السبت، يونيو 23، 2007

ما هذا ؟؟؟

السلام عليكم و رحمة الله
يمكن التدوينة دي تحسوا بانها هايفة ... بس انا من صغري متعودتش انه حاجة تمر عليا كدا مرمر الكرام دون تفسير - حتي لو كان غير معقول او منطقي زي اللي بيحصل في مصر - بس دا لانه انا لسة من داخلي طفلة مندهشة و محبة للتعرف علي الاشياء التي تحيط بي في العالم الواسع

هحكي و ربنا يسهل

الوقت : الساعة سابعة الا ربع عصرا يوم الاربعاء
المكان : فوق كوبري الجامعة
الحدث : كالتالي

المهم و انا ماشية كدا علي كوبري الجامعة ناحية طب - رايحة لسة علي الجامعةلاقيت شابين واقفي و بيبصوا اتجاة جامع صلاح الدين بس فوق شوية
و كانت نظرتهم غريبة جدا
بصراحة شكلهم استرعي انتباهي قولت لما اعدي الشارع ابص هما بيبصوا علي ايه - فضولية بقي -عديت ووقفت و بصيت

لاقيت زي ما تكون رياح مطيرة حاجة ملهاش ملامح كدا زي اكياس بلاستك كبيرة حمراء اللون طايرة فوقينا مباشرة
انا قولت اكيد دي اكياس زبالة حمراء و الهواء مخليهم طايرين علي شكل دوامات
و نزلت عيني
لكن لما فكرت للحظة وجدت انه اساسا مفيش هواء و الجو قاتل و انا عرقانة ...ايه دا ؟؟؟
رفعت راسي و بصيت تاني
دققت النظر
لاقيت تكوين من حوالي 8 اشياء بهذا الشكل واحدة كبيرة و باقي متوسط الحجم و ثلاثة صغيرين
بس لما دققت لاقيتهم زي ما يكونوا طيارات ورق حمراء او حاجة لها جناحين حمر و عناك اسطوانة فضية لامعة في المنتصف
لاقيتهم في تكوين عشوائي بس ثابت
و علي ارتباع حوالي 500 متر تقريبا او اقل


و الحاجة الطايرة دي صعب ان انسان يقعد فيها ... مش عارفة بقي دي طايرة الي ولا ايه
ووجدت ان التكوين دا بيتحرك حركة منتظمة بسرعة ثابتة ... موازية للكورنيش في اتجاه المعادي
شوية و لاقيتها بتتقدم اكثر اثر في اتجاه المعادي
طبعا انا كنا عايزة الفت نظر اي حد للموضوع اللي انا شايفاه
و طبعا انا متأكدة انه مش حلم علشان مش انا اللي شوفتة دا فيه شابين غيري هما اللي شافوة
بقيت استخدم لغة النظر مع الفتيات التي تصاف و يسرن بمفردهن علي الكوبري انظر اليهم ثم انظر علي السماء
يعني واحدة تاخد بالها زي ما انا اخدت بالي ... و لكن ولا واحدة فهمت انا ببص علي ايه و بدل من دا بيبصولي نظرات خاوية انا بصيت علي الشابين ملاقيتهمش ... اكيد راحوا لحال سبيلهم
و انا تابعت سشيري و كل شوية ابص علي الحاجات اللي طايرة دي و الاقيها ابتعدت ... الي ان كادت ان تختفي
محدش اخد باله من اللي طاير دا من الناس اللي كانت حوليا

حسيت بخنقة اكتر
انه ممكن اي حاجة تحصل ادام الناس و محدش ياخد باله من اي شئ ...
و بعدين تذكرت ان مصير البلد اساسا ضاع اثناء التعديلات الدستورية و محدش اخد باله
و كل يوم بيضيع مع الدماء الفاسدة و السرطان و المليارات اللي بتتهرب

عادي يعني
بس بجد يا جماعة محدش شاف الحاجات اللي انا بقول لكم عليها دي في الفترة دي ؟؟؟
و دي تطلع ايه ؟؟؟
انا مش قادرة افهم فعلا رغم انها حاجة هايفة بس ياريت لو حد عندة تفسير يقول لي

هناك 27 تعليقًا:

نقطة مية يقول...

هييييه انا اول تعليق

عارفة انا شفت حاجة زي كدة السنة اللي فاتت و شافها معايا ميكروباص بحاله بس مش عارفة ايه دي الحقيقة...بس الشكل الاسطواني ده غريب و مش مألوف بشريا..متفتكرنيش مجنونة قوي لما اقولك اني من الناس اللي مؤمنة اننا مش لوحدنا في الكون و خلق ربنا واسع جدا ده في كائنات جديدة كل يوم بتكتشف على الارض امال في الكواكب بقى...

