الجمعة، مارس 23، 2007

ولا عزاء للشرفاء







السلام عليكم و رحمة الله و بركاتة




موضوع التعديلات الدستورية هذا يشغلني منذ فترة و لمن لا يعرف ما هي التعديلات تفصيلا سوف فقد افردت التدوينة السابقة لذلك فقط للاطلاع


ولا ادري ما الذي يمكنني فعلة, فهذا الشئ بالذات يخص كل المصريين دون اي تفريق ... وليس من واجب طائفة دون اخري ايا كانت ان تتصدي لهذه الجريمة وحدها ... لانه و بساطة لن يمسنا نحن فقط و لكنه سوف يكون ميراث مشؤوم تعطية لابنائنا و احفادنا دون ذنب منهم و سوف يناضلون طويلا كي يصححوا خطأ لم يرتكبوه هم ...

تسائلت ... كيف يمكن ل بضع الالف من البشر الذين هم من المفسدون في الارض ان يتحكموات في مصير 75 مليون نسمة دون اي مقاومة تذكر ... تذكرت الايه القرأنية البليغة " فاستخف قومة فاطاعوه " و من اللطائف انها قيلت ايضا عن مصر اثناء حكم فرعون لها ...

لابد ان ينهض الشعب كلة مواجة هذا الظلم و الفساد ... لا ينبغي ان تسري علينا نظرية القرود الخمسة ولا نقاوم و نستسلم لها فقط هاكذا و اثناء سيري للعمل قولت ان اي اعتراض لن يكون فعال الا اذا توحدت كلمة الشعب ...ووعي ما هو مقبل عليه من مهزلة

قولت لابد ان اكلم عينة عشوائية من شعب مصر و هذا سوف يعطيني مؤشر جيد لمدي وعي الشعب و بالتالي الخطوة التاليةالتي يمكننا فعلها

و نظرا لاني احب ان اعامل المرضي في الصيدلية التي اعمل بها بطريقة ادمية ... فمن المعتاد ان افتح معهم حوار عن سبب المرض و العلاج ... و اعتبر انه لابد ان اوفر لهم الدواء باي شكل و علي ذلك نتعامل مع الصيدليات التي حولنا في توفير الدواء و اثناء الطلب ينتظر المريض و في هذه الفترة انتهزها فرصة لاوجة الحديث كما اريد ... و كانت هذه هي ردود فعل عينة عشوائية من الشعب ... عندما طرحت عليهم السؤال في وسط الكلام ... ماذا تعني بالنسبة لك التعديلات الدستورية ....

الاولي : امراة غير متعلمة و متزوجة و ربه منزل .... و حين قولت لها السؤال لم تفهم سؤالي اساساُ ... و لم تستوعب ما الذي اريد ان اقوله !!!

الثانية : مدرسة فلسفة – اي تتعامل مع شباب في الثانوي - و متزوجة و لم تستوعب السؤال ايضا و اجابت ...انهم يقولون منذ عامان انهم سوف يجرون تعديلات علي اعضاء هيئة التدريس ليجعلوها "كادر " مثل البنوك و يرفعوا مرتباتنا العدمانة دي كل مرة يقولوا اول يوليو و لا حاجة بتحصل ... مش دا اللي تقصديه !!! قولت لها لأ حضرتك انا اقصد حاجة تانية ... مسمعتيش عن حاجة كدا ... قالت لا و الله بس افتكرتها زي تعديلات المرتب ... ما هوكله تعديلات و كلها فشنك الظاهر !!!!

الثالثة : ربة منزل متزوجة ولا تعمل ولا تقرأ ... تري ان التعديلات شئ جيد !!! قولت لها كيف ؟ تقول ان مشكلة الناس في البلد دي انهم بيبصوا تحت ارجلهم و من زاوية واحدة ... طبعا هما مغفلين و مش باصيين للامر ككل ... و بالبداهة كدا و مش عايزة مفهومية طالما تعديل يبقي هيعملوا حاجة احسن يبقي ازاي وحشة !!!! قولت لها طيب انت ايه اللي شايفاه كان وحش و اتعدل للاحسن ... قالت : هو بصراحة ربنا انا بشوف ناس في التلفيزيون بيتكلموا كلام كبير كدا و شكلهم فاهمين بس مقدرتش افهم كلامهم اوي بس اللي فهمتة انهم بيقولوا ان التعديلات كويسة ... فابتسمت لها و لم اعقب

الرابعة : ربة منزل ولا تقرأ و متزوجة عندها فكرة مشوشة عن الموضوع قالت ... ايوة سامعة ... مش دول اللي بيقولوا انهم هيلغوا اي حاجة للغلابة و الرغيف ابو بريزة – عشرة قروش – مش ميكون موجود و ولاد ال ........ (حذفتها للذوق العام لان الناس دي ممكن تقول الفاظ صادمة بس مش يقصدوا حاجة وحشة ) هيلغواالاسلام !!!! دي من علاماتالساعة ربنا يرحمنا و مشيت و هي بتقول حسبنا الله و نعم الوكيل في اللي كان السبب !!!!

