الثلاثاء، أبريل 03، 2007

انا اشتهرت يا جماعة ...اقرأوا الفاتحة علي روحي مقدما !!!!

السلام عليكم و رحمة الله و بركاتة




اولا انا بعتذر لعدم ردي علي البوست اللي فات لانه

الوقت اتقلت بركتة بجد و لازم اتعلم ازاي انظم وقتي تاني ...


المهم بنت سعد يوم الاستفتاء قالت لي في التليفون انت مدونتك اشتهرت



قولت لها خير ؟؟؟ ازاي يعني ولا هي بوادر اشتغالة ؟؟؟



قالت اتقالت في المصري اليوم قالوا اسمها






قولت لها: نعم






قالت لي ايوة و الله



تحت عنوان: شباب مصر قرر أن «يستفتي قلبه»



العنوان الجانبي اسمة : المدونون: جهزنا المدونات لاستقبال «مولد سيدي التعديلات»

















طبعا اتبسط ...و حسيت انه ممكن الواحد يعمل اي شئ لو اخلص النية لله



انا جيت احكي لناس اللي اعرفهم و قالوا ان التدوين دا ملوش لزمة ...كل الناس اللي سمعت الموضوع اسم المدونة الي في الجرنان دا بدل ما يفرحوا معايا قلبوها عليا بخوف و قلق لا حدود له ... و كلهم اجمعوا اني لازم احرص علي نفسي ... و لسان حالهم بيقول : دلوقتي بقينا في زمن اي حد ممكن يتاخد و ملوش دية ولا فيه اي ضوابط ولا روابط و خاصة بعد ما عدولةالدستور و بقيتنا ندستر بيه ... محدش بقي له قيمة






و لما تصادف اثناء اوقات الفراغ النادرة ... في شغلي يلاقوني ماسكة كتاب عنوانة كبير حبتين الرواد اللي اخدوا عليا يقولوا لي ...انت يا بنتي ماشية في سكة اخرتها وحشة ... حاسبي علي نفسك انت لسه شابه و في بداية عمرك ....






و علي ذلك ... عرفت ان بلدنا دي مينفعش الواحد يكون مشهور فيها او يفرح انه اشتهر و يبقي مكمن الا لو سرق و هرب فلوسة علي بنوك سويسرا ... او عملت لي فيديو كليب من بتوع اليومين دول و رصيت اي كلام جنب بعضوا ... او اعمل رواية من بتوع بردوا اليومين دول اللي ماشية علي مبدأ " بل في بئر زمزم تشتهر" و اعمل نفسي مثقفة و اكسر كل التابوهات ... لكن اني اقول رايي بموضوعية في حاجة تخص بلدي و حبيبتي مصر .... احتمال بكرة محدش يعرف لي طريق جرة و كلة ... دستوري






تحياتي




******************************


تحديث




* تم ذكر اسم المدونة في موقع اخوان اون لاين يوم 14 ابريل








**تم الاشارة للمدونة ايضا في المصري اليوم في عددها الصادر يوم الثلاثاء 17 ابريل


تحت عنوان ميني بلوج ... و لكن لا يوجد هذا القسم في العدد الاليكتروني




هناك 34 تعليقًا:

الديب يقول...

اختي ..
احب اطمنك .. لا داعي للقلق

اولا : ماحدش من جموع القراء الغفيرة يعرف اسمك .. ومن يناديكي به في اي تعليق تقومين بمسحه

ثانيا : وده للكل يعني ممكن نخفي كل تحركاتنا على النت .. وماحدش يقدر يعرف مين بيعمل ايه .. لا شركات الانترنت ولا امن الدولة .. ارجو قراءة هذا الموضوع http://eldeebs-tech.blogspot.com/2007/04/blog-post.html

الديب يقول...

نسيت .. ثالثا
اللي بيعمل حاجة لربنا .. يخلص نيته ليه .. وقد يصيبه اذى ..فليكن صابرا

"والعصر* ان الانسان لفي خسر* الا الذين ءامنوا وعملوا الصالحات وتواصوا بالحق وتواصوا بالصبر"

يعني لازم يكون في صبر ..
وكله لله ..

جزاكي الله خيرا كثيرا اختى الكريمة

يعقــــوب .... يقول...

