الأحد، أبريل 22، 2007

اخر ايامي في شـــــــــــــارع ابو زيد

السلام عليكم و رحمة الله و بركاتة
لكل شي نهاية
و كل نهاية مرحلة هي بداية مرحلة اخري في الحقيقة
و حقا حياة التنقل و الترحال الموجودة في مهنتنا تعجبني بشدة
اكتسب خبرات و اكون معارف و انتقل بخبراتي و تجاربي الي مكان اخر كي اعرف انني لم اتعلم شيئاُ و سأظل اتعلم الي ان توافيني المنيه
قدر الله لي ان اعمل في هذه الصيدلية حوالي اربعة اشهرو نصف تعرفت فيها علي شخصيات حتي و لم لم اراهم في حياتي بعد اليوم الا انني ساذكرهم بكل الخير
لا تستطيع ان تعرف الشعب المصري ... الا اذا تعالمت مع الطبقة الشعبية منه , و رغم انني اسكن في حي متوسط الا ان منطقتي تعتبر راقية نوعا ما ولا نعرف بعضنا البعض - حتي سكان العمارة الواحدة لا اعرف جميعهم - لكن في الصيدلية عرفت كيف يمكن لاي زائر غريب عن المنطقة ان يٌعرف و ان الجميع يعرف ان هناك غريب اقتحم المنطقة ... العجيب ان النساء هن من يفعلن ذلك ... ففي مرة اردت ان استعلم عن امرأة ما جائتني و اشتبهت في امراها ... و كانت هناك امراة اساعدها في العلاج ب
cupping therapy
... عندما قولت لها رغبتي ... قالت لي اتركي هذا الامر لي ,
و فعلا ...عرفت كل المعلومات عنها من بائعة الخضار و بائعة الفاكهة
كما انه لا يوجد اشياء مخفيه في هذه المنطقة الشعبية ... تجد الجيد و الردئ في نفس المكان , و كل شئ معروف ...
فنثلا كانت هناك امراة تجئ هي و ابنتها - الحامل - لاخذ حقنة .. و كان ذراع هذه المراة مقطوع , و كانت تروج انها اصيبت في حادث سيارة ... الا انه و بعد الانغماس في هذا المجتمع عرفت ان هذه المرأة كانت - ولازالت من المدمنين , و كانت تتعاطي هي و زوجها حقن الماكس و حدث تلوث لذراعها هي و زوجها نتج عنه غرغرينة و تم بتر الذراع
و ايضا تبين لي ان هناك عاهرة معروفه بالاسم ولا تستحي مما تفعل و هي اغني ست في المنطقة ... و زوجها يعلم بما تفعلة و هو لا يعترض لانه يعيش من خيرها و لها ابناء و في افضل المدارس .... كنت اسمع عه هذا و لكن اندهشت و بشدة علي وجود مثل هذه النوعية في حي شعبي مثل هذا و المشكلة ان الجميع يعرف
كما ان هناك محترفين للسرقة , مثال امراة كانت تسئلني دائما عما لا تعرفة في الحياة و ما الي ذلك و سئلتي مرة في قوم عن معني التعديلات الدستورية و قولت لها و احضرت لها نص المادة ايضا و شرحتة لها ... و كانت ممتنه للغاية ... و لكني فوجئت بها حيت استدرت لاحضار دواء لزبائن ... انها تشرق دواء و قالت لي الزبونة الموجوجة عليها ... و ظبطها و من ذكائها انها كانت محضرة المال في يدها علي اساسا انها لو اتمسكت تدفع متمسكتش يبقي خلاص
و لكن علي النقيض ... هناك امراة دائما تأتي في الزحام و اخطئ معهافي الحساب و تكتشف هي ذلك و تتصل بي و تقول: د/ شمس انا تعبت معاكي كل مرة يكون للصيدلية فلوس و انا بقول لها اصلي بربي الزبون علشان يرجع تاني و يشتري تاني -و فعلا هي بترجع و تشتري تاني و لكني طبعا لا اقصد شئ هكذا - و هي تضحك و انا اضحك و تختتم المكالمة و هي بتقول المال الحلال مش بيضيع و انا اقول لها الموضوع ملوش علاقة ... ممكن يكون مال يحلال بردوا و اتسرق