الخامسة : متزوجة و تعمل اخصائية اجتماعية في مدرسة بنين – لانها تكره الفتيات - و عند سؤالها قالت بما معناه انها سمعت عن حاجة بالنظام دا و لكن هي اخر حاجة ممكن تعملها في الدنيا انها تقرأ الجرنان او تسمع نشرة الاخبار و هي تعتقد ان دا عالم خارجي بعيد عنها تماما و لن سؤثر فيها و هي تفضل الاهتمام بمشاكلها التي تخصها هي و تلمسها لانها مشغولة و معندهاش وقت للحاجات دي

قولت ربما لاني اختارت العينة من النساء كان هذا رأئهن ...

و انتهزت فرصة رجل انهار عندما سمع عن سعر علبة برشام ب 32 جنية عشرة اقراص !!!! و ظل يردد دا حرام انا معايا غيري معهوش ...الناس تموت ولا يحصللها ايه ة عندما طرحت سؤالي في وسط الكلام لم يستوعب ما قولته و لمحت في نظرتة تساؤل ما الذي تقوله هذه الدكتورة و قال لي هو دا حاجة جديدة في العلاج ولا حاجة ؟؟؟ قولت له لأ ابدا ( و طبعا مكنتش فيه فرصة اعرف عنه معلومات مستفيضة كما عرفتها عن النساء )

و سئلت عامل التوصيل عن هذا الامر قال لي ؟؟؟تقريبا دي سياسة يا داكتورة ؟؟؟ قولت له يعني حاجة زي كدا ...قال لياصلي بطلت من زمان اني اقرأ في الحاجات دي ... هوجع دماغي و هتعب اعصابي و في الاخر اللي عايزين يعملوه هيعملوه ... فخلاص ملهاش لزمة

و لكن من حزت في نفسي بشدة ... فتاه غير متزوجة في المترو ...مصرية جدا جدا جدا , ولا شئ مميز فيها شعرت انني اريد ان اسئلها , توحست مني خيفة بالطبع في الاول و قالت لي يعني بسمع عن الموضوع لكني مش مهتمة ... قولت لها طيب و سكت ...فوجدتها هي من تكمل الكلام و قالت يعني انت تعرفي انهم صوتوا علي الامر مساءُ دون حضور المعارضين كلهم طأنهم بيعملوا عملة ... بذمتك دا ايه ؟؟؟ قولت لها طيب ما انت متابعة كويس الموضوع اهه... انت بتشتغلي ولا بتدريس ؟؟؟ قالت انا خريجة تجارة من سنتين و عملت اللي ما يعمل علشان اشتغل ... اخدت كل الكورساتا للي قالوا عليها و كمبيوتر و اتمرتن كذا شهر بدون اجر في مكتب محاسبين ... و كل اللي لاقيته بياعة في محل ملابس ... كل زملائي معاهم معاهم دراسات عليا و لكن مفيش شغل البلد مقفوله ... قولت لها طيب الوضع اللي انت فيه دا مش يخليكي غضبانه و مخنوقة و عايزة تغييري ؟؟؟ ... قالت و ان افي ايدي ايه اعملة .,انت تسمعني عن الاخوان ؟؟؟ قولت لها يعني ... قالت لي انا اعرف واحد كان يعرفهم مباشرة و كانوا من الناس اللي عندهم استثمارات و اغنياء عارفة لما قالوا لأ ايه اللي حصل لهم ؟؟؟ اتبهدلوا و اتحفظوا علي اموالهم و حاكموهم محاكمات عسكرية رغم انهم مش في الجيش !!! انا بقي اللي لا اساوي في نظرهذه البلد جنية واحد هعمل حاجة ... داانا اروح ورا الشمس و مش هيكون ليا ديه ... انا الحمد لله ان والديي بيصرفوا عليا و الحمد لله مستورة ... قولت لها ربنا يوفقك في حياتك ... قالت هي ملهاش حل اساسا








بعد تأمل هذه العينة من الشعب عرفت انهم نجحوا في ان يجعوا كل منا له تفكير سلبي متفرد لا علاقة له بالجماعة التي يعيش فيها ... لا ادري ولكن اتذكر عندما تصديت لانتخابات اتحاد الطلبة و صمننا زملائي و جميع المحترمين في الدفعة ان نجعلها انتخابات نزيهة ( و كانت المرةالاولي التي يتم اعادةالانتخابات في تاريخ الكلية لاننا اشرفنا عليها بانفسنا لان العدد لم يبلغ النصاب المحدد) ... كان الطلاب العاديين في البكالوريوس لا يعرفون كيف يملئون استمارات انتخابنا ... و كيف لم يستطع العميد السابق المعين الذي يردد كلام الكبار الرد علي من قال ان موضوع الغاء السياسة من الجامعه هو قرار فاشل من اساسة و يضيع اي معني للحياة الديمقراطية التي تنادون بها ... لا ادري و لكني تذكرت ان الموقفين متشابهيين الي حد كبير ...