أولا حمد لله عى السلامة..ثانيا,زي مانتي قلتي طالما النية خالصة متقلقيش بأه..ثلثا,بالنسبة لموضوع الشهرة ده بأة فده لوحده موضوع كبير,هضربلك مثل كده ,في ناس كتير في مصر رجال اعمال اغنى من اي واحد من البنسمع عنهم و نشوفهم في الجرايد والتليفيزيون الواحد بس منهم اغنى من 10 من المعروفين,والناس ده لو سمعتي اسمهم ولا هتعرفي مين دول ولا بيشتغلوا في ايه..وكلهم أو معظمهم ياعني شرفاء جدا وماشين بكل احترام لنفسهم وللقانون..ليه بأه الناس ده مش معروفة؟؟؟عشان هما عاوزين كدة و بيهدفوا لكدة عشان هما عارفين كويس ان الشهرة في البلد ده عمرها ما كانت ميزة ولا شرف..انما هتكون نقوة عليهم..عارفة ليه السبب الرئيسي انهم لو اشتهروا الحكومة هتحط عينها عليهم و هايكونوا مطالبين انهم يتصرفوا على هواهم و إلا الويل لهم و لازم يكونوا دلاديل زاي الباقي غصب عن عينهم....ده بس مثل بسيط لناس مش اي كلام وليها وضع اقتصادي و مالي فوق الوصف..تخايلي بأه الناس العادية

غير معرف يقول...

في نفس العدد برضه اسعدني تعليق المحرر عن حملة دستورك يا محروسة اللي شرفني اني واحد من مجموعة عملها

http://dostorekyama7rousa.wordpress.com/

وخصصت مدونة «دستورك يا محروسة» لشرح التعديلات الدستورية والمواد المعدلة وعمل القائمون عليها علي إرسالها عبر البريد الإلكتروني، لكثير من الشباب لتوفيرها لأكبر عدد من الشباب المصريين، دون إبداء رأيها الخاص في التعديلات، سواء بالرفض أو التأييد، لتسبق باقي المصادر الرسمية أو الحكومية في ذلك،

غير معرف يقول...

بصي يا ستي هو من الطبيعي الخوف ده لان شبح القلم السياسي لسه مسيطر علي العقول والخوف ده طبيعي ولكن السؤال بعيدا عن اي خوف هل تعتقدين انه يمكننا الفصل بين من يكتب بضمير حي يؤرقه وبين من يكتب فراغا او من يكتب لدوافع مادية او لحركة سياسية ؟؟؟؟؟ اعتقد ان هذا مربط الفرس كما يقولون وان الحد الفاصل بين نجاح الشخص وفشله هو دافعه في الكتابة ورقابته الشخصية

Hamza matar يقول...

lovely page, blessed,c ya


only for her eyes

layal يقول...

اعذريني علي الغياب يا شمس
بالعكس نقول لك مبروك لانك عملتي عمل يستحق الذكر
اذذكر عندما نشر اسم مدونتي في بعض الصحف وعلي المواقع
شعرت بمسؤليه كبيره
اهم حاجه خلي اسمك وشخصيتك الحقيقيه بعيده عن المعرفه :-)
تحياتي
واعذريني علي الغياب

Dr.khaled يقول...

مبروك
وعقبال ما تستلمي صحيفة أعمالك بيمينك يا رب
وايا وكل المسلمين

Ma 3lina يقول...

مبروووك يا شمس عشت و شفت اسمك منور الجرايد عقبال ميكون ليكى عامود خاص بيكى تكتبى فيه

BinO يقول...

انا مختلف شوية في موضوع الأختفاء والتورية و غيره
لأن اللي بيعمل حاجة صح مبيخفش منها
اما بالنسبة لك أختي في الله
قُل لَّن يُصِيبَنَا إِلاَّ مَا كَتَبَ اللّهُ لَنَا هُوَ مَوْلاَنَا وَعَلَى اللّهِ فَلْيَتَوَكَّلِ الْمُؤْمِنُونَ (51)
سورة التوبة

غير معرف يقول...

