السبت، يوليو 19، 2008

الظاهرة تحولت الي وباء ... ربنا يجعلنا من المصابين


كل ما حد يتكلم ... يقول ان وضع البلد صعب , مش عارف ايه

الواحد اتخنق


كثرة الكلام عن الاشياء المحبطة بتصد النفس و بتجيب كئابة و العياذ بالله ...و الكئابة دي بتقلب انها تكون طبع ... يعني تلاقي حد بقي كئيب و طول ما هو ماشئ يفتش عن الكئابة حتي لو كل الموضوع كويس و لذيذ
محدش يخلط الامر و يفتكرني بتكلم عن نفسي انا بقرر واقع في تدويناتي و لكن مش اقصد اكتئاب :))


ومن الجميل انك تشوف اللي حوليك مبسوط , لان الحزن عدوي و الفرح
كمان عدوي ... و زي ما بيقولوا جنة من غير ناس ما تنداس


الكلام عن الحب متجدد بتجدد الحياة نفسها , لانه هو سر الحياه ذاتها
و لا اعتقد ان احد يكل او يمل منه لان لكل واحد رأيه الخاص و المتفرد و الجميل فيه

و علشان كدا اجمل شئ علي الاطلاق في رأيي هو الارتباط الصحي( اللي في النور اقصد او بيطلع للنور سريعاً) لانه بيحيي الروح و الوجدان و بيدي الهام و قوة منقطعة النظير ... بيحسسك ان الحياه ليها قيمة و تستحق اننا نعيشها علشان الللي بنحبهم فيها ان الواحد مش لوحده و هناك من يشاركه اماله و طموحاته و يسير معه في الطريق , لم يعد الطريق موحش بعد الان فلم اعد وحدي .
اظن ان الحب هي اجمل نعمه اعطاها الله للبشر , و لا اتحدث عمن يسئ استخدامها ,,, اتحدث عن الارتباط الصحي لا تنسوا


الشهر دا او الفترة دي بجد فيه كمية ناس اعرفهم - اتخطبت او اتكتب كتابها
فعلا و الله حاجة تفرح
كل يوم اسمع او اعرف خبر خطوبة فلان او فلانة ... كتب كتاب اتعزم عليه و تحول الظروف ان اذهب ... و حتي هذه اللحظة مازلت اسمع عن حالات اصابه عفوا الارتباط كتيرة اوي


يعني بدأنا بايهاب عمر وسمراءو الديبو احمد سمير الاغلبية الصامتة
و عبد المنعم انا اخوان و
و خطيبتة ايمان عبد المنعم
و ازميرلدا و حباصة حين البأس و مستنية الفرج
اللي ملونتهمش دول لم يعلنوا علي مدوناتهم
دا غير الناس اللي اواحد سمع عنهم الفترة الماضية اللي خارج الوسط التدويني و من اصحاب اصحابي ...
و يتراوح الامر بين خطوبة و كتب كتاب
المفرح في الامر ان فيه منهم من تعب و صبر و قاسي طويلا كي يتكلل نهاية هذا المشوار من الحب العفيف بالتتويج الجميل


بجد بجد الف الف مبروك للجميع ,الواحد فعلا فرحان ... لانه بالرغم من كل شئ و كل السواد و كل اللي حاصل في حياتنا الا ان دي ارادة البقاء ... ان الارتباط الجميل دا بيقول زي ما قالت جوليا ...نرفض نحنا نموت ... قلولون راح نبقي
انا فعلا سعيدة جدا و ان شاء الله الواحد يكون في عداد المصابين ... ازاي و امتي لا اعلم و لكني اشعر ان بداية الغيث قد بدأت و عقبال الكل يا رب :))



هناك 16 تعليقًا:

أحمد أبو خليل يقول...

سعد جدا هذه المرة بأن أكون - ولو لمرة - أول المعلقين ، كى لا تتهمينى بالتقصير فى حق التعليق .

وبرغم ذلك فإن تعليقى أيضا ليس مجرد تصفيقا ، هو ذلك حيث يرتفع قلمك فى نظرى ، قلمك الذى لم يكتف بالتقاط كل ما هو سلبى ومسكوت عنه ، أو مخبوء عنا ، وإنما يثبت أنه قلم حقيقى ويلتقط أيضا كل ما هو جميل ورائع فى حياتنا .

وهو - التعليق - أيضا ليس كذلك ، حينما ألاحظ - عبر تصفحى لروابط المدونين والمدونات سعداء وسعيدات الحظ - أن الاهتمام بحجم الظاهرة الإيجابية ، ليس بقدر الاهتمام بالظواهر السلبية الأخرى .