عرفت الان الحقيقة ... شعبنا حتي وان بدا متعلما فهو جاهل - اي غير مثقف ولا يعيش غير لنفسة فقط – و اننا لن نفعل شئ الا اذا نهضنا نحن جميعا و ليس احد دون الاخر للتصدي لهذه المهزلة ... ليس هذا الوقت المناسب لانه مهما فعلنا الناس في غيبوبه ...

اعلم انها تدوينة مملة و لكن لم استطع ان اختصرها اكثر من ذلك ...



تحديث :
موقفي اني استمعت لكل الاطراف و اقتنعت باني لن اعطي لمسرحيتهم الهزلية شرعية و اذهب لتمثيل الدور الذي رسموة لي ..انا
شغلي اهم من المشاركة في هذه المهزلة
و عذرا علي عدم الرد و لكن انا فعلا حالتي النفسية مش مستحملة اساسا , ولكن سأعود قريبا :)

هناك 40 تعليقًا:

إيمــــان ســعد يقول...

جدعه يا شمس

و فعلا

النتيجة كانت
صفر من عشرة

لصالح النظام الحاكم
اللى خلى الناس مجرد قرود اخرى

تخاف من اى شئ

و كل شيئ

تحياتي

TAMTAM يقول...

واكتر يا بنتي العينة اللي انتي سألتيها كان في وسطها ناس مش متعلمة
لكن تصوري طلبة في كلية هندسة كل همهم ستار اكاديمي وممكن مايكنوش سمعو اساسا عن التعديلات الدستورية
طلبة كل همها حفلة رامي صبري يحضروها ومش مشكلة يقولو لأ

طلبة بصتلي على اني ارتكبت جناية عشان بقلهم دخلت القسم عشان عايزة اطلع بطاقة انتخابية
ولسة ياما حنشوف

الراقـــص مع الذئـــــاب يقول...

السلام عليكم
من زمان اوي مدخلتش مدونة سياسية محترمة
كل اللي بدخلهم مش بلاقي فيهم غير شتيمة وهتفات وتظاهرات وهما مش فاهمين حاجة
بس الوضع هنا مختلف

انا واحد من الناس ديه
مفكرتش اعرف حاجة ان اي تعديل في مواد الدستور....عشان عارف انه هيبقي تفصيل مش تعديل...ودا فعلا اللي توقعته وحصل
والفرح تم بالزفة اللي كانت في مجلس الشعب من ايام
وفي الاخر هقول...وانا مالي...مش رايح

غير معرف يقول...

عارفة يا شمس مشكلتك هي نفس مشكلة بنت سعد هي انكم بتحبوا البلد اكتر من نفسكم ربنا يشفي
عموما يا ستي مش هما الي نجحوا ولا حاجة علي فكرة الوضع ده مش عندنا احنا بس ده موجود في كل دول العالم تقريبا لان في حاجة اسمها حاكم وسياسي ومثقف ومواطن الاخير الي هو المواطن من المنطقي جدا انه معندوش سياسية ولا ليه اي علاقة بيها ولكن يبقا ايضا عجز المعارضة للوصل لذلك المواطن سبب من اسباب التجهيل لا تحميل النظام الحاكم اكثر مما ظلم فليس معني ادانتي في شيء ادنتي في كل شيء
____________________________________
ده مثل بسيط بيتقال علي حكومتنا ومعارضتنا وهما الاتنين غلط
في عينة دكاترة بتروحيلها بمريض سرطان دم او رئة ويقولك ده مفيهوش حاجة الله ده يعيش مية سنة دول بتوع الحزب الوطني وفي عينة دكاترة بتروحيلها بمريض عنده شوية برد او بيكح بيقولك ده هيموت دلوقتي حالا دي هي المعارضة
علشان كده الشارع انفصل عنهم تماما عن ده وعن ده بتمني الوقت الي حسني يعلنها ملكية والله هيريح ناس كتير وهيرتاح هو من هم ناس كتير ومجاتش علي 200 نفر هينزلوا التحرير بعدها

HANY يقول...
أزال أحد مشرفي المدونة هذا التعليق.
غير معرف يقول...

ازيك ياشمس

ان شاء الله اشوفك يوم الحد فى التحرير

على فكره , انا راجع للتدوين وبقوه ان شاء الله
وتقبلى تحياتى

ibn nasser - ابن ناصر يقول...

غعلا ربة السيف والقلم ويا رب اليومين دول يعدوا علي خير فيوم التعديلات الدستوريه هو يوم اسود في تاريخ مصر
وانا هتلاقيني عندك علي طول ارجو التواصل
تحياتي

غير معرف يقول...