أختي شمس
قلقت عليك والحمد لله على العوده وعلى الحماسه الجديده المتألقه دائما بها
أكتب في مدونتي بأسمي الحقيقي وأتردد أحيانا كيف أكتب ما سأكتب دون أن أصاب بأذى وأجدني بعدها لاأكتب شيء ولكنني مؤمنة بأن أكتب ما يمليه عليا ضميري ولكن بعد أن أقرأ كل ما أستطيع من معطيات وأحذر كثيرا من جرح أو أتهام أو قول أشياء وأدعاء أنها حقائق من باب الموضوعيه وأما الباقي فأتركه على الله الذي أسأل رضاه بكل ما أفعل
أتمنى لمدونتك الكثير من الأنتشار والتميز

FTM يقول...

دة نتاج طبيعى لانك كتبتى من قلبك شىء بضمير و حس عالى و معك المدونون الاّخرون جزاكم اللة كل خير

بالنسبة لذكر الإسم فطبعا لا يفضل و احرصى على اخفاؤة إلا لو كان ليكى ضهر فى امن الدولة او حد تعرفية ممكن يقف جنبك ;)

...اتكلى على اللة و كلمة الحق اللى الواحد بيقولها ممكن تقف شفيعة لة يوم القيامة

كلام لوجيك يقول...

لم اتعجب ابدا
فقد استنفذتى جهد وطاقة كبيرين لهذا الموضوع الحيوي
لقد افردتى عدة بوستات لموضوع التعديلات وقدمتى شرح وافى
ولذلك استحقيتى ان تري اسمك فى الصحيفة
تحياتى

شــــمـس الديـن يقول...

اخوتي الاعزاء .... كف احبكم جميعا ...

الفاضل الديب

و الله هي مش مشكلة اسمي ....
انا مرة كنت بكتب في منتدي طلابي باسم مستعار و الامن جاب اسمي الحقيقي و عرف شخصيتي كمان ...
و الله ربنا ييسر الحال ... انا بس بستغرب من وضع البلد المقلوب اللي لو الواحد اتقال اسمه فيها لو مكنش بيعمل حاجة من اياهم ... يكون خايف

شكرا علي البرنامج هحملة ان شاء الله
اكيد الواحد هيصبر بس ا لواحد بردوا لازم ياخد بالة و ربنا يستر اساسا

***********************************

الفاضل يعقوب

و الله انا مش بحب الشهرة اساسا بحب ابقي في حالي ... و خصة في بلد زي بلدنا دي... انت فعلا معاك حق كل الحق في المثال اللي انت ضربتة... و انا كمان احب اني اعمل في صمت لوجة الله لان الوقت فعلا دلوقتي لازم انالواحد يستخبي و يصلح في السر علي قدر ما يستطيع ولا يصبح تابع لهم


***********************************

الفاضل abd el rahman

ماشاءالله الف مبروك انت كمان
تضافر جهود الشباب الواعي اكيد في يوم من الايام هيغير شئ ... المهم اننا نكون مؤمنين بالللي بنعملة

الف مبروك مرة تانية :)

***********************************

الفاضل كبير المتشردين

اكيد الخوف طبيعي ... بس الحمد لله الواحد قناعتة هي اللي بتحركة و رقابتةالشخصية , ربنا يقدم دائما ما فيه الخير للجميع

***********************************
wiskey puzzler

لا افهم تعليقك صراحة ...و ما هي علاقتةبالامر

***********************************

الفاضلة العزيزة layal


انا بجد من زمان بحب مدونتك ... و يسعدي جدا انت تكوني من متابعيني

انت كمان الف مبروك علي نزل اسمك في الصحف في البحرين

حاضر يا جميل :)ربنا يديم الود بيننا دائما

***********************************

الفاضل خالد و ليس بخالد

مرحبا بك في المدونة و اتمني ان لا تقطع زياراتك عنا

و عقبالك ما تستلمها انت كمان ان شاء الله بيمينك

***********************************

ما عليناالعسولة الجميلة

الله يبارك فيكي يا جميل و عقبالك انت كمان يا رب قبلي تمسكي عواميد كتيرة مش عامود واحد

***********************************

الفاضل binO

بس ربنا بردوا قال ولا تلقوا بايديكم الي التهلكة

نوع من الذكاء و حسن التصرف
و شكرا علي المرور و التعقيب

***********************************


العزيزة جدا الهام

الله يكرمك دا بس من ذوقك و الله

يمكن علشان عندنات هنا تاريخ كويل في التعذيب و الكلام دا و انت اسلوبك ماشاء الله كمان حلو - مش بتغلطي في حد يعني - نحن نكتب ما يمليه عليه ضميرنا ... حتي لا نكون مثلنا مثل غثاء السيل اللذي لا قيمة له ولا راي له