اما شعبنا الجميل فا تقريبا خد على اساس انه من كتر اللي شافه في البلد دي..مبقاش فيه حاجة تبهره!!؟
تحياتي


ملاحظة:والله انا مش مجنونة..رسمي على الاقل..!؟

Dr.khaled يقول...

ممكن تكون طيرات شراعية
أو مظلات :)
أو أطباق طايرة

يا مراكبي يقول...

الله أعلم .. كل شيء جايز

Alaa يقول...

مرمر الكرام :)

أظن تفسير الموضوع بسيط جدا
اسمعي

مجموعة من الكائنات الفضائية صلوا العصر في جامع صلاح الدين و قعدوا شوية تحت المراوح و بعدين خدوا المركبة الفضاية المرسيدس بتاعتهم و راحوا لطبيب الاسنان د. أحمد المهدي اللي في المعادي لأن واحد منهم ضرس العقل بيوجعه
و عايزين يخلعهوله

لو كنت لقطتي صورة للمركبة كنا عرفنا رقمها و جبنا اسمهم من المرور
لكن حصل خير

أظن تفسير منطقي جداً :)

AHMED SAMIR يقول...

لا والله ماشفتش حاجة
انا لو شفت هقول على طول
بس عادي يعني
ماكل يوم بنشوف حاجات غريبة عجيبة مريبة ولا حد بيقول لنا دي ايه
تحياتي

abderrahman يقول...

اللي هو بيبقى ازاي يعني؟
:)

عصفور المدينة يقول...

أنا طبعا لا أملك تفسير بس فعلا أنا مهتم بنقطة اللامبالاة التي عند الناس وافتقاد حس الإيجابية والتفكير بحس اﻷمن القومي زي ما بيسموه
وهذا نتيجة حالة اللاحرب التي نحن فيها
واحنا صغيرين كانت تعليمات اﻷمان في كل مكان وكان ممنوع نمسك أي حاجة من اﻷرض وأنا قابلت جندي اسرائيلي وعمري ست سنوات والناس مسكوه وكل ضرب لحد ماراح قسم الشرطة
وده ﻷن الجو حربي

غير معرف يقول...

مممممم
من كذا منطلق ممكن نقول انه خداع بصري جماعي
انا عن نفسي استبعد الاطباق الطائرة او غيرها
لكن ما لا استبعده مطلقا ان يكون اختبار لنوع من انواع المحركات النفاثة او النيوترونية الجديدة على رأي نبيل فاروق ربنا يشفيه و يحميه
لكن فعلا الموضوع ممكن يكون حاجه عسكرية
او ممكن يكون حاجه تتعلق بتجربة علمية ما

او .......

صديقكم المخلص ..
رفعت اسماعيل
أأأأ
أقصد عبدالرحمن عياش

سجدة يقول...

طب طبيعى يا شمس دى مركبة فضائية جاية تشرف على التعديلات الدستوريةوانتخابات مجلس الشورى والمحاكم العسكرية
ربنا يوفقهم

momken يقول...

انا كمان شوفت حجات كده والله
وحاولت اصورها بالموبيل بس الشمس بوزت الصوره وطلعت حاجه انا نفسى مابقتش فاهما ومرضتيش اوريها لحد

قاسم أفندي يقول...

:))
أنا بأميل لرأي علاء
تفسير منطقي جدا

شــــمـس الديـن يقول...
أزال المؤلف هذا التعليق.
شــــمـس الديـن يقول...

انا اللي جبتة لنفسي :)

انا عارفة ان الناس اللي هتدخل هتفتكرني مجنونة او تتريق عليا

بس نقطة مية نصفتني هي و momken
:))))

مش انا لوحدي اللي شوفت الحاجات دي

غيري شافها بس متكلمش علشان كانوا خايفين من التريقة اللي بيتميز بيها الشعب المصري كنت في الاول بسترخمها لكن لاقيتها من سمات الشعب الاساسية التي لا غني عنها بجد :)

بحكي لواحدة صاحبتي قالت انها براشوتات !!!
ممكن يكون تدريب علي جيت باك مثلا ؟؟؟


---------------------------------*-

العزيزة الغالية نقطة مية
بجد!!!
طيب و عملتوا ايه ؟؟؟
بلغتوا حد
انا اخويا نصحني اني ابعت ميل لوزارة الدفاع

انا اساسا اول ما شوفتها مجاش في بالي انه يكون اطباق طائرة و لكن تجربة طيارة بدون طيار للتصوير او اللتجسس و خاصة اننا كنا جنب سفارة الدولة الصهيونية

موضوع ان هناك كائنات تانية بصراحة انا استبعدة لسبب لان بعد الكواكب الاخري عننا ملايين السنوات الضوئية ... صعب ان كائن يعيش طول السنين دي و يقضي حياتة و يتجوز و يتناسل طول ملايين السنوات الضوئية في مركبة علشان يزورنا فقط كدا ...