و لن انسي المراة التي كانت هناك مشاكل في الحمل عندها و حكت لي ما تشعرة و قالت لي : هل اخذ الدواء قولت لها لأ انتظري عدة ايام و اجري اختبار حتي نعرف هل هناك حمل ام لأ ... و بعد عدة ايام جائت و هي تقول انها سمعت الكلام و لم تأخذ الدواء و قالت لي اريد ان اجري الاختبار ... وهي حقا من النساء النادرات السعيدات في حياتهم الزوجية - لانه كل النساء يدخلن يسببن في ازواجعهن بشكل يوحي فعلا بمدي المعاناه الاتي يعنينها و الالم الاتي يتجرعنة من الفقر و كثرة العيال- و قالت لي انا مرتاحه لك و حاسة انه هيكون فيه حمل بعد علاج سنتين ... قولت لها انا مليش دخل دي ارزاق ربنا .. و اديتها رقم الصيدلية و قولت لها تطمني بعد ما افهمتها بالتفصيل كيفية اجراء الاختبار ... و بعد فترة اتصلت بي و هي علي القمر من فرط السعادة و تقول انا حامل يا داكتورة انا حامل ... انت وشك عسل زي ما قولت لك !!! قولت لها قولي الحمد لله و اتصلي بقي بزوجك بشريه... بجد دي من اجمل الزبونات اللي مرت عليا ... و رغم ملابسها البسيطة الا اني فعلا حسيت انها بجد سعيدة في حياتها ...
من اطرف المواقف ايضا التي مرت علي ... دخول شخص " خير اللهم اجعلة خير " عيونة حمراء و اصابعة تتلوي بشكل غريب و يرتدي ملابس رثة و شعره فيه جل بس مترب اوي يجعلت تشعر بالقرف ... قال لي: هاتي الروشتة اللي اخدتيها امس !!! قولت له : نعم ؟؟ قال لي ايوة انا اديت امس لدكتور هنا الروشتة علشان يجيب لي الدواء ... قولت له بلهجة قوية و اوصالي ترتعد : سيادتك انا دكتورة مش دكتور !!!!
شعرت انه لم يستوعب ما قولت و عرفت انني امام انسان محشش من النوع التقيل ... قال لي و هو يسب و يلعن هاتي الدواء قولت له تعالي بالليل للدكتور اللي اخد منك الروشتة علشان هو يجيب لك اللي انت عايزة ... و اخذ برشامة مسكنة مستوردة الواحدة ب جنية و نصف لعله يهدأ و انصرف و انا احمد الله انه اقتنع بهذه البرشامة انها سوف تخفف الامة حتي يعود للطبيب ليلاُ
نظرا لطبيعة المنطقة التي بها قولت للفتيات الاتي يعملن امامي في محلات " النظارات تدعي بهيرة ,العطارة تدعي بسمة ,الاكسسوارات تدعي نجاح " خلوا بالكوا علشان فيه حد شكلة مش تمام بيحوم حول الصيدلية ...و الحمد لله الصيدلية زحمة و لكن من لطائف القدر ... في اول لحظة خلت من الزبائن ... لاقيتة هو تاني داخل و حالتة اسوأ ... قال لي الدكتور مجاش ... قولت له و انا ميته في جلدي ... هو احنا بقينا بالليل ... قال لي مش عارف هو هيجي امتي ؟؟؟ قولت : بالليل و لسة بدري تعالي كمان 5 ساعات ( كان هذا عصر , و تصادف ان مساعدتي لم تأتي مبكرا هذا اليوم ) اي كنت بمفردي تماما
علي المغرب كدا لاقيتة داخل ... و هو في حالة مش طبيعية و قعد يقول انا مش متحرك من هنا غير و انا معايا روشتتي و قعد يرص قائمة ادوية المخدرات التي يزعم انه يتناولها في الروشته .... ما افزعني حقا انه لم يكن في حالتة الطبيعية - يعني لو انسان واعي هعرف اتصرف معاه لكن دا مش طبيعي و مش مسؤول عن اي فعل و مش عارف اللي ادامة دا مذكر ولا مؤنث - انا بقي من فزعي ناديت علي بسمة و لكنها كانت في منتهي البرود و انتظرت خمس دقائق كاملين - في الحالات دي الثانية تمر كالدهر - حتي قالت ل بهيرة التي عندما جائت اتفزعت فورا من شكلة و خرجت و و انا اكاد اجن من عدم الجدعنة اللي فيهم دي ... انا كنت خايفة يكسر حاجة في الصيدلية لانه كان معاه علبة كوكا كولا و اخد يخبط بيها علي الزجاج المقابل له ... و فشلت في السيطرة علي الموقف و كان همة ان يأخذ الروشتة المزعومة مني باي شكل
بعد دقيقه جاء صاحب محل مستحضرات التجميل- عبد اللطيف - المجاور لنا و جلس و تفاهم معاه و لكنه لم يجدي معه اي نوع من التفاهم ... و اثناء ذلك دخلت امراة من الوزن الثقيل بمنتهي البرود تريد انبوبة مرهم و غير عابئة اساسا بما يحدث من بداية مشاجرة و تراشق بالالفاظ البشعة .... و كانت تلح بشكل جعلني انفجر فيها اقول لا يوجد دواء اخرجي الان قد تحدث مجزرة ...و هي غير عابئة و علي نغمة واحدة عايزة مرهم ...عايزة مرهم ... عايزة مرهم
