الثلاثاء، أكتوبر 13، 2009

قشطة 3- قصة واقعية حدثت- الجزء الاخير


اين وصلنا ؟؟؟
نعم كانت عدد الشرائح و المسامير شريحة و خمس مسامير , تستكمل حوارها و تقول

لم يقف الامر هاكذا , رفض الجسم الشريحة و المسامير... فاضطروا لعمل عملية تانية لصنع شريحة من عظام الجسم بشكل طبيعي , اضطروا ان يفتحوا في عظام الحوض و اخدوا منها شريحة طبيعية , و عندما وضعوا الشريحة , اضطروا لاضافة مسمار اخر ليصبح العدد 6 مسامير
و بعدين يا قشطة ؟
ابدا يا دكتورة .. الموضوع اخد له 3 سنوات لحد ما العضم ابتدي يلم تاني و يبتدي يرجع شبه الطبيعي ... قولت لها طبعا يا قشطة في الوقت دا مكنش بيشتغل و انت اللي كنتي بتشتغلي ومعاكي العيال
قالت ايوة
قولت لها و بتعملي فيهم ايه بقي لما بتروحي الشغل
قالت لي انا كنت بروح الشغل ,و هما مع امي , ارجع البيت اجهز له اكل و اروح له ( و حكت لي قصة طريفة في هذا الوقت ) لانه مش بيحب ياكل اكل المستشفي و هما مانعين ان حد يدخل بالاكل ...
كنتي بتعملي ايه يا قشطة ؟؟؟
كنت اخلي امي تدبح لي فرخة من علي السطح في يوم مثلا , و احطها في كيس و احط الكيس في صدر العيل الصغير و اكفي الواد علي كتفي
ابتسمت لفطنتها ...قالت لي و مش ببقي شايلة معايا حاجة يجوا علي الباب ابقولوا لي مفيش حاجة هتدخل تقوم ترد و قول يا رجل معييش حاجة غير العيل ,... تاخدة ؟؟؟
و تدخل المستشفي و تهرب له الاكل و كله بيمشي
:)
في مرة اخري جائت و حكت لي انها قدر تركت العمل حوالي 6 سنوات بعد ما الراجل خف و قام بالسلامة

قولت لها اخدتي اجازة يعني
قالت لأ
قولتلها امال ايه ؟؟
قالت قعدت مني لنفسي
قولت لها كدا
قالت اه
انا في غاية الذهول و لم انطق

استكملت : يا دكتورة الحكومة زمان كانت غير دلوقتي خالص دلوقتي لو حد مشي بيتسوح و مش بيعرف يرجع ولو رجع مش بيتثبت ... زمان بقي الدنيا كانت اسهل ... كمان كنا كتير في الدور ( بتاع 7 ) يعني واحدة لو غابت الدور مش هيتأثر دلوقتي كنا اتنين و حاليا بقيت لوحدي من بعد ما طقت في دماغه ( الله ياخده و يريحنا منه ) انه يسرح العمال المؤقتين علشان يجيب شركة نضافة , و ياريتهم عاملين حاجة ولا بتشتغلوا بذمة كل اللي فالحين انهم ياخدوا اد كدا و خلاص ولا بشتغلوا