هل تعلمين ماذا ستحصدون من هذه التعديلات ؟؟أنكسار جديد وجهل جديد
تسائلت في بلادي كيف أنتخب الناس الرئيس نفسه رغم الفساد !!!كيف أختاروه والامور من سيء لاسوء ؟؟تقول المعارضه أن هناك تزوير وأقول أنا من أستطلاع كبير قمت به أيام الانتخابات أن السبب يأس من مصداقية المعارضه وجهل بأن الصناديق قادره على التغيير أن أردنا ذلك فعلا .....وهانحن من جديد نعيد نفس الحكايه وننتظر كل يوم تعديل أذا لم يعجب السابق أحد المتنفذين الكبار
الفساد أخطبوط يجتاح العالم بسبب أنحسار القيم والاخلاق العاليه
تحياتي

النهر يقول...

بالعكس هى تدوينة كويسة جدا لمعرفة اهتمامات الناس ، و لذلك هم يلعبون من تلك الجهة ، ألا وهى عدم اهتمام بقية الشعب بما يحصل ، ولكن من قال أنه كان فى القرون و العهود الماضية كان عامة الناس فاهمين و مهتمين بما يحصل فى بلادهم ، أكان الناس فى زمن الأحتلال الفرنسى أو الأنجليزى و هم كانواأكثر فقرا وأكثر جهلا و لكنهم انقادوا وراء الأكثر دراية و الأكثر فهما من أبناء الوطن ، و الا ما خرج الأحتلال من البلد ، المشكلة فى جيلنا أن من يحتلون البلد الآن هم أبناء من أبنائها و لذلك يصعب علينا افهام هؤلاء العامة ان هؤلاء الأبناء فاسدون و عصابة فقط يجب ابعادهم عن حكم البلاد ، ويجب أن لا نيأس من التكرار ، من كان يظن قبل عشر سنوات أن ينتقد مصرى حسنى مبارك علنا هكذا ، ولا الجرائد المعارضة آنذاك فعلت ذلك ، لقد تطور الأمر الآن و هناك جيل موجود الآن هو الذى سيغير تلك المفاهيم ان شاء الله تعالى

Mohamed Almohandes يقول...

جزاك الله خيراً على هذه التطوافة الرائعة والواقعية على عقول شعبنا المصرى المطحون..
وهى فرصة ليعلم الناس أن لا أمل إلا بتعليم هؤلاء أن لهم حقوقاً فى هذا البلد التى هى بلدهم أولاً وأخيراً وليست بلد حكامهم فقط.

يعقــــوب .... يقول...

واحد صاحبي كان بيكلمني من مصر و بيقوللي شوفت يا عم التعديلات الدستوريى !!؟؟ قولنلوا مش مهتم بالموضوع ده قوي,قالي يابني أنت عبيط هتعمل زي الناس الفي القطيع إنت عارف ده هيرجع البلد لأيام زي أيام عبد الناضر الهيكلم مع مراته هيحبسوه..قولتلوا يا راجل طب ده كده تمام جدا ده أحسن حجة عشان مكلمش معاها ده كده الرجالة هتهيص أنا لازم اشترك بأه و هأيد التعديلات....و ربنا معاكوا

khaled يقول...

يا عزيزتى
الطريق طويل
اديكى شفتى العينة
مابالك بقى بالاحباط اللى عند كل الناس ويأسهم من التغيير؟
صدقينى
مفيش فايدة

BinO يقول...

زي ماقالت الحاجة والدتي
وصاحبي وحمحم
هي طبخة وكلنا لازم ناكلها
مش لازم نعرف ايه اللي بيحصل في الطبخ
الكلام ده برضه قاله نادر الحلاق
وواحد ضابط في الجيش
وسلامي لطنط وعمو وكل الأخوة في مصر المأروصة

محمد عبد الغفار يقول...

مين قال ممله ، انا ن نفسى اتفاجئت انها خلصت

الشعب جاهل ميه فى الميه صح ، انما اروح اقول لا وابقى عملت الىل عليه مش مقتنع بيها

انا مقتنع ان المقاطعه بغرض المقاطعه هى صلب الأيجابيه

تخيلى استفتاء بدون مستفتيين شكله يبقى ايه

المشكله فى المقاطعه انها لازم تكون جماعيه وده صعب اوى فى بلدنا لن اكيد هتلاقى اللى هيروح عشان وجبة كنتاكى وعشرين جنيه فى ايده

تحياتى

غير معرف يقول...

و الله يا شمس انا من يوم ما جيت مصر و انا في حوارات دائمة مع اشخاص كلهم بيقولولي انت ليه بتدون و هاتستفيد ايه
و انكم مالكومش لازمة اللي هما عاوزينه هايتعمل
اخرهم قالي انتم لعبه في ايد الحكومة علشام تثبت انها ديمفراطية و كدة كدة هاعملوا اللي في دماغهم
و قالي ابدا بنفسك و مالكش دعوة بحد
انا بعد الحوارات دي كلها حسيت ان النظام نجح في تفصيل شعب على مزاجه
لكن انا كان دايما ردي عليهم
انا على الاقل هالاقي اللي اقوله لربنا لما يسالني عملت ايه في وجه الظلم
على الاقل قدرت استغل قدرتي على الكلام
احييكي يا شمس

شخبطة ملوكى يقول...

