السبت، مايو 03، 2008

من وحي عيد العمال

السلام عليكم و رحمة الله و بركاتة

موضوع العلاوة اللي ولي النعم دا كانت طرفة اليوم صراحة ...
اول مرة اسمع عنه كان من مكالمة من رئيستنا المباشرة وقالت في الصيدلية الخبر لماريا

كلنا قعدنا نتريق
و قالت لي ...
بعد الخصومات ,و التأمينات و الضرايب و اللي فيه النصيب ا للي بتطلع بيه المستشفي هيصفصفوا علي 30 او 20 جنية
ابقي اشحني بيهم كارت محمول
ضحكنا جميعاً

******************

جائني محصل النور في الصيدلية التي اعمل بها يوم واحد في الاسبوع - محصل الكهرباء و تعجبت من غلو اسعار الكهرباء ... و سخرت قائلة , كفايا كدا الكهرباء ولعت ... مش كفايا مكاسب بتاخدوها كل ما تغلوا الكهرباء , هنجيب منين تاني ؟؟؟
قاللي ما البركة في اللي ماسكها
بيكبش مش جيبة و يدينا

اصلها تكية ابوه و احنا بيمن علينا بمنح من جيبة و طظ في الاقتصاد يتدمر... حاجة تقرف , بكرة هتلاقي كل الاسعار ولعت بشكل جنوني علشان الزيادة اللي هي نصفها رايح في جيبهم ... هما مش عارفين يعملوا ايه علشان يقرفونا ...ما يسيبونا في حالنا

فيه نكتة بتقول ان مرة رئس امريكا جاء و شاف حال واحد من الشعب و انعم عليه بمليون دولار... و قال كدا للريس ,فالريس قال لرئيس الوزراء ان رئيس امريكا انعم علي مواطن من الشعب بمليون جنية.... فرئيس الوزراء قال لرئيس الديوان بتاعه ان الرئيس الامريكي انعم علي المواطن بنصف مليون جنية و رئيس الديوان كلم سكرتيره و قاله ان رئيس امريكا انعم علي مواطن مصري بربع مليون جنية ...و هاكذا فضلت تنقص تنقص لحد ما وصلت ليد المواطن الغلبان جنية واحد فقط لا غير تصدق بيه علي حد غلبان غيرة !!!!

*******************
يوجد في المستشفي التي اعمل بها ...رجل عافانا الله و لكن زي ما بيقولوا عندة لطف ...

الرجل دا لا يرتدي الملابس المعتادة للمختلين و لكن يرتدي ملابس مهندمة حقاً

اعتدت علي ان هذا الرجل يتحدث و يصيح بكلام مبهم غير مترابط و هو متعايش مع العاملين و الممرضات و الجميع يعرفه
و جدت هذا الرجل يصيح - علي الطريقة النوبية و يتحدث بسرعة و بصوت رفيع و يقول

عيد العمال ... المنحة ... المكرونة غليت
و كان يوجة الكلام لي من شباك الصيدلية
قولت له هي المكرونة بقت بكام ؟؟
لم يجب واجابة محددة و ظل يكرر عيد العمال ... اللفلوس قلت ... و المكرونة غليت

انا ذهلت من الكلام
حتي المجانين يا ربي بيتكلموا في السياسة
طيب الرجل دا اساسا لا يفقه شئ ولا يدري ولا يعي اي شئ لانه لا يتجاوب معي ولا مع اي حد
و يتكلم بما يحلو له
فكيف فهم هذا الامر ؟؟؟

كيف فهم ان المكرونة غليت ؟ و ان عيد العمال او المنحة لها علاقة بالامر
ابتعد عن الصيدلية ... وظللت اراقبه

ظل هو يردد الكلام بلهجة ثابتة خالية من المشاعر لكل من يمر عليهم في المستشفي

عيد العمال ...المكرونة غليت ...المنحة


!!!!!!!!!!!!!!!



هناك 5 تعليقات:

آفاق الحرية يقول...

ههههههههههههههه
يعني هو اديهاله مليون دولا ر
اصبحوا مليون جنيه بقدرة قادر
هههههههههههههههه
والله احنا فعلا شعب غلبان
هي فعلا العلاوة اللي سيادته من علينا بها هتصفي علي 30او 40 جنيه
ربنا يخليه لينا ويطرحلنا البركة في عمره
قولي امين

الطائر الحزين يقول...

مش جايز الجنيه بقى اغلى من الدولار والراجل يشكر حط من جيبة


خذوا الحكمة من افواه المجانين

سبهللة يقول...

كالعادة معك كلامك شدنى من اول حرف لاخر حرف
تحياتى ليكى وبالتوفيق ان شاء الله
وماتخديش فى بالك بكرة كلنا نتجنن زى الراجل اللى عنده لطف
الطف بينا يا رب

محمد عبد الغفار يقول...

الفلاحه ماتت ولازم نسلم نفسنا

غير معرف يقول...

و عليكم السلام و رحمة الله و بركاته




ما شاء الله و لا قوة الا بالله





رغم بساطة الاسلوب الا ان الموضوع ثقيل جدا




لدرجة ممكن تتسبب في اقالة الحكومة المصرية




في حالة ان قرا رئيسنا المبجل هذا الموضوع




سيقوم باقالة تلك الحكومة المتسيبة




اللي سايبه الشعب معاه موبايلات يشحنها





الاخ الكهربائي ده عسل اوي




ما شاء الله متعاطف اوي مع الشعب




طب ما تخلليه حضرتك يقلب لك العداد




بحيث يلف بالعكس




و بدل ما تدفعي كهرباء




تاخدي انتي






و اهو انتي برضه اولى




بس ما تنسيش





بالنص