قولت لها يعني انتي اخدتي اجازة ليه و رجعتي ليه ؟؟؟
قالت انا اخدت اجازة علشان تعبت فعلا يا دكتورة و الست بردوا مملكتها بيتها حتي لو كانت عشة و هو شجعني
لكن لاقيت ان الحالة مش مكفية و بعت كل شئ في البيت مبقاش فاضل غير العيال نبيعهم و انا بشتغل كان ممكن حد يراضيني , اعمل كباية شاي لعيان يطلع لي منها قرش و قرش علي قرش بتتقضي..... مش كل ما اقوله له هات هات هات يقوللي اجيبلك منين ...العيال يجوعوا يعني ؟؟؟
قلت لها و هو واقف
قالت لي لأ طبعا
قلت لها طيب نزلتي ازاي ؟؟؟
قالت لي حلف عليا بالطلاق اني ما انا نازلة قومت انا كمان حالفة بالطلاق اني نازلة و بعدين روحت اعمل ....
انا في غاية التعجب و استوقفتها لاني لم افهم ... قولت لها يعني ايه انك حلفتي بالطلاق انت كمان ؟؟؟
قالت يا دكتورة ما هي طلقة واحدة فطلقة بطالقة حلفت انا كمان اني هنزل
طبعا لم استوعب هذا المنطق العجيب و كتمت احزاني ان الحلفان بالطلاق في فم هؤلاء مثل اللبانه ... و علي كل سألتها ان تكمل
بتقول انها عقدت حوالي 6 اشهر بتجري بين الهيئة التابعه لها المستشفي و المستشفي لتنهي ورق العمل مرة اخري و حتي انها عملت الكشف الطبي في وقت قياسي ( كانت هذه حكاية مستقلة بذاتها ) فقالت لي مجملا ان هذا الكشف يأخذ عده اشهر و انهته هي في يومين و عندما قال لها المسؤول في الهيئة انت مين علشان تعرفي تخلصي الكشف بالسرعة دي قالت لي انها بالصدفة كانت في وحدة الكشف في القللي و كان جوزها بيتخانق معاها علشان مش تخلص الورق و مرتجعش الشغل و الناس التجمعت للتهدئة ( الصورة الواقعية القاتمة لحياة هؤلاء ) و من ضمن النساء التي خلصتها كانت مريضة عندها يوما ما في المستشفي و هي تعرفت علي قشطة و تذكرت عملها و انها عاملة في مستشفي .... و كانت قشطة قاعدة تزعق لها و مش واخدة بالها منها و تقوللها ايوة يا ست انت مين حلي عني انا مش حمل هزار اتم مش ناقصاكي ( لم تتذكرها قشطة ) و بعدين الست عرفت نفسها لقشطة و قالت لها مالك فحكت لها قشطة علي ان جوزها مش عايزها ترجع الشغل و هي خلصت الورق و فاضل الكشف الطبي و دخلتها في يومها و لم تجعلها تنتظر دور .
قالت لي بعد فترة يا دكتورة الحال بقي احسن و جيبنا الحاجة بالقسط و فرقت همومي علي الايام و الحمد لله عدت ...

قلت لها الحمد لله يعني الدنيا بقيت احسن
قالت لي يعني
قولت لها ايه تاني ؟؟؟
قالت لي انها سابت زوجها حوالي 3 سنوات و نصف
قلت لها لماذا !!!!!!!!!!!!!!!!!!!!
لم تجيب

لماذا تركتي زوجك يا قشطة ؟؟
كانت الاجابة التي عرفتها منها اول مرة بعد مرور شهر و نصف من سؤالي لها هذا السؤال
يعني يا دكتورة ظروف
ايه يعني ؟؟
اصلة كان ماشي مع طليقته الاولانية و تقريبا كانوا كاتبين ورقة عرفي

ذهلت انا من هول ما قالته
قلت لها بعد كل دا ؟؟؟ قالت اه !!!!
قلت لها و عرفتي ازاي ؟؟؟
قالت لي يعني انت عارفة ان الناس بتتكلم و لكن انا مش بصدق حد و عاملة ان مفيش حاجة و بعدين في مرة خرجت من المستشفي في وقت مش وقت المرواح علشان اشتري حاجة لحكيمة الدور و لاقيتهم ماشيين مع بعض اخر انسجام

قلت لها : و عملتي ايه ؟؟
قالت : ولا حاجة يا دكتورة مش هفضح نفسي . سكت ساعتها .احنا كنا في الشارع
قلت لها : هو عمل كدا ليه
قالت لي: هو غلبان يا دكتورة , و انت عارفة بقي النسوان ... لما سمعت انه بيلبس كويس و جاب محمول و كدا يعني قالت انه ياما هنا و ياما هناك و حبت ترسم عليه علشان تخليه يتطلق لانها هي كمان بعد ما سابته و اتجوةزت تاني اطلقت علشان ميبقاش حد احسن من حد