يا نقطة لو انت مجنونة يبقي انا منخوليا بقي ؟؟؟؟ ما انا اللي حاكميةالموضوع اصلا انت ناسية يا بنتي :))

***********************************

الفاضل ض/ خالد
نورت المدونةو الله

ممكن تجربة طيارات شراعية بدون طيار مثلا

اطباق طائرة !!!!!

************************************

الفاضل باشمهندس احمد

فعلا كل شئ جايز... بس احسن شئ ان حضرتك لم تشكك في قدراتني العقلية

************************************
السلام عليكم
الفاضل علاء

ايوة مرمر الكرام يا اخي الكريم :)

ما حضرتك لاتزم تعرف بقي ان عيبي الوحيد الازلي هو الغلطات الاملائية من ايام ثانوي

ماشاء الله علي التفسير
الكائنات الفاضئة مسلمة :)
و عندهم اسنان :))
و جم من بلوتو علشان يخلعوا ضرس عند د/ احمد المهدي ...مكنتش اعرف ان صيتة مسمع المجرات اللي جنبنا :))

كنت بقوللو دلوقتي معايا محمول بكاميرا مش كنت جيبت دليل علي كلامي بدل ما الناس تفتكرني كبرت و خرفت :)

صراحة تفسيك معقوووووووول جدا

***********************************

الفاضل الكريم احمد سمير
نورت المدونة

اكيد مش هتشوف لان معتقدش ان الكائنات الفاضية وصلت لحد عندكم :)
عليب حد علمني ان حضرتك من فئة المهاجرين

دمت بكل اللخير ...بس انا اللي خنقني بجد ان الناس فقدت الفطرة البشرية في الفضول و الاندهاش و التعجب

دمت بكل الخير
*-*********************************

الفاضل الكريم عبدة باشا
دا مين دا بقي !!!!!!!!!!

هههههههههههههههههههه
لو عندك تفسير لا تبخل علينا به

***********************************

الفاضل الكريم عصفور المدينة

انت حضرتك فعلا معاك حق
بقينا بنخاف حتي اننا نعبر عن اندهاشنا
كل البنات كانت بتبص لي بصة خاوية لا معني لها
مش عارفة
التجرد منالمنشاعرالادمية الاساسية اللي بتميزنا عن الجماد كارثة بجد

بس اعهتقد انه حتيبلو احنا بقينا في جو حربي دلوقتي الناس بردوا هيكون عندهم لا مبالاةت و البلد هتحتل بمنتهي السهولة ... كل واحد همة نفسةو خلاص

تحياتي لقرائة ما بين السطور
************************************

الفاضل الكريم عبد الرحمن عياش

خدالع بصري جماعي ايه يا عم انت... انت هتقعمل زي الناس اياهم بردوا ... زعلتني منك

انا قولت اساسا دي حاجات تبع اسرائيل و خاصة ان السفارة جنبنا
خيالي اصلة واسع اوي قولت بتسمم المية والة بتبث اشعة غير مرئية لاذية الناس

هو نبيل فاروق عيان؟؟؟
ربنا يشفيه ويعافيه

ماشي يااستاذ كلومبو

:)

***********************************
سجدة
بس دول يبقوا متأخرين اوي لانت التعديلات تمت يوم 26 مارس و مججلس الشوري كان قبلها بيوم

هي مصر دي بتبيعنا لكل من هب و دب حتي لو كانت كائنات فضائية ؟؟؟

اضحك الله سنك يا بنتي

تحياتي
***********************************

الاخ الكريم ممكن

بجد انت اللي رفعت راسي
بجد والله شوف غالحاجات دي ؟؟؟؟

طيب دي تطلع ايه و ممكن نقول لمين ؟؟؟
لأ كنت وريتها وانا كنت هؤيدك

انشر الصور علي مدونتك علشان لو حد يعرف ايه دا يقول لنا

***********************************

الفاضل العزيز قاسم افندي

بقي بتميل لرأي علاء
ماشي ماشي :))

رغم ان نقطة ميةو ممكن قالوا انها شافوا حاجات كدا بردوا...بس اوك
D:

************************************
خالص التحية للجميع

ibn nasser - ابن ناصر يقول...