فأى ظاهرة سلبية لا نكتفى بالتأفف منها ، أو إطلاق ألفاظ الضجر ، بل نقوم بـ " تجريسها " ، وتحليلها ، وبيان آثارها ... إلخ .

أما هذه الظاهرة الإيجابية فقد يكتفى الكثيرون بأن يقولوا : باركووووووووووووولى اتجوزت ، عقباااااالكم خطبت !

أتمنى أن نهتم بهذه النجاحات ، وأتمنى أن يدون أصحاب هذه النجاحات أكثر عن تجاربهم ، ومراحلهم ، ومشاعرهم ، وكل شىء جميل فى هذا الميدان .. ميدان الحب

فاتيما يقول...

يا خراشى يا شموسة على قلبك الحلو
بقى عاوزة تبقى من جملة المصابين ؟؟
طب يا ستى ندعيلك
و مبروك لكل الإسماء اللى كتبتيها
و ربنا يسعد أيامهم و يفرحوا و يفرحونا معاهم
الواحد بيكون سعيد لما يلاقى ناس نجحت فى تجسيد الصورة الصح للجواز و اللى مفروض تكون عليه
ربنا يوفقهم فى حياتهم يا رب
و يوفقك إنتى كمان يا شموستى
وموافقين تبقى من ضمن المصابين
بس بشرط إن إصاباتك تكون سطحية بدون جرح غائر
ماشى ؟؟

صباح الخير يا مصر يقول...

ربـة الســـــيـف و القــلـم
**************************
عقبالك انتى كمان يارب
......و نفرح فيكى
قصدى بيكى

تحياتى

سبهللة يقول...

ايه القلب الطيب دة ؟؟
والروح الجميلة دى؟؟
انتى حلوة اوى يا شمس
اللهم ارزقك بالزوج الصالح والذرية الصالحة ان شاءالله

ابن رشد يقول...

انا قلت مبروك زيك بالظبط لناس كتير منهم
بس على الميل
و عقبالك و عقبال كل الناس لما تبقى حياتهم فرح و فرح

... يقول...

مبروووك ل كلهم وعقبالك
صحيح الفرح معدي
وياريت ندور علي السعادة ياريت

مشاعرك جميلة جدا

Ahmed Kamal يقول...

يا ستي عقبى لك و يا رب نفرح بيكي و ربنا يرزقك العريس الحليوه (أحلى من مهند) الغني (أغنى من عز) المشهور (أشهر من أبو تريكة) الملتزم و لا نزكي على الله أحدا :)

محمد يقول...

ألف مبروك للخطاب
:)

أظن أنها حالة انتشرت في البلد كلها
كثير من أصدقائي ومعارفي تزوجوا والبعض الآخر اتخطف .. عفوا عفوا .. أقصد خطب

ربنا يصيبنا ما أصابهم
:D

يا مراكبي يقول...

ههههه .. بوست ظريف جدا .. ربنا يكرمك ويجعلك من المصابين برضه .. إنتي وكل اللي لسة ما إتجوزوش

تستاهلوا

------------

البوست اللي فات رائع رائع رائع

سعدت جدا بتحليلك لعبارة: كما تكونوا يولى عليكم

فكرة جريئة وعقلانية جدا .. ربنا يكملك بعقلك

إستئصال الرأس هو الحل فعلا

عاشــــــ النقاب ـقــــة"نونو" يقول...

السلام عليكم
الف مبروك للمصابين الجدد
وعقبال ما ربنا يكرمك بالزوج الصالح
تحياتي

شــــمـس الديـن يقول...

اولا انا بعذر عن التأخير في الردود

السلام عليكم و رحمه الله و بركاتة

الاخي الفاضل احمد أبو خليل

و الله ابدا هو مش فرض يعني علشان بعلق عندك ترد لي الزيارة لأ طبعا

و فعلا انا افضل التعليقات اللي هي مش تصفيق , حتي لو كانت مجرد جمله تلفت الانتباه لشئ

و الله شوف انا معاك ان فعلا ناس كتيرة بتحلل ظواهر سلبية , بس فيه ناس بتبعد عن تحليل الظواهر الايجابية دي يمكن خوف من الحسد او ماشابه لان فيه ازمة ليست بقليله و لكني حاسة انها قربت تنفرج

سعيدة فعلا بمرورك و ربنا يديم المعروف
خالص التحية

**********************************

العزيزة الغالية فاتيما
يعني الواحد يجرب مرة من نفسه شوية :)