قلت لها و عملتي ايه بعد كدا
قالت لي انا روحت البيت عادي
و احنا متعودين انه لما يخلص وردية البلدية يرجع احضر انا الاكل و هو يجيب الطبقين ولا حاجة و ناكل سوا بنتعاون يعني
لاقيته ملوي و حاطط رجل علي رجل و مش عايز يتكلم معايا ولا ياكل و مش طايقني و بيعيب علي لبسي
قالت له لأ يا خويا اقف معوج و اتكلم عدل
قاللها مالك يا ولية
قالت مليش بس يعني مش هتطلعه علينا و عامة انا عارفة كل حاجة , مش خدوهم بالصوت و هما يكونوا عاملين بلاوي
بتقوللي بدأ يستعبط قالت له بقوللك ايه انا شوفتك بعيني حتي بالامارة كنت ماشي في الحتة الفلانية ومعاها الساعة كذا و عاملين كذا و هي لابسة كذا ...بتقوللي منطقش
المهم هي بتقول انها اصرت علي الطلاق و علي حد قولها بتقول اني دايقة معاه الصديد , و انت معك راجل مش ست روح شوف الستات اليومين دول بيعملوا ايه و يطلبوا ايه و كدا كدا انا طالع عيني يبقي قلته احسن .
هو شاط و هاج و ماج و هي اصرت و في مقابل انه يسيب لها العيال اخد كل الاجهزة الكهربائية ( علي الرغم من انها كانت اغلبها اللي دافعه المقدم بتاعة و جايباه بالقسط ) اخد كل شئ و مسابش غير العيال

طبعا انا في مرارة بقوللها و بعدين ؟؟؟
قالت لي ابويا نزل لي تلاجة قديمة و عملت جمعية و قبضتها الاول وجيبت مقدم بقية الحاجات و القسط بدفعة كل اول شهر و القسط مش بياكل حد
قلت لها حالك ساعتها كان عامل ازاي
قالت يا دكتورة كان يصعب علي الكافر بس الحمد لله ... كانت عندي جلابية واحدة تتوسخ اغسلها و تنشف و البسها تاني حتي مرة بتقول ان حد عيب عليها في الشارع و قاللها هو انت يا ام قشطة معندكيش غير الجلابية دي علي طول اشوفك لابساها قالت له لأ طبعا عندي الدولاب واقع من كتر الجلابيات بس دي اللي برتاح فيها . بس كله يهون علشان العيال تتكسي
عندما كانت تحكي لي كانت تتحدث بحيادية لم استوعبها
و في يوم اخر كنت اتحدث معها فعرفت انها كانت موجوعة في تلك الفترة بالجامد اوي و لكنها كانت تريد ان تظهر بمظهر صلب و هي من عادتها انها تطلع غلبها و قرفها في البكاء و قالت انها عملت ثلاث عمليات في عينيا لان دموعها نسبة ملوحتها زائدة و تظهر لها تجمعات تحت الجفن لابد من ازالتها بعملية

و بعدين يا قشطة ؟؟؟ قالت لي عرفت بعدين انه راح اتجوزها لكن مرتاحش معاها تاني و اتطلقوا و لما رجع لها بيقول انها مش ست عايزة تعيش و بتاعة مشاكل .

بس هو بقي قعد يبعت لها في مراسيل انها ترجع له و هي رافضة تماما ( طبعا لانها معه في نفس الشغل فهناك زملاء مشتركين كثيرين بينهما ) حتي هي كانت بتقول قولوله انها هتتجوز و مش عايزاه
قلت لها يا قشطة صحيح كنتي هتتجوزي ؟؟
قالت لي لأ طبعا يا دكتورة انا جربت حظي من الرجالة و خلاص عرفت نصيبي و اليومين اللي فاضلين لي افرح فيهم بالعيال و الحمد لله
قلت لها امال ليه كنتي بتقولي و تخلي المراسيل يوصولوه كدا ؟
قالت لي لانه كنت عايزة احرق قلبه زي ما حرق قلبي
و بعدين
قالت لي مرت الايام و انا عودت نفسي علي انه خلاص ممعييش راجل و هي بصراحة مش فارقة معايا طالما العيال بيناموا في حضني ... قلت لها امال رجعتي له ليه