في النهاية ... اشتبك استاذ عبد اللطيف معه و أخرجة بالقوة و هو بيزقه و انا من ناحية اخري قفلت درج الايراد و احضرت مفتاح الصيدلية و اغلفتها بعد ان طرد هذا الشاب ... و اخرجت المراة التي تريد المرهم بصعوبة بالغة و هي غير عابئة بما يحدث و مازالت تردد بشكل مستفز عايزة مرهم ....عايزة مرهم ... عايزة مرهم
دخلت محل مستحضرات التجميل و انا منهارة تماما ... و قال لي صاحبه ... دا واحد مبرشم و حتي لو كنا ضربناه مكنش هيحس و كان هيلم اصحابة المحششيش و يجوا الصيدلية و ينقموا ... بعد لحظات وجدتهم يقولوا ... الصيدلية مفتوحة
انا قولت اكيد كسرها و دخل و قومت مفزوعة ...
لكني وجدت مساعدتي هي من فتحتها و كانت تعتقد انني بالداخل اصلي و لكنها فوجئت عندما وجدت ما حدث و وجدت ايضا بالداخل المراة التي تريد المرهم غيرعابئة بما يحدث و تقول لمساعدتي اريد مرهم.... اريد مرهم .... اريد المرهم ... صرخت مساعدتي فيها انه لا يوجد دواء و المراة ماشية بتقول ايه الصيدلية دي ... انا مالي و مال اللي بيحصل انا عايزة المرهم . ناس معندهومش احساس ولا دم
و رجعت انا بعد ما هدأت و حكيت القصة للمساعدة التي هي ارق مني و قالت لي لو كنت معك لكنت نفدت بجلدي قولت له بارك الله فيكي يا اروي ....
عند انتهاء موعد عملي ابلغت من يعملون الفترة المسائية ان يأخذوا حذرهم من اي اعتداء ... و لكن قدر الله انه لم يحدث شئ
في صباح اليوم التالي ... و بعد فترة هدوء و مجئ اروي مبكرا .. كنت اجلس علي المكتب و كانت هي تجلس في الجهة المقابلة لي ... حين اذ دخل هذا الشخص مرة اخري
قولت لها من الطرف الخقي " هو دا " البنت اتسمت و تنحت لي في مكانها و لم تلتفت حتي كي تري من هو ... و انا - خلاص بقي اخدث الثقة و عرفت اعامل مع الاشكال دي ازاي - قولت له بكل برود ...عايزة ايه ... قال لي بقي بتشتكيني لبسمة !!! قولت ل: نعم . بسمة مين بقي ان شاء الله .... هو انت كل يوم تطلع لي بحكاية شكل ( طبعا و انا واثقة تماما في نفسيه انني من ادير الموقف الحرب النفسية تكسب في هذه الاوقات ) قال لي مكنش العشم ... قولت له معلش ( ادركت انه مخبول تماما ) قال لي علي العموم انا جاي اعتذر عن اللي حصل لاني وحت صيدلية تانية و كنت فاكر انها دي ... انا اسف !!!! قولت له طيب اسفك مقبول يالا امشي , و هو يستدرج انت باينك لسة زعلانة مني انا اسفة بجد قولت له ايوم مقبلو بس امشي خلاص بقي ... كل دا و المساعدة متسمرة تماما كأنها تمثال ...
و خرج
قولت لها اروي خلاص مشي ... و البنت كانت خلاص ... المهم بعد قليل جائت بسمة - محل العطار -هي تضحك قالت لي انت متعرفيش مين دا ؟؟؟
قولت لها لأ سيادتك محصليش الشرف!!! قالت لي دا قريب ناس جيرانا اللي في الشارع ... عندة مرض نفسي و حالتة تدهورت و جاي يستجم في القاهرة كان يوم !!!!!!!!!!!!!!!!!!!!!!!!!!!!!!!!!!! و انا عارفاه و هو كمان عارفني
قالت لي انا لما شوفت استاذ عبد اللطيف - صاحب المستحضارت التجميل - امس بيزقه برا الصيدلية اشتكيت لاهلة انه عمل مشاكل مع الدكتورة اللي في الصيدلية ... و قالوا انه فعلا كان جايب روشتة بادوية مخدرات بس تقريبا الدواء خلص وراح صيدلية تانية اخدوا منه الروشتة و هو اعتقد ان اي مكان مكتوب عليه صيدلية يبقي هو اللي راحة و بقالة كذا يوم مش بياخد الدواء علشان كدا حلاتة اتدهورت ... و لما اهله عرفوا بكدا نزلوا معاه و اشتروله الدواء
انا و انا بسمع جت لي هيستيريا ضحك ... و قولت لكل البنات في المحلات المجاورة علي القصة دي
و هما لسان حالهم بيقول ... بقي ملاقاش حتة يستج فيها و يستعيد نفسيتة غير لما يبوظ اعصاب الدكتورة و كلنا قعدنا نضحك ...
يتبع ------------->