نعم يا شمس
اعلم ان شعبنا يواجه تعتيما ثقافيا و سياسيا
وهلكه بمشاكله الشخصية ليقفل عليها بابه و يستريح و يحاول مجاراة الكل فى حربهم من اجل لقمة العيش و لتذهب الدنيا بعد ذلك كلها للجحيم
نعم نجح النظام فى ذلك و لكن الصحوة هى ما نريد ووقتها سيتغير كل ما اكتسبه النظام فى السنوات العجاف و سنوات الصمت منا
الجميل ان نسعى لصحوة و يكون بدايتها قول لا الان
اشكرك

غير معرف يقول...

انا مش هاروح الاستفاء الجاى ..

عشان معيش بطاقة انتخابية .. والمره اللى فاتت ملقيتش اسمى ..

تعرفى انا ماعيش بطاقة مش تقصير والله ..

بس رحت القسم ومليت والورق وكله تمام .. بس فى الاخر مالفتهاش ..

غالبا عشان رحت لوحدى .. وماكنتش تبع الحزب الوطنى .. الكلام ده كان من سنتين ..

اه ه ه .. كنت لسه بقول لواحد صحبى . انا لازم اهاجر عشان ولادى ميطلعوش فى الجو ده ..

سلام
واحد عنده برد :)

غير معرف يقول...

ياسيدتى الفاضلة
كل ماقلتيه مفهوم ولا يوجد ملل
واقع مؤسف فى بلد الأمية فيه عاليه جدا مابالك بالسياسة؟
قطعا لا أحد يهتم والكل يلهث من أجل لقمة العيش ولا لوم عليهم اطلاقا

على كل لازلت معتقد أن قمة الايجابية وليست السلبية أن لا أذهب واشارك فى التهريج
النتيجة معروفه مسبقا وأغلب ظنى أنهم الان يختلفون على كم هى نسبة الموافقه على تعديل الدستور

ومش مستبعد اطلاقا يقولوا 99% موافقين

ولا 88% علشان يغيظوا الاخوان

على كل حال ماعرفتش هاتشاركى فى الاستفتاء ولا لا؟

ودمتى بكل خير وحب وتقدير
سلام

karakib يقول...

نود أن نتوجه بالشكر لكل من قالوا نعم و نخص بالشكر أما نعيمه لأنها قالت نعمين

shabfa2re يقول...

مقاطعة

أُكتب بالرصاص يقول...

إزيك
يا دااكتورة

والله رغم ان الموضوع طويل
بس قرئته للنهاية

واستعجبت من فكرتك انك تعملي استفتاء على قدك
وتسالي هذه الشريحة العريضة من البشر

والله
احب احييك تاني

و
التعديلات الدستورية
عبورنا للمستقبل


عبورنا للمجهووووووول

دسوقي يقول...

السلام عليكم

ان الله لايغير مابقوم حتي يغيروا مابانفسهم

شعب مستكين ذليل خاضع

مش قادر يغير عاداته هيقف ضد طاغية زي مبارك

للاسف

الاجابة معروفة سلفا

تحياتي

Waleed Fareed يقول...

بارك الله فيك
وجزاكي خيرا
علي مدونتك بشكل عام
جميل ان نجد مدونة تستحق الزيارة وتستدعي القراءة

غير معرف يقول...

انا اؤيد كلامك وادعوكى لزيارة مدونتى
http://mohamedgado.blogspot.com/

غير معرف يقول...

للأسف هذا الوضع اصبح في كل شعوبنا العربيه
اصبحنا شعوبا مغرمون بحكامنا وكل ما زادوا في ذلنا وتجويعنا ازددنا حبا وعشقا لهم

اخذين بذلك قول الشاعر
خليلي فيما عشتما هل رأيتما
قتيلا بكى من حب قاتله قبلي

قاسم أفندي يقول...

شمس
مش مستاهلة تحرقي دمك
بااااااااظت
]فاستخف قومه فأطاعوه إنهم كانوا قوماً فاسقين @ فلما ءاسفونا انتقمنا منهم فأغرقناهم أجمعين @ فجعلناهم سلفا ومثلاً للآخرين[ [الزخرف].

Fo2sh يقول...

سبحان الله
طيب لما الناس شاركت في انتخابات الرئاسة مكنتش هبل و مسرحية و النتيجة محسومة
ومع كده الاخوان شاركوا مش عارف ليه
على العموم كل يغني على ليلاه
http://engafm.blogspot.com/

eldoctor يقول...