فعلا انا معاكي و انت علي فكرة اللي قلبك اجمل و مليان حب و خير كتير اوي لكل ا للي حوليكي و حزنك علي نفسك لم يجعلك مثل الاغلب التي لا تتمني الخير للاخرين
انت شخصية رائعة حقا و ربنا بارك فيكي دائما

ان شاء الله :)

***********************************

الفاضل صباح الخير يا مصر
اولا مرحبا بك و بمرورك علي المدونة لاول مرة

و شكرا علي الدعوة

***********************************
العزيزة سبهلله

مش عارفة بس حاسة انك بتبالغي
اصل اي حد هيحس بكدا انا مش حاجة غريبة دا الطبيعي اصلا

انت اللي عينك حلوة علشان كدا شايفة اللي حوليكي حلو

اللهم امين :) شكرا علي الدعاء الجميل

************************************
الاخ الفاضل شمس الزناتي

الله يبارك فيك و جميل الروح الحلوة دي لما تكون منتشرة

رروح التهاني و الفرح

مشكور علي مرورك

***********************************
العزيزة بثينة

انت اللي بجد جميلة
انا بحب اتلكك علشان افرح و اتبسط و ياريت الناس متفتكرش اني علشان بقرر اوضاع او بنتقد اني لابسة نظارة سوداء

بجد فرحني مرورك و تعليك

***********************************

الاخ الفاضل احمد كمال

ايه الدعوة الرائعة دي !!!!!

بجد انت بتعزني اوي
سعيدة بوجود اخ كبير مثلك لي

بس علي فكرة ... لا واحد احلي من مهند ولا اعني من عز ولا اشهر من ابو تريكة ممكن يضمنوا لي السعادة ... اهم شئ التوافق الروحي و النفسي و توافق في حاجات تانية ... ربنا يبارك لك يا رب :)

خالص التحيه علي المرور الجميل و المشاعر الطيبة دي

***********************************

الاخ الفاضل وضاح

ايوة مش كدا ؟؟؟
انا بقول بردوا

كويس و الله ان حد معايا حس بان الامر بقي اشبه بالوباء

عقبالنا جميعا :)

***********************************

الاخ الفاضل المراكبي

طيب ماشي انت دعيت .,.. نستاهل ايه بقي !!! انت فرحان فينا ولا ايه مش فاهمة !!!!

اما بالنسبة للبوست الماضي
بجد كون انك تشهد لي بكدا
فدي شهادة ا عتز بها
و كون ان التحليل نال اعجابك فهذا يكفيني

خالص التحية علي التشجيع الدائم لي :)

**********************************

الاخت الفاضلة عاشقة النقاب

الله يبارك فيكي
و يكرمك علي الدعاء و يتقبله ان شاء الله

**********************************

خالص التحية لكل من اسعدني بالتعليق

أبو خالد يقول...

أبنتي الغالية شمس
سعيد بالتعرف عليك
أنتي هدية جميلة من الله لي
ادعو الله العلي القدير أن يجعلك من السعداء في الدنيا و الآخرة
دمتي أبنة فاضلة

No Fear يقول...

السلام عليكم
ربنا يبارك لهم كلهم

و ربنا يبارك لك يا منذر

هي المشكلة إني كل أما أقول أنا رايح فرح و لا كتب كتاب لازم يكون وراها خناقة مع أمي علشان الموضوع ده

ربنا يوفق الناس كلها يارب

الحامد للمقاومة القانونية يقول...

الحياة من طبيعتها متقلبة غير ثابتة، والانسان يصنع الواقع ولكن تصنعه الحقيقة، والحقيقة أن كل انسان سوف يسأل عن كل شئ فعله فاليوم عمل بلا حساب وغدا حساب على هذا العمل، فاعمل لغد تستقر اليوم
زورونا فى www.islamqadm.blogspot.com

walaa rizk يقول...

مبروك ياشمش لكل الناس اللى ربنا اكرمهم وكلل قصصهم بالنجاح ووفقهم لبعض

وعقبالك ياجميل

وهيا فعلا عدوى وماشيه اليومين دول

تقبلى مرورى

ياترى لسه فاكرانى ولا لأ

عاشقه الأقصى

د/اجدع بنوته يقول...

يااااااااااااااارب

اللهم اميننننننننن

ونصاب عاجلا باذن الله

ربنا يوفق الجميع يارب

ويرزقنا كلنا بالشريك الصالح

يااااااااااارب

ويوفق كل اللى ذكرتى اسمائهم دول