هههههه حاجه غريبه فعلا
لكن في مصر كل شيء غريب موجود وصرحتا لا اعرف ما هذا !!؟

تحياتي

AbdElRaHmaN Ayyash يقول...

و الله انا كنت بتكلم بجد جدا في موضوع التجربة العسكرية
هو يعني رغم كل اللي بيحصل الا اني استبعد اسرائيل لأن اعتقد ان لسه في جيش عنده كرامه
او ممكن يكون خيال .. ظاهره كونية ما .. اي حاجه
مش ضروري خيال ممكن خداع بصري فعلاااااا
و حصلت حاجات زي دي كتير
او ممكن تكون صورة هولوجرامية مجسمة (A)
و الله العظيم انا كلامي بجد جدا
أما دكتور نبيل فاروق فربنا يشفيه .. تعبان جدا جدا
أعتقد فشل كلوي و ضيق في الشرايين التاجية و حاجات كتيره كده
ربنا يشفيه
عموما حقك علينا يا دكتورة
بس برضه ... استبعد اسرائيل صديقنا المخلص عدو عدونا حماس
:D وللا ايه؟

صاحب البوابــة يقول...

بصراحة

لم اجد اي شئ منطقي افسر به هذا الحدث ؟؟؟

غير ان اكثر ما اثار انتباهي

انه لا احد استرعاه المشهد الغريب

حقاً لا مبالاة قاتلة

تحياتي اختاة

Diyaa' يقول...

بصي يا ستي ...أيا كانت الحاجة دي ..فالمفروض أولاً تشوفيلك موبايل بكاميرا ...ثانياً متروحيش للجرايد عشان هيتريقوا علي الموضوع
ثالثاً أحتمال كبير يكون في مخلوقات تانية عايزة تغير ريسنا عشان صعبان عليهم حال البلد
المهم انتي بخير ؟
سلام عليكم

شــــمـس الديـن يقول...

الفاضل الكريم
ابن ناصر

مع عارفة
انا بجد م عارفة

خالص التحية

***********************************


الفاضل عبد الرحمن عياش

ماشي يا اخي :)
صورة هولوجرامية

مين اللي هيعملها طيب
و ايه الاله الغربية اللي هتخلي الصوري تمشي المشافة و تعمل توازن بين الصورة و المسافة و انها كل ما تبعد عني تصغر

و ايه مركزها ...قمر صناعي مثلا ؟؟؟ طيب ايه بردوا ؟؟؟

اسرائيل صديقنا اللدود

اه يا بلد :)

دمت بكل الخير و نورت المدونة

/**********************************

الفاضل صاحب البوابة

ولا انا صراحة
و دا اللي خنقني اصلا ان محدش اخد بالة ولا كل الناس استكبروا انهم يبصوا فوق

مش فاهمة
ربنا يصلح الناس لان دي اول خطوة للاصلاح الحقيقي

خالص التحية
**********************************

المحمول ابو كاميرا دا بيتكلف اي نعم عندي لكن هناك اولويات .,. انا اساسا عاطلة دلوقتي :)

انا مكنتش هروح للجرايد لاني عارفة ان مخهم مقفل و انا قولت اقولة هنا لاني عارفة ان هنا فيه مصداقية لكن الناس التانية لأ

ثالثا بقي انا في السايبر دلوقتي يعني رجعت لفترة الحبس الانفرادي تاني و مش عارفة امتي النت هيتصلح , علشان كدا نفساويتي مش مستقرة ان عارف اني بقيت مدمنة خلاص

خالص التحية من اخ حقيقي مثلك

دمت بكل الخير

غير معرف يقول...

عزيزتي شمس
سر الحكمه الضاله أن لاأحد يجدها سوى المحظوظين
ليس كل ما نراه يراه الآخرون معنا ..وهذه هي حلاوة الحياه وقبحها في آن واحد
ما رأيتيه وحاولتي أن ينتبه له الآخرين ليس سوى مشهد من مشاهد الحياه الكثيرة والتي نجد أنفسنا فيها نعاني من الوحدة وليس بجانبنا أحد يرى ما نراة فأن كان يقيننا أكبر من الآخرين ربما أقنعنا به أحد وأن لم فربما نصدق الآخرين بأن ما رأيناه وآمنا به مجرد أضغاث أحلام
تحياتي
على فكرة عجبتني التدوينه السابقه
كم أكرة أن أعيش في جلباب الآخرين
تحياتي مرة أخرى

عمرو المصري يقول...