المشكلة الاكبر .. انه اتضح ان اللى بيفهموا فى وادى .. والحكومة فى وادى .. والشعب فى داهية ..
الناس مش فاهمة و مش حاسة ...
قديما قالها استاذنا أحمد عكاشة ... فى برنامج تلفزيونى .. وسءال عن السياسة .. رد برد غريب جدا ..
قالها لما عملنا تجارب على الفئران بمؤثر كهربى وجدنا انها تستجيب للالم و بتكرار المؤثر انعدم رد الفعل ...
و تانى يوم الناس سألوه فى المحاضرة فى الكلية .. ما المعنى فقال المذيعة و المخرج جهلة .. ولولا كده كانوا قطعوا التعليق
المقصد انه بتكرار ضرب الشعب بالجزم .. حينعدم رد الفعل .. و مش حتفرق مع الناس اللى بيحصلهم .. كل ما يهم هو منطق الغرائز الاساسية .. الحياة أو البقاء .. والاكل . والجنس .. واللى يشوف حال مصر يلاقى المقصود واضح

يا مصر اكتب إليكي رسائلي يقول...

بمناسبة ذكرى المولد النبوي الشريف ،
يسعدني انت انتهز الفرصة لأتقدم بخالص التهاني
وأطيب التمنيات القلبية
لكم والأسرة والأصدقاء ، وكل عام وانتم بخير

غير معرف يقول...

من أجمل التدوينات الي قرأتها حتى الان
شكرا جزيلا على المتابعة الرائعة ، وخلي بالك من شغلك ، ده اهم حاجة ، واديك لمست ده بنفسك
وربنا معانا ، واهو عددنا بيزيد كل يوم عن يوم وبنصحى واحد واحد

شخبطة ملوكى يقول...

شمس
والله اللى انتى قلتيه احنا عارفينه مش عارف صدمتك ايه بس
الهدف واضح الغاء الثقافة بوزير لا يفقه شئ عن الثقافة و الغاء التعليم بمناهج صم ولا العيال بيفهموا ولا حاجة و نسبة الامية بين طلاب الاعدادى تتعدى 40%
متخيله انهم هايهتموا بالقوانين و الدساتير و خلافه؟
بنا يعينا على ايقاظ عقول و قلوب اولئك الناس لمساندة القضية بقلوبهم التى ستصدقنا حين ياتى الميعاد
اشكرك

BinO يقول...

البقاء لله وحده
إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ
سورة الرعد

جزاكم الله خيراً

غير معرف يقول...

الحرية لرشيد غلام

Maha يقول...

بسم الله

السلام عليكم

طيب نطلع من السيرة الحلوة دي مستنية ردك على الوسم "التاج" ده

Iskanderani يقول...

عزيزتى ربة السيف والقلم,

تحياتي علي الفحص للعينة العشوائية من ألآراء للشعب أو بمعني أدق من العينه التي تعاملتي معها في هذا اليوم في الصيدليه بدون سابق أختيار للنوعيه سواء للدرجه العلميه أو الثقافيه للجمهور عند حضرتك
فهي تصلح لتمثيل الشعب بأكمله لانها أُختيرت بدون سابق تحديد للمواصفات -اللهم إنهم من مُشتريين الدواء- وهذا إحصائياً لاغُبار عليه في قياس النتائج والتعميم -فشكراً لك علي المجهود- س

النتيجة التى حضرتك وصلتي لها يمكن تلخيصها في كلمتين وهم "الشعب مُغيب" نتيجه الجهل وألأميه المتفشيه في جميع الطبقات -المريضه والمُحتاجه ليس فقط للدواء- وإنما محتاجه لإعاده تأهيل لكي تقرأ وتعي -تستوعب- ما تقرأه فمن الواضح سواء من عرض حضرتك أو من التعليقات علي الموضوع: إن هناك قطاع عريض في الشعب عايش في وادي آخر

عليكم جميعاً شُكر التعتيم - آسف قصدي التعلييييييم- علي ما وصل اليه الناس في مصر من جهل
-علي فكره تعريف الجهل اليوم لاينحصر في كونه عدم القدرة علي القراءة والكتابة -وهو مايسمي بالأُمية- وإنما تم توسيع التعريف علي عدم فهم المقرؤ وإستيعابه

شكراً للمجهود المبذول والتحليل العيني لشرائح المجتمع المصري عموماً وسلبيته حتي فيما يخص أدق أموره -كما لو كانوا مُخدريين جميعاً بغاز الضحك أو البنج

تحيات إسكندراني في بلاد الله الواسعة

شــــمـس الديـن يقول...

اعتذر عن التأخر في الرد عليكم اخوتي و اخواتي الاعزاء

بنت سعد

يا رب بقي نقدر نقوم كلنا و كل واحد يعمل اللي قدر عليه في انه يصحي اي حد ان شالله واحد

***********************************
tamtam

هو علي فكرة زي ما انت اكيد عارفة في المنحني الطبيعي ... هتلاقي انه الجهلة و اللي بنعتقد انهم علي مستوي ثقافي كويس طلاب هندسة و صيدلة و طب ... هتلاقيهم مش فاهمين حاجة و اللي فاهمين هما الطبقة الوسطي

معلش اقول لك ايه ... ربنا معانا جميعا

***********************************
الراقص من الذئاب

مرحبا بك في المدونة و اتمني ان لا تكون هذه الزيارة الاولي و الاخيرة

جزاكم الله خيرا و لكن التزام الموضوعية مع عدم البذائة هي من البديهيات

هو اناعايزة اعرف للعلم بالشئ فقط ... يعني
ربنا يصبرنا علي الفقيد
***********************************

كبير المتشردين

انا علي فكرة مش بحب البلد دي اكتر من نفسي ولا حاجة زي ما انت متخيل ... يمكن بس لاني اتربيت بشكل مختلف و طلعت علي الواقع بتاعنا دا ... و تقريبا انا مش بحب ابقي سلبية او اني اعمل اللي عليا و عدم انتظار اي نتيجة ايا كانت ...