هناك 20 تعليقًا:

bastokka طهقانة يقول...
أزال المؤلف هذا التعليق.
AbdElRaHmaN Ayyash يقول...

وقع بيان المدونين للتضامن مع عبدالمنعم محمود
شارك بتوقيعك
أنشر البيان في كل مدونة تعرفها
ساهم في حرية المدونين .. وحرية منعم
http://free4monem.blogspot.com/
----------
على فكرة حلوه التدوينة اوي
وتنقلوا بالسلامة :)

احمد المصري يقول...

مممممممم
المناطق الشعبية مناطق حيوية جدا جدا و لا اعتقد ان من لم يعش بها قد جرب الطريقة المصرية جدا في المعيشة و كذلك الريف ايضا من لم يجرب الريف و لو حتى على سبيل زيارات دورية للاقارب قد فاته الكثير فعلا ..

Mohamed A. Ghaffar يقول...

من امتع ما قرأت من فتره طويلة

واضح فيها كم الأندهاش والأستغراب والأستمتاع بتجربه جديده اياً كانت

بس احب اقلك ان كده ربنا مقضيها معاكى جمايل خالص الحتت اللى من النوع ده فيها ما يفوق خيال الخبراء مش واحده لطيفه ارستقراطيه متربية مثلك

كلام لوجيك يقول...

تدوينة دماغ
استمتعت جدا بالقصص الانسانية الحقيقية اللى ذكرتيها فى البوست الهايل ده

اللى عاوز أقوله ان الحياة العملية والاحتكاك بالناس والنزول للشارع والاختلاط بالبشرية كل الحاجات دي بتزيد من خبرة الانسان وبتصقله وبتخليه يشوف ويتعامل مع انماط مختلفة ومتعددة لم يألفها من قبل ولم يدرك انها موجودة اصلا فى محيطه الاجتماعى
فى نهاية كلامى ادعو لكى بالتوفيق وان يحفظكى الله من كل مكروه فى مجال عملك الملئ بالمفاجئات

دمتم جميعا بخير

قاسم أفندي يقول...

والله مش عارف يا دكتورة لما تسيبي شارع أبو زيد هنلاقي حكاوي ممتعة زي دي منين؟؟
يالا ربنا يوفقك يارب وحمد لله علي سلامتك

كراكيب عادل يقول...

شارع ابوزيد دة لازم ازورة

دة خلاص بقي مكان سياحي

بس حمدللة علي السلامة وحشتنا تدوينك عن يومياتك الجميلة دي دانتي بتزرعينا وسط الناس وكاننا شايفينهم بجد

تحياتي وخلي بالك من فلوس الصيدلية القادمة

عبدالله يقول...

من البوستات الجميله الي بتحكي عن مشاعر الحياة في حي شعبي البشر فيه ليها شعور و احاسيس مختلفه شويه

المهم بقي انتي قولتي لبسمه ليه مش عيب كده
:)

تحياتي

شــــمـس الديـن يقول...

السلام عليكم و رحمة الله و بركاتة

الفاضل abdelrahman ayyash
علم و سينفذ

و شكرا علي التعليق !