تحياتي اليك دائما

**********************************

الفاضلة العزيزة ftm

مليش ظهر ولا اي حاجة ربنا يسترها معانا بقي

ربنا يسترها علينا :)

شكرا لمرورك الجميل

***********************************
الفاضل اسامة

ربما يكون الامر صحيح في البلاد العادية حيث المقاييس الضبوطة ... لكن الحمد لله

دي اشارة ان اي انسان بيكتب بجدية و من اجل شئ ما لابد ان يجد مقابل حتي لو لم يقتنع من حولة به

خالص تحياتي اليك و ربنا يوفقك في دراستك

*********************************

تحياتي لكم جميعا :)

قاسم أفندي يقول...

الاخت العزيزة شمس
معلش جيت متأخر شوية
الحقيقة بالفعل قلمك يستحق التقدير وتناولك لموضوع الدستور أثار إعجابي بالفعل
لكن رجاء بقي من هنا ورايح شيلي اسمي من أخوة الكفاح المسلح انا عندي عيال وعايز اربيهم
:)))
تحياتي

عبدالله يقول...

طبعا مجهود رائع تشكري عليه ربنا يبارك لك
وان الجرايد تتكلم عن جهدك مش موضوع شهره اكتر ما نحس ان الي تعبنافيه ناس كتير استفادت منه
ومش تقلقي من الدوله لو كل واحد قال لا راقبوه و لا عرفوا مين البلد كلها هتبقي سجن
كملي طريقك و ربنا يحميكي

تحياتي

khaled يقول...

عليكم السلام و رحمة الله
الشهرة ليها اثار ضارة برضه
:)
بس انا مش مع بينو فى مسألة عدم الاختفاء
لان ده ما بينقصش من اجرك لو اصلحتى النية لان ده دفاع عن نفسك
انا مش عاوز اخوفك
:)
لا لا بس حبيت اوضح حاجة
و ما تخافيش من حاجة هى بس ما تشتميش كتير فى العائلة المالكة و انتى تبقى كويسة

Maha يقول...

ولا الضااااالييين آآآمين

:D

:p

إن شاء الله كل خير يا شمس :)

ربنا يحميك ويبارك فيك

أحمد المصري يقول...

شمس الدين العزيزة
الشهرة مسؤولية و ليست بشيء يسعد كثيرا عموما
فذكر اسم مدونتك في جريدة يعني ان هناك قراء اضافيين سوف يأتون ليقرأوا ما تكتبين و هذا يعني ان عليك مسؤولية كبيرة تجاههم منها ان يقرأوا مما يفيدهم و يفيد البلد و يساعد فيما تريدينه ان يتحقق

شــــمـس الديـن يقول...

الفاضل قاسم

الله يبارك لك ... دا بس مش ذوقك
بس ا لمشكلة ان اخوة الكفاح المسلح دول مش لقب اختياري ...دا اجباري !!!

***********************************

الفاضل عبد الله
ربنا يبارك لك انت ... هو اكيد اللي حضرتك تقصدة ... انا يمكن ش خاني التعبير شوية
يا ريت كلنا نكون مع بعض علي نفس الطريق علشان مش هيعرفوا يراقبوا كل واحد فينا والا هيحتاجوا انهم يجيبوا شعب فوق الشعب

***********************************


ماشي ماشي يا مها هههههههههههههههههه
اضحك الله سنك

ربنا يبارك لك انت كمان يا مها :)

***********************************

الفاضل الكريم احمد المصري

معك حق في كل ما قولت ... الواحد يشعر انه لابد ان يراقب نفسة جيدا و كل ما ينطقة لانه اما ان يكون لي او علي ...

اشكرك علي النصيحة القيمة

**********************************

بارك الله لكم جميعا

غير معرف يقول...