قالت لي ابويا
ابويا كان بيغسل كلي و هو – طليقها – كان بيهم بيه بشكل خاص و يوصلة للبيت و يوديه المستشفي يومين في الاسبوع بدل من ابناؤه الذكور و في مرة ابوها قاللها و هي بتعدي تطمن عليه , يا قشطة الجدع شاريك . عارفه انه شاريني و بشوفه بيستني بعد شغله معظم الايام لما يطمن عليا اني روحت البيت بلمحه من بعيد. بس يابا
انا اللي يبيعني مشتريهوش و انت عارف انا عملت معاه ايه و كنت واقفه جنبه ازاي يرضيك اللي عمله معايا ؟؟؟ قاللي لأ بس الطيب احسن و انا عايز اطمن عليكي و ياريت ترجعي المية لمجاريها . قالت له يابا انا دماغي قفلت و هو اللي عمله معايا مش شوية
قاللها انا عارف بس انت عارفة الرجالة فيهم الداء دا بس الرجل طيب و كويس و ابن حلال و جدع و قاللها انا حاسس ان اجلي قرب و مش عايز اموت و انا قلقان مش مطمن عليكي
المهم بتقول انه خيرها بين رضاه عليها و انها ترجع لجوزها او مترجعلوش و يغضب عليها , و هي وافقت في الاخر علشان ابوها الله يرحمه
قلت لها مات ؟؟ قالت لي مفيش شهر
قلت لها و بعدين
قالت لي الحمد لله لما رجع عرف ان الله حق و انها جوهرة مكنش مقدرها و الحمد لله هما كويسين مع بعض لحد اليوم
هي لم تكن تريد ان تذكر لي تلك السيرة و كانت من قبل تحكي و تذكره بالخير , انه مش راجل نكدي و لما يتخانقوا هو ينزل يقعد علي القهوة و بعدين يرجع يقوللها هو مفيش يا وليه لقمة ناكلها تقولله يا راجل مش انت زعلان مني ؟ يقوللها محدش يقدر يستغني عن اكلك و يقعدوا يضحكوا

تمر الحياة بقشطة , و بالنسبة لزوجها هو كان ينتظر ان يرجع لها حتي يعمل عملية اخري فك المسامير, و منها عرفوا انه مريض بالقلب و لا يمكنه ان يتحمل البنج و سوف يعيش بتلك المسامير للابد , قلت لها هو بيدخن ؟؟ قالت لي حريقة 3 علب في اليوم !!!!!!!!!
صراحة لا يمكنني باي حال من الاحوال ان استوعب تلك المعضلة انسان يكاد يعيش علي الكفاف و مع ذلك يدخن 2 علب في اليوم بمعدل 600علبة في الشهر ... الا اعرف ما ثنت علبة السجائر و لكن اعتقد انه من اهم اسباب احتياجهم الدائم ان تصرف الفلوس القليلة في الكيف اللعين لا ادري حقا متي ستنخلص من هذا الشبح و المشكلة ان من يدفع الثمن بشكل غير مباشر هن نسوة من عينة قشطة التي تعمل علشان العيال مش تجوع لان الرجل ينفق علي الكيف بشكل غير حكيم و هي بنفسها لا تشعر بتلك المأساه

قلت لها انا عرفت يا قشطة انت قلتي ان دلوقتي هنا كتير عن زمان ليه

قالت لي ايوة يا دكتورة الحمد لله و هي حاجات هفتكرها مع العيال لما يكبروا بعد كدا نقعد تضحك عليها
دائما تردد عبارة : رضينا امره نافذ مرضيناش اره نافذ بردوا يبقي تغضب ربنا مننا ليه و هو امره نافذ في كل الاحوال ؟؟؟

مثل تلك القصص لا تنتهي ولا نصل فيها للنهاية السعيدة او التعيسة
هي مجرد حياوات اخري تتقاطع مع حياتها و يمكننا ان نستخلص منها الكثير و الكثير
من ضمن ما تعلمته منها ان *الفقراء لا يحتاجون الي منظرين قدر ما يحتاجون الي من يعمل بجد ليحسن مستوي البلد و كل الخدمات بها و هي سوف تنعكس عليهم بكل الاشكال
*من ضمن ما استرعي انتباهي ايضا انها قد تكون امراة ذات ظروف صعبة و لكنها ابدا لم تكن ضعيفة و لم تترك حقا لها يوما ما و لكنها تعرف جيدا بفطرتها متي تميل مع الريح و متي تضع حد لها و تواجه بقوة
*ما حدث معها في الصغر تعرف انه جهل و اصرت علي تعليم فتاتها الوحيدة و احضرت لي نهاية العام الدراسي الماضي حلاوة انها طلعت الثانية علي المدرسة في 4 ابتدائي : )
*لا تجلس مع جلسات النميمة و لا تنظر الي ما في يد غيرها و يأتيها الله من فضله و هي من تقول ذلك دائما ( الواحد يسعي يا دكتورة و ربنا هيرزقنا لكن لو قعدنا هو الرزق بيخبط علي الباب ؟؟؟)