***********************************

الفاضل احمد المصري

فعلا ... المناطق الشعبية و الريف لا يكتفي مجرد زيارة عابرة لها - نظرة السائح - و انما لابد من التعمق داخل هذه الحياة

معك حق كثيرا فيما قولت

***********************************

الفاضل mohamed a. ghaffar

ربنا يكرمك ...بجد قرأت تعليقك قبل ما انزل للعمل و رفع معنواتي حقاً

هو يمكن الواحد فعلا اتصدم و لكن انا احب ا ن ابحث عن التجديد و المغامرة في حياتي و لذلك لا افضل العمل الثابت الا بعد ما اشعر انني كونت خبرة حقيقية ...

الواحد لازم يكتسب خبرات الحياة لكن لا يفقد تربيتة و رقيه ... معاجلة صعبة مش كدا ؟

***********************************

الفاضل اسامة

فعلا
انا اكتشفت ان الواحد لما اتخرج من الكلية انه اخد شهادة انها يجابه الحياةالعملية ... كأني لسة داخلة اولي حضانة من اول و جديد

و دي الخبرة اللي بتفرق واحد عن التاني ولا تأتي من فراغ

فضريبة الخبرة هي الزمن

ربنا يستر و يسلم :)
***********************************

الفاضل قاسم افندي

ربنا يسهل و اروح شارع تاني و اقابل فيه حاجات تانية و اكتب فيها المذكرات بتاعتها

زمان ... كنت عايزة اكتب يومياتي في شارع الحكيم ...بس مكنتش افتتحت المدونة ساعتها ... خير :)

***********************************

الفاضل عادل

اضحك الله سنك اخي الكريم
هو مش بالجمال اللي انت متخيلة ...التدوينة دي ليها جزء تاني هبقي استفيض في حكي الحاجات الغريبة دي

ربنا يستر فعلا ادعي لانه في الجزء التاني انا هحكي مفاجئات مع الفلوس

***********************************

الفاضل عبد الله

الله يكرمك ...
و الله ما قولت حاجة ... انا اصلا لم اكن اتخيل انه يقصد بسمة بتاعة العطار هي اللي تطكوعت و قالت لبنت جرانها اللي مستضيفينه و هي قالت لها مش تقول ان بسمة هي اللي قالت عليه ...بس البنمت طلعت عبيطة و حكت الموضوع و ان بسمة هي اللي شافتة

بجد الدنيا صغيرة !!!!
خير :)

مع خالص تحياتي للجميع :)

النهر يقول...

مرايا للمجتمع عن قرب ، أما عن هذا الرجل و غيره فلقد رأيتهم كثيرا ، و هنا أيضا فى كاليفورنيا أكاد يوميا أرى أمثاله

الربان يقول...

تحياتي....
التعامل مع الجمهور من أصعب الاشياء...
وخاصة الصيدليات... لانك تتعاملين مع السوي ..و المريض...الواعي و الغائب عن الوعي...
كلها تجارب مفيدة للتعامل مع البشر...
و تضيف الي خبرتك في الحياة.

تأكيدا لكلامك علي الانسانه البسيطة و لكنها سعيدة...اقول فعلا السعادة عمرها ما كانت بالغني و المال...السعادة بالقناعة فيما بين أيدينا....السعادة تنبع من داخلنا فتضيء وجوهنا بشرا.

شكرا لك علي سرد تجاربك ...فهي بالفعل ستفيد الكثيرين...و انا قد أستفدت منها...

تحياتي

نورا لارين يقول...

كل دا حصلك يا بنتى دا على كده انا لو حكيت لكم على اللى بيحصل عندنا فى المنطقة دا والله ممكن يتعملى تمثال رميسيس وينقولونى بـ 6 مليون جنيه

حائر في دنيا الله يقول...

جميل اوي طريقة السرد يا دكتورة
عارفة بتاعت المرهم دي مش عارف علقت في دماغي ليه
حسستني انها احنا
ايوا احنا مصر كلها الناس الغلابة اللي مش في دماغهم حاجة ومش قالقهم غير اكل عيشهم مع ان اللي بيحصل حوالهم مؤثر على حياتهم واكل عيشهم ومستقبلهم ومستقبل اولادهم
ولكن احنا بس عايزين
مرهم
مرهم

ربنا يكرمك يارب
ويكرمنا

مع تيحاتي

وضـّاح يقول...

السلام عليكم

جميلة هذه التدوينة

أعانك الله على مهنة الصيدلة

صاحب البوابــة يقول...