الي اولئك الذين المهم صور اقتتال الاخوة الاشقاء في فلسطين


الي كل من تخيل ان الاخوة الاشقاء باعوا القضية لاعدائهم واجهزوا علي ماتبقي منها


الي كل من انجر وراء حملة التضليل الاعلامي التي ساقوها علينا

الي كل ساع الي الحقيقة

الي كل هؤلاء اهدي

التبيان في اقتتال الاخوان

تجدونه فقط

في

ارض الحرب

Monzer يقول...

ههههههههه
:)
قعدت أضحك أوى وانت بتقولى أنا الى جبته لنفسى، بس ياريت ما تخديش بنصيحة أخوكى انك تبعتى ميل لوزارة دفاعنا، لانك ساعتها هاتبقى المسئولة قدامهم وهايجيبونى وأقولهم انى حذرتها

ع العموم كل الناس تقريبا اتهمت الى كانوا ماشيين فى الشارع انه سلبيين
أعتقد انهم ماكانوش شايفين الى انت شفتيه

أوعى تفتكرى انى عاوز أجننك هههههه
بس مش ممكن يكون كده
تحياتى اختى الغالية

شــــمـس الديـن يقول...

السلام عليكم و رحمة الله و بركاتة

العزيزة الغالية الهام
تحليلك عجبني جدا ... نظرتنا للامور هلي اللي بتخلينا مختلفين ...

و يسعدني ان اعجبتك التدوينة السابقة :)
***********************************

النجمة الصاعدة
ان شاء الله

*********************************** الفاضل عمرو المصري

علي فكرة الاعلام مش بيضلل المدونين ...للاسف بيضلل ناس تانية فاكرينه اخر الدنيا ...
عامة كنت اتمني ان تقول لي رأيك الكريم اتما ملحوقة ":)

***********************************

الفاضل الكريم حباصة :)

طبعا مش هبعت
مش مهم اساسا
ممكن ميصدقونيش زي ناس و يفتكروا ان قوايا العقليه ضاربة

المشكلة انه فيه ناس مش بتثق غير في نفسها و لا تصل مصداقية غيرها لدرجة انهم يصدقوه ...
دش مش مشكلة خاصة انما هي من قطرة البشر
بس فين ناس غيري هما اللي لفتوا نظري للامر و ناس تانية مدونين شافوة ( نقطة مية و momken"

دمت بكل الخير :)
**********************************

خالص التحيةو للجميع

محمد السيد..مش حاسكت يقول...

استفزتيني للتعليق ..أعمل إيه بس؟

دي حاجات إحنا هنا في اسكندرية بنبعثها للناس اللي هناك في القاهرة ... تخلي الدنيا حر وبهدلة يقوموا ييجوا عدنا نضحك عليهم وناخد فلوسهم ...

مكنتش عايز اقول بس إييييييييييييييييه .... لايف "دنيا يعني"

ها ؟؟ مقلتيش بقي عايزة مصيف بكام وفين؟؟؟

Maha يقول...

يوفو ؟؟؟؟

اطباق طائرة ؟؟

كان نفسي أتفرج عليها معاك

شــــمـس الديـن يقول...

الفاضل محمد السيد

يعني دي مراسيل من عندكم :))

طيب كويس انك حليت اللغز
بس المشكلة اننا بنحب القاهرة لدرجة اننا مش هنصيف السنة دي

دمت في رعايةالله
***********************************

العزيزة الغالية مها

يوفو ايه بس يا بنتي :)

كنت جيني معايا علشان نصف اللي بيقعلوا افتكروا اني اتجننت رغم ان اتنين اخدوا بالهم من الحاجات دي

دمتي في رعاية الله

Diyaa' يقول...

يا رب تكوني بخير ..أنا كمان مش بدخل نت كتير...بس قلت أجي اطمن وبدعيلك
واضح إنك مستعجلة لأنك لما رديتي علي التعليق مش كتبتي اسمي وده خلاني أقول مخدتش بالها أو يمكن التعليق كان رخم ...وشدي حيلك في حوار النت ده وكوني بخير ...
سلام عليكم

اسكندراني اوي يقول...

ممكن جدا تكون طيارات ساحبه وراها لوحه اعلانات
زي ما كانو زمان بيعملو عندنا على البحر في اسكندريه