*تعلمت انه عندما اواجه اي مشكلة اتذكر جلدها و اتبسم حتي في احلك الظروف و لكن لا انكر علي نفسي حقي البشري في الالم و لكن امارسة بكبرياء ( تبكي هي وحدها في صمت و دائما تنصح عاملة لها ان لا تشكي لانها تجعل الجميع يقول عليها انها شكاية و هي تقول ان من يسمع لن يحل المشكلة يبقي اقولها اللي في ايدة كل شئ (تقصد الله )

* ليست كل الشخصيات المهاودة التي تستطيع ان تعيش باقل قدر من الخسائر هي شخصيات غير ثورية او غبية و حمقاء بل لديهم سياستهم و فلسفتهم لرؤية الحياة قد تغيب عني , لا يجب ان احكم علي احد من مظهرة او وفق تصور مسبق لان معظم الناس شخصيات فريدة حقا ً



************************
لست كاتبة قصة و لن اكون لاني اعرف قدراتي جيدا و لكني اتمني ان يكون هذا التوثيق و السرد قد اعطي صورة من واقع حياتنا عن نموذج للبشر اوشك علي الانقراض و ان اسجل سيرة حياة انسانة شعرت انها مختلفة عن محيطها الملوث قد لا ارى مثل هذا النموذج الملحمي مرة اخري


هناك 11 تعليقًا:

فاتيما يقول...

ملحقتش اعلق على الجزء التانى
بس جيت اهو فى نهاية القصة
مقولتليش عملت إيه مع بنتها
من جوزها الاولانى ؟؟؟
إنتى عارفة الجزء دا
يهمنى اعرفه قوى يا شموسة
الست دى نموذج مصرى اصيل
للمرأة العاملة
و الام
و الزوجة فى بلدنا
ملح الأرض
كما يقال
ملاحظاتك كلها فى محلها
رغم كل الصمود و المعافرة دى
لكن تصتدمى بأراء فيها الكثير من الغرابة و حكاية السجاير دى لوحدها كوم لو بينبىء فبينبىء عن التخلف الحقيقى فى التفكير اللى جايب الناس ورا ....
وحشتنا كتاباتك يا شموستى
و حياتك ما تغيبى علينا تانى
بوسة و حضونة يا حبيبتى

أحمد شاهين يقول...

انا بصراحة مستغرب ازاى كتبتى كل ده
على العموم مجهود رائع وقصة جميلة لكنها تعتبر قصة عامة فالمجتمع المصرى بملىء بأمثال قشطة ممن لهم حكايات ومشاكل لا تعد ولا تحصى

شــــمـس الديـن يقول...

السلام عليكم و رحمة الله و بركاتة
@ فاتيما
منورة يا حبيبة قلبي بجد
و مش مهم تعلقي المهم تقري و خلاص :)

و الله انا فيه جزء مأسواي اخر بخصوص موضوع الانزلاق الغصروفي اللي جالها بس لاقيت ان التدوينة طولت جدا

بالنسبة بقي يا سيتي لجزء بنتها اللي الفرق بينهم حوالي 13 سنة بس

بتتكلم عنها يا فاطيما بحياد غريب
و مكانتش تعرف عنها اي شئ

الا في مرة في يوم اهل زوجها الاولاني خالص جم المستشفي هم و بنتها و سئلوا عليها و هي كانت في الفترة دي اجازة

طبعا قشطة تعرف اغلب الدكاترة حتي في بقية الاقسام ... فلاقيت في يوم حد بيقوللها بنتك اسنها ايه ؟؟؟ قالت لهم معنديش غير زينب في رابعة ابتدائي
قالولها لأ فيه بنت تانية
قالت لهم معنديش بنات تانية , و تحت ضغط قالت لهم ايوة هي فين قالولها جت مع اهلها و قالولها ان ليكي ام شغالة في المستشفي و سالت الدكاترة عليها لكن عرفت انها في اجازة و الكل بيقول انها الخالق الناطق قشطة .. هي لم تعقب و لم تسئل عليها