مقال رائع

اظهرت فيه خبرة حياتية من واقع تجربة المعيشة في منطقة شعبية

اعجبت جدا بسردك الراقي

تحياتي

------------------
صاحب مدونة البوابة

عقيل يقول...

انا شخصيا بصفتى مدير هذه الصيدلية المكدسة بالمغامرات مدين لك اولا بالاعتذار عما سببته لك صيدليتى من مواقف بايخة ثانيا بالشكر عن الدعاية المجانية اللى عملتيها للصيدلية وكويس انك ماقلتيش عنوانها والا ربما تحولت الى مزار بعد المغامرات اللى حكيتيها!!!

حورية من الجنة يقول...

السلام عليكم

حلوة اوووي الحكاية دي

انا الشارع بتاعي تيجي 10 بالليل وتلاقيهم انتشروا فيه الناس دي بيشربو
حاجات من العجيبة دي ببقى ماشية مرعوبة

ربنا يحفظك يا شمس

layal يقول...

الحياة تجارب
وكل مرحله ولها حلوته وقصصها
بأنتظار التكمله :-)

شــــمـس الديـن يقول...

السلام عليكم و رجمة الله و بركاتة

الفاضل النهر
ممم
بس اعتقد ان الامر في كاليفورنيا اكثر شراسة و اقل رحمة ... اعتقد ان نفوسهم اكثر صلابة و انعداما للانسانية فيما يتعلق بهذه الفئة من البشر ... الحمد لله بردوا اني في مصر .. :)

*********************************

الفاضل الربان

اولا احييك علي زيارتك للمدونة للمرة الاولي و اتمنيان لا تكون الاخيرة :)

معك حق ... في كل ما قولت و بالنسبة لمفهوم الساعدة ... فهي فعلا لا علاقة لها بالمال ولا باي شئ و لكن هناك اناس يستطيعوا ان يجدوا السعادة في اشياء بسيطة و البعض الاخر يتلكك علشان ينكد علي نفسة :)
و اسعدني كثيرا انك قد استفدت منها
خالص تحيتي لك

***********************************

العزيزة جدا نورا
يا بنتي طيب ما تفتحي مدونة و تتحفينا بمغامراتك :)

بس مش هيتعمل لك تمثال رمسيس ... هييقي اسمه تمثال نورا لارين عجيبة من اعاجيب القرن الواحد و العشرين ...

تحياتي و ان شاء الله اشوفك قريب
**********************************/

الفاضل الحائر
:)

تأملك هذا لم يمر بخاطري انا شخصياً !!!

هي فعلا احنا !!!

من تنهار الدنيا امامة ولا يعنيه من الامر شئ طالما لا يتعلق بسلامتة الشخصية ... و لكن هي لو تدرك ...الامر اثر عليها بطريقة غير مباشرة و لم نبيع لهاالمرهم !!!

تأمل بديع فعلا

خالص التحية لك

-*********************************

الفاضل وضاح

جزاكم الله خيرا علي التعليق العطر

***********************************

الفاضل صاحب البوابة
مرحبا بك في زيارتك الاولي للمدونة و اتمني ان لا تكون الاخيرة

جزاكم الله خيرا علي الاطراء الذي لا استحق :)

***********************************
الدكتور الكبير صاحب صاحب الصيدلية اللي حصلت فيها المغامرات دي كلها :)

مرحبا بك و حقا شرفت المدونة - حبه قرع مباشر رغم اني هسيسب الصيدلية بعد بكرة -

علي فكرة الصيدلية دي اضافت ليا الكثير و الكثير ... و هذه هي ضريبة خبرة الانسان ...

فيه ناس فعلااعتبروها مزار سياحي و عايزين يزوروها D:

خير خير ربنا يستر علي اللي جاي

خالص تحياتي لك يا دكتور

:)
***********************************

حورية من الجنة

اولا مرحبا بك في المدونة و سعيدة بزيارت حضرتك :)

انت في شارع ايه !!!!
هو علي فكرة طلع مريض نفسي , مش بيحشش زي ما كنا فاكرين
و ا نت كمان تاخدي بالك من نفسك

***********************************

العزيزة الغالية ليال

فعلا
و لا توجد روعة للحياة الا باتجارب حتي و ان بدت خطيرة

ان شاء الله التكملة قريبا بس هستني لحد ما اسيب الصيدلية فعلا يوم 1 مايو ... حتي اكتب كل ما سوف يحدث لاخر يوم

***********************************

خالص تحياتي للجميع :)

masry يقول...

بجد ضحكتيني , علي العموم خلي بالك من نفسك