... و اتفهم وجة نظرك تماما

و لكني اتمني ان تتفهمني ايضا في انني لا انشد التميز من خلال التدوين ... لسبب لانه لا احد تقريبا يعرفني في الحياة الحقيقية و علي النت ... فالنت عالم منفصل تماما عندي و لست و لله الحمد ممن يريدوا تعويض نقصا في الحقيقة علي النت فالحمد لله لي شخصية متميزة في الحقيقة ايضا , و ليس هذا غرورا و لكن رحم الله امرء عرف قدر نفسه فاعزها

انني ادون فقط لاني اريد عرض وجة نظر و ان رغبت حقا في التميز من خلال الكتابة لرأيتني في كل مكان و اظهر في كل تجمعات المدونين و هذا لله الحمد ليس في و حاولت قدر الامكان ان اجعل عملي خالصا لله و ليس لنيل رضي الاشخاص

و علي فكرة لو محدش علق عليا بردوا هفضل اكتب... و فيه مدونة ليا فعلا انا بكتب فيها و مفيش تعليقات عليها و مع ذلك مستمرة في الكتابه
يعني
انا متفهمة كلامك بس حاول تتفهم وجة نظري بردوا و مرحبا بك دائما علي صفحات المدونة :))