السلام عليكم يا شمس
مش عارف اقولك ايه
يمكن انا مع أهلك في القلق بس ده اكيد متوقع في الظروف اللي احنا عايشنها
إذا كان اصلا اللي ما لهوش في اي حاجه بيمشي بتلفت حواليه
فما بالك باللي اتجرأ وقال رأيه :)
عامة أنا شايف انك ماشية صح ويا ريت نقدر نكون إيجابيين زيك وزي بقيت الأخوة في المدونات
بحب بس اقولك إن زي ما قلت سواء أخفيتي اسمك أو لاء فالموضوع مش صعب على أصحابنا
بس بفضل إنه يكون في مختفي لأمور تانية
وما تخافيش لو حصلك حاجه هنقول للناس انتي مين ونفضحك احنا :)
على فكره فاكره لما كنتي بتتسألي هو كلامي ممل على الناس أو مش عاجبهم أسلوبي
أعتقد الإجابة وصلت
سلام اخت شمس
وربنا يحفظك من كل مكروه

kaed يقول...

ياةالواحد بقالة كتير قوى ما دخلش عندك المهم ألف مبروك
و خلى بالك الشهرة لها ضرايب كتيرة يعنى معجبين و الذى منة
المهم أوعى الشهرة تغيرك و تخليكى ما ترديش علينا
دمت بخير يا شمس

غير معرف يقول...

السلام عليكم

أولا بأشكرك أنك شرفتي مدونتي

و أحب أقولك إنك مشهورة من زمان, بدليل إني واضع إسمك على مدونتي من أول ما أفتتحت

ألف مبروك, و يارب يجعل شهرتك كلها ثواب و خير عليك و على بلدك

خالص تحياتي

حائر في دنيا الله يقول...

كثيرا ما سألت نفسي أسئلة كهذا، ولكن دوما ما أبادر نفسي وأقول إذا لم أفعل شيء فأنا تحت الطوفان الذي سيسحبني فعلا
فما المانع ان افعل ولو حرف وسط موسوعة تتحرك للرفض وحينها لو ذهبت اكون ذهبت في شيء ذات قيمة ولا اكون مثل احنا بتوع الاتوبيس

ولو سمحتي
ولو تفضلتي
طلب زغنن
ممكن تمضيليل الاتوجراف دا
:)

مع تحياتي

Esmeralda يقول...

شهرة ايه بس يا شمس اللى يتفرح بيها

يا بنتى روحى استخبى

و لا اعمل نفسك ميت على راى صلاح فى الناظر

الموضوع بقى رسمى دلوقت

تحياتى و شرفينى بزيارتك

:)

محمد يقول...

السلام عليكم ورحمة الله

قال تعالى: (الذين قال لهم الناس إن الناس قد جمعوا لكم فاخشوهم فزادهم إيمانا و قالوا حسبنا الله و نعم الوكيل}

أخلصي النية وتوكلي على الله

ربنا يعينك

محمد عبد الغفار يقول...

شفتها فى الجريده فى حينها ، وقدرت انك عرفتهيا

لكل مجتهد نصيب ولكنه ليس نهايه المطاف

اسماء العريــان يقول...

ربنا يعينك ويثبتك

ومبروك على الشهرة

وان شاء الله كله فى ميزان حسناتك

Diyaa' يقول...

u deserve it ya shams
u deserve a higher step...just wait & isa allah wont waste ur work in the blog
i wish that u will solve ur problem wiz the time soon :D
god be wiz u
slamo 3lekom

كراكيب عادل يقول...

انا رجعت من السفر ورجعت اقرا مواضيعك باختصار شديد هقولك انتي بنت زي العسل ومفروض كل الناس تعرفك

تحياتي

sharkawoo يقول...

أختي الكبيرة شمس الدين الدين ...

هو بغض النظر إن هو هيتقال علي حضرتك إنك إرهابية والبيت هيبقي عادي دخول أمين الشرطة زي دخول أي فرد من البيت بس عادي يعني ...

والله لا أعلم يكفي أن أعيش وأعرف لماذا أعيش ... وأن ما علي بالي أكته وأقوله من غير خوف أو قلق...

إن لذلك حلاوة لا تعادلها شئ آخر ...

أعانكم الله أختنا الكريمة ...

شــــمـس الديـن يقول...