انا تعجبت من انها بتنكر بنت ليها و بتتعامل معها بالحياد دا
بس عارفة لما جيت احلل الامر و افكر فيه اكتر لاقيت ان قشطة عندها عزة نفس جامدة و عالية اوي و هي كانت صغيرة يعني بردوا يمكن مشاعرها لم تنضج بما فيه الكفايا لتشعر بالامومة كما انها قاست كثيرا جدا مع اهخل زوجها الاول و القسوة فعلا بتعلم الجفاء

هي بتقول انا اشتعوضت ربنا فيها و ربنا رزقني بالولاد و البنات و الحمد لله
نهاية محبطة ليكي انا عارفة بس الظروف و النئية مختلة و احياة بتجمع كل المتناقضات في ان واحد

*************************************

@ احمد شاهين
يعني تقصد كتابة كتيرة ؟؟ :)

يمكن انا علشان عرفت قشطة حوالي سنة و كل مادا علاقتنا بتتوط\ اكثر و لاني عرفت عنها و ان حياتها كانت فعلا حافلة للغاية فحبيت اضغط علي نفسي و اكتب لو لاقي ان الكلام كتير

قصة حياتيه لنتفكر فيها

يا مراكبي يقول...

ياااه

الجزء الثالث ده حكاية كبيرة جدا لوحده .. يمكن هو اللي فيه مفاجآت أكتر بكتير من الجزئين الأول والثاني

عموما .. التفاصيل متعددة والدروس المستفادة كثيرة جدا .. لكل شخصية ظروفها وطباعها .. وكذلك تعتمد الأحداث على ظروف وطباع بقية شخصيات القصة

قصة قشطة هي من الحياة .. وما أكثر الدروس التي تعلمها لنا الحياة

فاتيما يقول...

غريبة قوى يا شمس ؟؟
انا توقعت العكس تماما !!!
توقعت إن الأبنة هيا اللى قلبها يكون جامد ..مش الام ؟
تفسيرك مش مستبعد بس قلبى مش جايبنى أصدقه و اقتنع بيه ؟
لأنها زى ما وصفتى حنونة على مرضى لا صلة لها بيهم و لا تعرفهم و لا منتظرة منهم أى مقابل او تقدير
ليه مبتعاملش بنتها بنفس الشكل ؟؟
يمكن لأنها جزء من تجربة سيئة مش عاوزة تفتكرها ؟
طب ما هى تجربة زواجها التانى مش حاجة لطيفة قوى برضو
و هى استقلالية بما يكفى إن تسيب براح كفايةلبنتها فى كيانها الجديد
طب مش عاوزة الاخوات يعرفوا بعض ؟؟
غريبة قوى ؟؟؟
بس كل دا لايمنع إن القصة موحية جدا
و ابشع ما فيها واقعيتها
و اجمل ما فيها انك رجعتى تكتبى تانى يا شموستى

أحمد شاهين يقول...

يا ستى والله انا مش بقلل من مجهودك ولا بنتقدك ، أنا بتخيل نفسى مكانك لأنى مقدرش اكتب كل القصة دى بالتفصيل الجميل والسرد الرائع ده
اما بخصوص قولى السابق أنها قصة عامة فهو مجرد تأكيد على ان الشعب المصرى كله يعانى نفس المعاناه وفى بعض الاحيان تكون المعاناة اشد من معاناة قشطة

مشتاقة للجنة يقول...

السلام عليكم
ياه ... المرأة هى المرأة ..
مهما كانت تريد العودة لزوجها فلابد أن تشعره بمدى قيمتها .. و لابد أن يشعرها أن الدنيا لا تساوى شيئاً من دونها .. و صدق رسولنا الكريم حين قال (هن مصابيح البيوت )
أختى الحبيبة .. أتفق مع رأى فاتيما فأنا أم و لا أتصور الحياة بدون أولادى .. و لا استوعب أن تستطيع الأم الإبتعاد عن ولدها مهما كانت الظروف .. و بالرغم من ذلك و للأسف الشديد فهناك الكثيرات اللاتى تركن أبنائهن و قد رأيت الكثير من هذة الأمثلة فى الحياة الواقعية .. ولكن إن تركتها ثأراً لكرامتها فمن المفترض ألا تدخل إبنتها فى هذة القضية .. فإذا من الله عليها بلحظة تراها فيها أتمنى أن تعانقها كأم .. تعانقها بشوق 13 سنة مضت من حياة تلك .......اليتيمة ..