هو مش عجز من المعارضة و لكن ان الحكومة اصلا واضعة قوانين تخلي اي معارضة معترف بيها مجرد خيال مأتة و لا صلاحية لهم ...و المعارضة اللي بتحاول انها توصل للناس بتكون محظورة دون اي نص قانوني سابق !!!!!

هو عامة انا اعتقد ان الشارع تم تغييبة مش انفصل بمذاجة زي ما الست قال انا عندي مشاكل شخصية اهم بكتير !!!

***********************************

hany

يوم الاحد قفلواالميدان اساسا محدش عرف يدخل هههههه انا عاينت المكان كله و كان مش كبيعي خالص و كنت بلبس استحالة حد يشتبه فيه علشسان كدا مشيت بحرية بس المخبرين كانوا مرشقين موت
عودا حميدا للتدوين

**********************************

ابن ناصر
يا رب يعدوا علي خير ... دي بداية سوداء لتوالي ظلم بين بحكم القانون !!!!
ان شاء الله طبعا ادعيلي افوق من اللي انا فيه :)

*********************************

الهام

فعلا ...
و القادم اسوأ

و انا فعلا مش عارفة البلد دي هتتعدل امتي احنا كل مادا الموضوع بيزداد سوء الي ان اصبح السوء هو الاساس


------------------->يتبع

شــــمـس الديـن يقول...

عدنا بعد الفاصل

nagah
ممممممممممممم
المشكلة انه مفيش تأريخ جاد استطيع ان اعتمد عليه في استقاء معلوماتي ... لا ادري هل كان هناك تأريخ لنبض الشارع و الواقع زمان ام لا
هو مبارك ممكن يكون ادي حرية معارضة ... لكن بيتعامل معاهم علي اساسا انهم الكلاب اللي بتنبح اثناء سير قافلتة

**********************************
mohamed almohandes

اولا مرحبا بك في المدونة و اتمني ان تكون من روادها الدائمين
ط
فععلا انا مؤمنة تماما ان اول الحلول التعليم ... بس هو فين ...التعليم بيتم تدميرة بجدارة
ربنا يستر علي الاجيال القادمة

***********************************
يعقوب

ربنا معانا جميعا :)

***********************************

khaled

مش عارفة ...حتي لو كل الناس قالت مفيش فائدة ...هتبع حديث اذا قامت الساعة و في يد احدكم فسيلة فليغرسها ... دا و الساعة قائمة يعني عمر ما الفسيلة دي هتنبت ...بس معني الحث علي الايجابية و عمل اللي عليا دون انتظار النتائج

تحياتي :)

**********************************

binO
مممممممممممم
هو احنا هناكلها ...و الاجيال القادمة هتطلع مسمومة

ربنا يستر

***********************************

mohamed a. ghaffar

مش عارفة ....يعني اتفاجئت دي حاجة كويسة ولا وحشة ؟؟؟ ما علينا :)

انا اقتنعت بوجه نظرك علي فكرة و قررت المقاطعة

***********************************

اجمد المصري
نورت مصر اولا

مفيش حاجة اسمها ملكوش لزمة ... احييك علي موقفك ... يعني اللي بيتهكموا دول قول لي عملوا هماايه ؟؟؟

ناس غريبة بجد ... لو لم تكن تستطيع فعل شئ علي الاقل متكونش عامل احباط للي حوليك
احييك انا ايضا علي الصرارك و ثباتك

*********************************


-----------------> يتبع

شــــمـس الديـن يقول...

عدنا بعد الفاصل

طارق المملوك

يعجبني فيك حقا انك دائما متمسك باقل بصيص من الامل و هذا ما يجب علينا جميعا ان نكونه ... نتحلي بالايجابية و عدم استعجال النتاج ....
ربنا يوفقنا جميعا

**********************************
anonymous

علي فكرة ...الانتخاب ممكن بالبطاقة الشخصية لمواليد 1-11-1982

علي العموم مش فارقة اساسا لابد منالمقاطعة كما نفعل مع الاعداء اليهود و الامريكان
علي اللع الارادة الشعبية كلها تجتمع
ياريتنا نعرف نهاجر

خالص تحياتي و الف سلامة لحضرتك من البرد


***********************************

حسن محمود

الامية فعلا عالية جدا جدا في مصرنا مازالت و لازم اللي ماسكينها يعرفواانهم فاشلين جدا و مفيش حاجة اسمها قلة امكانيات ما اعرفة انه لا توجد ارادة للتغيير
لانهم فرحين بتغييب الشعب و لا يبقي غير قلة قليلة يستطكيعون تحجيمها بسهولة