السلام عليكم و رحمة الله و بركاتة

الفاضل shehab
تختفي و تطل علينا ... ارجو دوام الاطلاله
جزاكم الله خيرا ... و بجد نعم الاخوة ...هتعملوا معايا الواجب باين و زيادة :)

بارك الله لك و اعزك
**********************************

الفاضل kaed
عودا احمدا مجددا دائما ايا اخي الفاضل
الله يبارك فيك
اتغير يعني ممكن اعمل مثلا اللي يفوت علي المدونة يسيب ربع جنية ؟؟؟
ههههههههههههههههههههه

ربنا يكرمك بجد

**********************************

الفاضل سندباد
بجد!!!
اصل الواحد في النت من الصعب انه يحصر هو الناس عارفاه ولا لأ غير من الردود ... يعني الموضوع واسع اوي والواحد اصلا حاسس انه نقطة في بحر
الحمد لله و انا اسعد بتشريفك لي

***********************************

الفاضل حائر في دنيا الله


معك حق تماما في كل خزاطرك ... و طبعا شهرة حضرتك سبقتنا في انه اتاخد منك 7 مقالات دفعة واحدة من قبل جريدة مغمورة لا كتاب لها

المؤمن بقضيتة و ما يفعلة يؤثر و يصل صوتة الي حيث لا يتوقع ... و اذن فيالناس بالحج :)

ثم حضرتك طالب توقيع في الاوتوجراف مرة واحدة !!!!
مممممممممممممم
ممكن نبقي نفكر في الموضوع دا - كيلو كباب تحت الحساب - ما انت عارف بقي الشهرة بتغير الناس ههههههههههه

بارك الله لك فحقا اعتز بمعرفتك

**********************************


الفاضلة esmeralda
اولا مرحبا بك مرورك علي المدونة

علي رأيك ...انا لازم اروح استخبي بس المشكلة انه فيه ناس هيقوموا بالواجب معايا .... و هيقولوا كل حاجة
يالا مش مهم
قل لن يصيبنا الا ما كتبالله لنا

خالص تحياتي لك
**********************************

يتبع ------------>

شــــمـس الديـن يقول...

السلام عليكم و رحمة الله و بركاتة
الفاضل وضاح

مرحبا بك في المدونة لاولمرة و اتمني الا تكون الاخيرة

اكيد ...الواحد فعلا لازم كل شوية يجدد النية و يفكر و يراجع نفسه هو ايه من وسط كل مات يحدث ... جزاكم الله خيرا علي التذكرة

***********************************

الفاضل mohamed a. ghaffar
كويس و الله ان حد شافها في الجريدة ... انا نفسي مكنتش اعرف

معك حق ,ربنا يستر علينا

**********************************

الفاضلة اسماء العريان

رنا يكرمك انت و يديم الود ان شاء الله ,ربنا يتر علينا دائما

***********************************
الفاضل diyaa

thanks slot for ur nice words i really don't deserve it
و ان شاء الله اعرف افضي شوية الفترة الجاية دي لاني ناوية اخد اجازة مفتوحة و طويلة نوعا ما ان شاء الله

ربنا معانا جميعا
و عليكم السلام و رحمة الله و بركاتة

***********************************

الفاضل عادل
الف حمد لله علي السلامة من السفر

ربنا يستر ... ممكن كل الناس دي متكونش كويسة في بلد زي بلدنا كل شئ غير قانوني فيها بقي دستوري !!!

ربنا يستر علينا
***********************************
الفاضل الكريم شارقاوو

هي المشكلة الوحيدة في البلد دي انهممعندهومش اي اخلاقيات ... اذا كانوا بيبهدلوا الرجال ...يبقي هيعملوا في النساء اللي ما يعمل ... ربنا يتر عليا بجد و علي اي حد في البلد دي لسه عندة لسان و يعرف يتكلم

----------------------------------
خالص تحياتي للجميع

غير معرف يقول...

السلام عليكم يا دكتورة
متخفيش و طالما انك على الحق لا تتوقفي كثيرا عندكلام وخوف الاخرين

اذا خفت واستسلمتي لهذا الخوف ، فماذا سيكون الفرق بينك وبين من يعيشون للدنيا؟؟؟

بارك الله فيك

بصراحة انت وزميلاتك من المدونات اثرتم في اكبر تاثير
** بصراحة بغيير منكم
كيف انني شاب وابلغ 29 سنه ولم اقم بعمل واحد محترم اقف به بين يدي ربي يوم القيامة يشفع لي

تحياتي وتقديري
ارجو منكم الدعاء بالهداية لامثالي
اخوكم
احمد سامح