شــــمـس الديـن يقول...

السلام عليكم و رحمة الله

@ باشمهندس القاضي

اكيد الدروس مستفادة كتيرة و كل ما الواحد تعمق في التفاصيل ممكن يطلع بدروس مختلفة عن دروس الاخرين

فعلا
الحياة هي اكبر مدرسة موجودة

دمت بكل الخير
**********************************
@ فاتيما

مش قولت لك ان النهاية او الحال اللي وصل له الامر هتصدمك :))

المشكلة اننا حاطير تصورات مسبقة لكل شئ تقريبا و متوقعين سيناريو ثابت
الحياة فعلا اوسع من كدا بكتيييييييير اوي

هي حنينة بس الواحدة لما تتبهدل جامد صعب اوي اوي اوي
اعتقد اننا اتعودن اننا نحط الست في منظر او دور المضحية علي طول بكل شئ في سبيل الضنا و عظمنا اقيمة دي بشكل مطلق و خلينا ان الست تبقي وحشة اوي اوي اوي لو عملت شئ مخالف لدا

قشطة اثبتت ان كل شئ ممكن يجتمع في شخص واحد لان فعلا محدش مر بظروفها ولا عرف كسرة النفس اللي حصلت لها و اكيد هماغ علشان جهله الموضوع مش سهل اوي انها تعرف توصل لحد او حاجة
كفايا سجن الجهل و عدم القراءة

الموضوع فعلا عميق

يمكن الاستقلالية دي هي اكتسبتها من المرارة اللي داقتها لكن ساعتها لما بنتها اتاخدت منها مكنتش بتفكر بنفس التفكير
الانسان استعداد و ظروف بتشكله

تحياتي :)

**********************************

@ احمد شاهين

:)
يمكن قدرت اعمل كدا علشان تفاعلت مع صاحبة القصة اوي اوي اوي انا مقدرش اؤلف شئ زي دا خالص

فعلا الناس كلها بتعاني و كل واحد علي حسب قدرته

لنا الله

***********************************

@ مشتاقة للجنة

واضح ان ليكي نظرة رومانسية للدنيا شوية :)

القوالب الجاهزة

الست مكانتش عايزة ترجع لجوزها ولا حاجة و هي مرجعتش اساسا الا علشان رغبة ابوها لما حست ان اجله قرب

و فعلا سئلتها عن الامر دا قالت مكنتش هرجع و انا خلاص كنت جربت حظي

اعتقد ان الامر لست عبارة عن ثأر للكرامة - كالعادة نتصور ان من لا تموت في سبيل ابنائها هي امراة سيئة - هي عندها كبرياء و في نفس الوقت مغلوبة علي امرها

عارفة معادلة بدي لا بيد عمر ؟؟؟
لكن القلوب ربنا يعلم بخفاياها

اكيد واحدة بالمواصفات دي اكيد تتمني انها تشوف بنتها لكن ما باليد حيلة

هما علي فكرة مش 13 سنة
الفارق بينهما 13 سنة يبدوا ان الامر اختلط عليكي :)

هي مشافتهاش من 32 سنة !!!!!

لمات البنت اتاخدت من قشطة قشطة كان عندها حوالي 13 سنة و دلوقتي قشطة 45 سنة


هل ادركتي ان ظروفنا التي نتصورها لا نستطيع ان نعممها علي الاخرين ؟؟؟
لا اعتقد ان فتاه في 13 سنة كانت تدرك معني الامومة و خاصة انها لم تكن معها و كانت جدة البنت هي من تعتني بها

صحوة الطلبة يقول...

ربنا يقدم اللي فيه الخير موضوع رائع وجميل ربنا يكرمك

the others يقول...

قصة رائعه يا ريت اكون قوية زي قشطه رغم بساطتها ا لا ان خبرتها الحياتية وتصرفاتها تدل على نقاء و حكمة قد لا يتصف بها المتعلمون

م. محمد إلهامي يقول...

تحية خاصة جدا لهذه القصة .. بارك الله فيك.

(مع اعتراف بفشلي في وصف الجمال بما هو أهل له، فيكون الاختصار أولى)