مش هشارك طبعا :) دي عايزة سؤال

خالص التحيات

**********************************

هاني جورج

معاك حق و الله
كل الناس قال ايه راحت و قالت اه

اه منك يا بلد اهههههههههه

***********************************

shabfa2re

طبعا معاك

***********************************

اكتب بالرصاص
الحمد لله رب العالمين جزيتك خيرا علي السؤال :)


اناعملت الاستفتاء دا لاني فقدت الثقة من اني اخد معلومة حقيقية من مسائل الاعلام بتاعنا ... يبقي لازم انا بنفسي ادور علي الخبر الصحيح

تحياتي لك انت ايضا :)

***********************************

د/ دسوقي

الشعب اساسا يجهل اي شئ
يجهل حتي كيف يدفع اللم عن نفسة في ابسط الاشياء ... لا يرفض اي شئ واقع عليه و مستسلم لكل شئ ...

ربنا يستر علينا

***********************************

---------------->يتبع

شــــمـس الديـن يقول...

عدنا بعد الفاصل


noheal

مرحبا بك في المدونة
و جزاكم الله خيرا علي التعقيب و الاطراء الذي لا استحق :)
***********************************

mohamed

شكرا علي التأييد
حاضر :)

***********************************

الخروج عن الزمن

مين اللي بيحب الحكام ؟؟؟
شلة المنتفعين و اللهم هم الناس الجهلة

ربنا يزيح الغمة دي و يولي من يصلح

**********************************

قاسم افندي

تقريبا الواحد بقي عندة مناعة من حرقة الدم بينفعل بس مش بياخد كل حاجة علي اعصابة ... و هي فعلا خربت

عمري ما شوفت في حياتي ان انتهاك الحريات يكون قانوني!!!!!!!!!1
ربنا يستر علينا بجد

***********************************
fo2sh

هما الاخوان شاركوا !!!!
انا عارفة انهم قاطعوا الانتخابات زيهم زي كل اطراف المعارضة

***********************************

eldoctor

فعلا

الناس في وادي و الشعب في داهية ... المشكلة انهم مش بيقاوما و بينساقوا و حتي مش بيعلموا ولادهم انهم يقاوموا

مثال د عكاشة فعلا رائع
و دا فعلا التفسير الحقيقي للي حاصل بالضبط

***********************************

يا مصر بكتب لك رسايلي

و انت بخير و صحة و الف سعادة :)
شكرا علي التهنئة

***********************************

----------------> يتبع

شــــمـس الديـن يقول...

عدنا بعد الفاصل

esmail mohamad

مرحبا بك في المدونة و اتمني ان تكون من متابعيها
فعلا انا بحب شغلي جدا و ربنا يوفقني فيه ...و ربنا ييسر الحال ان شاء الله و تعجبني لهجة التفاؤل الموجودة في كلماتك
:)

***********************************


طارق المملوك

انا متصدمتش بقدر ما كنت مشغولة شويتين و كانت فيه شماكل في الكمبيوتر :)
انت معك حق لابد ان نعرف ان هذا هو واجبنا نحن الافراد ولا ننتظر منهم اي شئ

ربنا يوفقنا و اهم حاجة النية الصادقة و العيش في سبيل حلم

تحياتي لك مجددا

***********************************
binO

و نعم بالله شد حيلك ...كلنا لها و ربنا يلهمنا اننا نتغير حتي نتغير

***********************************
سندباد

اولا مرحبا بك في المدونة

بس عذرا ...هو دا اسم كتاب ولا ايه ؟؟؟
لا افهم صراحة

***********************************

العزيزة مها
اسعدني جدا مرورك الكريم و حاضر التاج ان شاء الله في التدوينة القادمة :) انت اول واحدة تبعتيلي تاج

***********************************
iskanderany

مرحبا بك في المدونة و اتمني ان تكون من روادهاالدائمين

لم اكن ادري انه يمكن لهذه العينة ان تكون مقياس جيد للشعب !!!

حسنا حضرتك ادري طبعا :)

فعلا الشعب مغيب بشكل بشع

و انت معاك حق فعلا ... فيه ناس كتيرة اكون بسئلهم سؤال الاقيهم بيجاوبوا حاجة تانية خالص غير السؤال المسؤول ... فعلا مش بيفهموا اي شئ خالص

يعني اعتقد ان الجيل القديم مش هينفع يتغيروا ... البركة بقي في الجيل الجديد بس المشكلة بردوا انه هيتربي علي يد الجيلالقديم ... تفتكر حضرتك ايه الحل للحالة المستعصية دي !!!!!!!

شكرا لك علي تعليقك الثري و الواعي

***********************************


تحياتي لكم جميع و شكرا علي المورو و التعقيبات الثرية :)
في حفظ الله جميعا :))